تجربة  السفر والمبيت في وادي الحيتان مغامرة ممتعه جدا

بتاخدك بعيد عن دوشة المدينة وتخليك تعيش احلى وقت فى هدوء وسحر الطبيعة بس الاول خلينا نسأل سؤال مهم .. 

 

ايه هو وادي الحيتان ؟ وايه أهم المعلومات عن وادي الحيتان ؟ 

- وادي الحيتان منطقة غير مأهولة بالسكان وهي جزء من محمية وادي الريان بالفيوم بس بتبعد عن وادي الريان بحوالي 40 كيلو متر والطريق عبارة عن مدق غير ممهد ويفضل تروحه بسيارات دفع رباعي . 

 

- اكتشفوا في وادي الحيتان 10 هياكل كاملة لحيتان كانت بتعيش في المنطقة واكتر من 300 حوت متحجر بيرجع تواجدهم  قبل حوالي 40 مليون سنة ، وكانت جزءا من محيط كبير يشمل شمال إفريقيا (بحر تيث) بالإضافة إلى حفريات بحرية كتيرة ممكن تشوفها

في المتحف المفتوح الخاص بالمحمية .

 

-في نفس الوقت يعتبر وادى الحيتان بيئة طبيعية للحيوانات المهددة بالانقراض زى ثعلب الفنك وبعض الطيور المهاجرة. بالاضافة بقى ان وادى الحيتان يعتبر مكان مميز جدا جدا للرصد الفلكى لبعده عن تلوث وضوضاء المدينة.

 

- في سنة 2005 م تم تصنيف منطقة وادي الحيتان منطقة تراث عالمي واختارتها اليونسكو كأفضل مناطق التراث العالمي للهياكل العظمية للحيتان. 

 

- وادي الحيتان من المناطق الي مفيهاش تغطية لأي شبكة محمول علشان لو ناوي تروح اعمل حسابك ان مش هتكلم حد ودي طبعا ميزة , وكمان مفيش اي مصدر تيار كهربائي فاعمل حسابك علي كشافات وباور بانك 

 

- شكل السما هناك فظيع وبتشوف الآلاف النجوم بعينك والموضوع هيكون حلو اوي للناس المهتمة بتصوير النجوم والمجرات .

 

- هناك في حمامات نظيفة جدا واماكن للتخيم والمبيت لان المكان اطور بمنحة اجنبيه ووفروا فيه حمامات ولوح ارشادية للتعريف بالحيتان وكمان متحف فيه مجموعة كبيرة من الحفريات وكمان في ناس هناك من المحمية شغلتهم انهم يوفروا لكم الاكل والنار بالليل

عشان التخييم والتدفئة والانارة لدرجة انك هتحس انك مش عايز الليل يخلص من جمال المكان والسما  والمكان امن جدا جدا جدا .

 

- الناس اللي حابة تزور المكان انصحكم انكم تتابعو مع بعض الشركات في القاهرة واسكندرية دا هيسهل عليكم كتير .

 

- تكلفة زيارة وادي الحيتان بالمبيت والعشاء والمواصلات من القاهرة والاسكندرية لا تزيد عن 500 او 600 جنيه في المتوسط .


 الطريق بياخد حوالي 3 ساعات من القاهرة , وهتزور هناك المتحف و فى الغالب مسئول المتحف بيشرح كل جزء فية و بعد كدة بيدخلك غرفة العرض ودى بيتعرض فيها فيلم مدته 12 دقيقة تقريبا بيشرح كيف تم اكتشاف الحفريات للحيتان و كيفية استخراجها

(باللغة العربية و الانجليزية)

 

 المكان هناك تحفة كل لما تمشي بتلاقي بقايا حيتان متحجرة والمحمية كبيرة جدا واوعي تفوت الغروب هناك لانه جميل جدا
 

و بليل اوعي تنام لانك هتستمتع جدا بمشاهدة النجوم و الكواكب لانها بتكون ظاهرة جدا و فية جروبات بتروح هناك علشان تتفرج بس علي النجوم و فية ناس مهتمة بالفلك بتشرح بأستفاضة النجوم و الكواكب .

 

وانت هناك لازم تروح جبل المدورة لانها بتطلع علي لسان البحيرة و المنظر من فوق جميل جدا للتصوير لا يوصف فعلا انت مش هتبقي عايز تنزل من الجبل تماما .

 
ودى اهم النصائح علشان تستمع فى محمية وادي الحيتان

 

1-خد معاك مياه كتير متلجة لانك هتحتاجها لان هناك مافيش اي مصدر للمياة الساقعة ( فية كافتريا هناك زجاجة المياة الصغيرة مش غالية ب 5 جنية )

 

2- بليل خد حاجة تغطي بيها انفك علشان التراب هيبهدلك بسبب الرياح 

 

3- الجو بليل في الصيف جميل مش ساقعة ولا حر ف روح بلبس صيفي عادي بس اعمل بردو حسابك فى طقم تقيل عشان لو بردت بليل 

 

4- تاخد معاك كشاف عشان بليل مفيش نور غير ف مكان اللى ف الكافيه اللى بيعمل الاكل و الحمام بس

 

5- خد معاك شوز خفيف عشان المشى احتمال تمشى كتير ف المتحف المفتوح 

 

6-اعمل حسابك لو هتنام مفيش غير خيم بس للنوم وماتنمش بدرى عشان تتفرج على النجوم والشهب لان ده احسن مكان ممكن تشوف فيه نجوم وشهب ومجره درب التبانه 


 تذكرة مبيت وادى الحيتان بــ  50 جنيه للمصرى  و 200 جنيه للاجنبى 

 

وتذاكر الدخول للمصرى زى ما هى 2 جنيه لدخول محمية الريان و 5 جنيه لدخول محمية وادى الحيتان 

 

والاجنبى 3 دولار او بما يعادله مصرى لدخول محمية وادى الريان و40 جنيه لدخول محمية وادى الحيتان

 

ودى بعض الصور لمختلف الاماكن فى محمية وادى الحيتان 

بس قبل ما نسيبك مع الصور ممكن تشوف مقال كامل بخصوص باقى مزارات ومعالم الفيوم السياحيه  او لو عاوز برنامج سياحى كامل للفيوم ممكن تشوفه من تشوف ( افضل برنامج سياحي لاحلي ويك اند ممكن تقضيه فى الفيوم )

 

محمية وادى الحيتان

 

محمية وادى الحيتان

محمية وادى الحيتان

محمية وادى الحيتان

محمية وادى الحيتان

محمية وادى الحيتان

محمية وادى الحيتان

محمية وادى الحيتان

محمية وادى الحيتان

محمية وادى الحيتان

محمية وادى الحيتان

محمية وادى الحيتان

جبل المدورة