مرصد القطامية الفلكى .. تجربة ممتعة تأخذك لعالم الفلك والنجوم

مرصد القطامية الفلكى

أيه رأيكم فى انك ممكن تخرج وتشوف النجوم والكواكب بكل تفاصيلها ... يعنى لو دى من أهتماماتك أو مش من أهتمامتك هتلاقيها حاجة ممتازة جدا ...

اهم المعلومات عن مرصد القطامية الفلكي 

 تعرف أن التلسكوب دة اكبر تلسكوب موجود فى الوطن العربى والشرق الأوسط وشمال افريقيا 

هو تقريبا على بعد 80 كم من وسط القاهرة (طريق العين السخنة) فوق الجبل بارتفاع 450 م عن مستوى سطح البحر بيكون فيه مبنى المنظار فوقيه فى قبة ضخمة جسم التليسكوب وزنه تقريبا ازيد من 50 طن وطول انبوبته يزيد عن 9م وقطر مراته 74 بوصة

يعنى تقريبا 188 سم وسمكها 30سم تقريبا ووزنها حوالى 2طن (متخيلين الضخامة ياجدعان) لازم نفخر اننا عندنا حاجة زى ديه فى مصر... عدد الليالى اللى بتكون فيها السماء صافية هناك تقريبا 250 ليلة على مدار السنة طبعا ده بينعكس على دقة الصور و

نقائها من المنظار و ده بيديله شهرة عالمية بين باقى مراصد العالم...

كدة احنا خلصنا شوية معلومات بسيطة أوى.. نيجى بقى للحاجة اللى كتييير مننا عايزين يعملوها و هى زيارة المرصد

كيفية زيارة مرصد القطامية الفلكي واهم الشروط والاجراءات التى يجب اتباعها 

اه المرصد بيتراح و ممكن نزوره و هتبقى تجربة ممتعة بس طبعا الزيارة ليها شوية شروط واجراءات كدة:

اولا لازم مندوب الرحلة يوصل لمقر قسم الفلك بحلوان و يكون محدد مجموعة افراد عددهم ميزدش عن 50 فرد لطلب زيارة المرصد وبيقدم بيانات الزائرين كاملة مع صورة بطاقته القوميه و بيدفع 500 جنيه تحت الحساب لضمان جدية الرحلة والالتزام بالمواعيد

بعد كدة بياخد تصريح كتابى مختوم من رئيس قسم الفلك لدخول المرصد و هما بيحددوا الميعاد و عند الوصول للمرصد بتقدم صور الرقم القومى لجميع افراد الرحلة و صور جوازات السفر و تصريح الامن القومى بالنسبة للزوار العرب لمسئول الموقع يوم الرحلة...

رسوم الزيارة 70 جنيه للمصرى – 150 جنيه للعربى – 250 جنيه للاجنبى 

و ده فى حالة الزيارة والمغادرة فى نفس اليوم. اما بقى لو عايز تبات للصبح علشان تشوف و تستمتع بشروق الشمس السعر بيكون 100 جنيه للمصرى – 250 جنيه للعربى -350 جنيه للاجنبى و الدفع بيكون عند الوصول مباشرة للمرصد

 المرصد مش بيقدم وجبات او عصائر للزائرين بس فى ثلاجة و غلايه ميه لو حابب تعمل حاجة سخنة و بيسمح استخدام كاميرات للتصوير و تليسكوب صغير كمان بننصح باللبس التقيل لان الجو بيبقى تلج بالليل 

طبعا بيكون موجود اعضاء قسم الفلك اللى مشكورين بيشرحولنا كل حاجة و يجاوبوا على استفسارتكم و طبعا مننساش ان ديه اجهزة حساسه جدا فممنوع اللمس اي تصرفات غير مسئولة لان اى حاجة بتبوظ بيدفعوك تمنها