اماكن الخروج فى القاهرة كتيرة جداا بس النهاردة فى مقالنا دة اختارنا نتكلم عن منطقة راقية  وجميلة جدا وممكن تقضى فيها وقت ممتع ودة لانها مليانه محلات ومولات والخروجات فيها كتيرة ومتنوعة 
موضوعنا النهاردة هنتكلم فيه عن كل شئ يخص المعادى هنعرفك على اماكن الخروج فى المعادى من حيث المطاعم واماكن الترفية للاطفال والكبار والفنادق وهنعمل لكم دليل بالاماكن الحلوة اللي ممكن تروحوها فى المعادى عشان متحتارش كتير 


اولا : اشهر المطاعم على النيل "كورنيش المعادى"

مفيش حد بيشبع من قعدة النيل ولا المنظر الجميل ، ده وياسلام لو مكان حلو كده واكله لذيذ الواحد يفطر او يتغدا  فيه يبقى زى الفل 

هنكلمكم عن اكتر من مكان على نيل المعادى وتفاصيل عنوان كل مكان منهم 
 

1 - بلاتفورم المعادى The Platform El Maadi 

واحد من أجمل تجمعات المطاعم والكافيهات الموجودة فى المعادى فى موقع متميز جدا على كورنيش المعادي  
ويضم مجموعة كبيرة من المطاعم و الكافيهات وهي :
1-Coffeeshop Company
2- Baladina
3-FIG Lounge
4-LA Pietra
5-Tche Tche
موجود على كورنيش المعادي  امام مستشفى السلام الدولي و بجوار نادى مستشارى المحكمة الدستورية العليا

 

بلاتفورم المعادى

 

2-  Nile point : 

طبعاً في اماكن كتير علي النيل بس المكان ده بالذات هتحسه مختلف شوية..أولاً علشان كورنيش المعادي من احسن ال Views للنيل في مصر أو يمكن علشان فيه 3 من أعظم الكافيهات مثلاً واللي كل واحد فيهم موود ومزاج مختلف أو علشان هادي وفي ركن لوحده أو علشان شرح وبرح وكبير وواسع عكس أماكن كتير من اللي بتفتح علي النيل 

الكافيهات هناك كل واحد فيهم دماغ مختلفة.. طبعاً الغني عن التعريف Atlantis Restaurant & Cafe بموده الرائع  وألوانه وأزرقاته والخشب اللي بيبقي طاغي علي الديكور فيه اللي يحسسك إنك في مركب فعلاً حتي لو المكان كان علي شارع عادي فما بالك لو المكان علي النيل فطبعا مش هنحتاج نتكلم كتير

تاني مكان هو Tavola Restaurant and Lounge وده مطعم إيطالي الأوت دور فيه فظيع وال indoor أفظع..ألوانه مبهجة وتفتح النفس وجوا الالوان رايقة وهادية وفيه ميكس لذيذ كده مابين الكلاسيك والألوان المودرن والخشب ال Rustic وكمان في مكتبة فيها كتب لو حبيت تقرأ

تالت مكان هو Rotana Cafe ..برضو المكان حلو أوي وهو مطعم لبناني موجود في بلاد كتير غير مصر واسامي وصور فنانين روتانا موجودة في كل حته هناك 
 
العنوان: كورنيش المعادي، أمام مستشفي السلام الدولي
التليفون: 01000000484
 

Tavola el maadi

Atlantis Cafe

 

3- Mezaj Cafe and Restaurant 

بعيدا عن مجمعات المطاعم المكان دة مختلف وديكوراته جميله جدا جدا  المكان غير تقليدي تماما ومختلف جدا ... ده غير الهدوء ونقاء الهواء كل الي حواليك زرع ونيل حاجة كده تحفة 
المكان متقسم اكتر من قعدة فى مكان للقعدة العربي و كمان في قعدة عالنيل حلوة اوي وعلشان البنات اللى بتحب المراجيح المكان عامل ركن خاص للمراجيح عشان تتمرجح بيها على النيل مباشرة 

العنوان : مرسى نادي الشاطئ، بعد كنيسة العذراء، كورنيش المعادي

هتنزل علي كورنيش المعادي عند مرسي نادي الشاطئ جنب كنيسة العذراء و تدخلوا من البوابة التالتة تسألوا علي المعدية بتاعت مزاج وهم هيبعتو لكم مركب تعديكم الناحية التانية من النيل
 اقرب محطة مترو المعادي 

رقمهم علشان الحجز و التفاصيل : 01007955855 - 01158506030

 

ميزاج كافيه

mezaj cafe

 

ثانيا : أجمل الخروجات والمطاعم  فى شارع 9 المعادي 

 * خروجة Point 9

ودة مكان هتلاقى فيه كل الحاجات اللى تساعدك على الانبساط عشان تروح تفك عن نفسك لو مخنوق وزهقان من قعدة البيت هتلاقي هناك ألعاب وهتلاقى مشروبات وسناكس خفيفه وكمان الديكور فيه شكله حلو اووى دة غير انه فيه كل حاجة ليها علاقة باللعب

عندهم كل الألعاب الجديدة بقي زي الVR و ال Xbox اللي بيفصلوك تماما عن كل العالم اللي برا بضمير وفي الVR هتنسي انت مين عندهم بلاي ستيشن كمان ف مش هتزهقوا ابدا وانتوا هناك من كتر الحاجات اللي ممكن تتلعب وتتعمل .

فكرة المكان المكان قائم على الخصوصية بدرجة كبيرة بحيث تروح تحتل أوضة من اللي عندهم وتلعب وتبرطع فيها براحتك في نفس الوقت..الاوض بتبقي مكيفة وسرعة النت فيها 16 ميجا وفيها كل الألعاب حسب ما أنتم بتطلبوا .

ده غير البلاي ستيشن 4 وطبعا في FIFA و PES 2018 وكل الأوض فيها شاشات ٥٠ بوصة علشان تعيشوا جوا اللي بتعملوه بجد والقعدات كنب وBean bags كتير ومريحة واضاءة المكان كله هادية وخفيفة وفي كمان الكوتشينة والطاولة والدومينو وكل

اللعب دي وممكن تأجروا الأوضة لعيد ميلاد أو حتي تعملوا Movie night وتجيبوا فشار أو أي سناكس ودرينكس من اللي بيقدموها علشان الفرجة تكمل . 

اسعار الPlay Station الساعه للغرفة 40 جنيه من فرد لحد عدد 6 افراد لو اكتر من 6 أفراد سعر الساعه 50 جنيه لحد عدد 10 افراد

اسعار ال XBOX  الساعه للغرفة 80 جنيه من فرد لحد عدد 6 افراد او 8

اسعار ال virtual reality الساعة للغرفة 120 جنيه من فرد لحد عدد 10 افراد 

الحجز عن طريق التليفون من 12 الظهر ل 2 صباحا  من خلال الرقم بتاعهم دة : 01126776412

العنوان : 64 ش 9 المعادى - امام كوفى شوب كومبانى - الدور الثانى - محطة مترو ثكنات المعادى

 

point 9

 

* مطعم  Khan El Roman- خان الرمان

المكان هناك ديكوره شرقي وحلو جدا و فيه 3 قعدات احلي من بعض قاعدين ف الoutdoor كراسي مريحه ملونه و كنب و حواليك الخضرة و قعده تالته ف الindoor واسعه و مكيفه و مريحه

العنوان:22 شارع 9 المعادى – بجانب محطة ثكنات المعادى
 

خان الرمان - المعادى

 

مطعم Gusto

المكان اللى هيغير مفهومك وتفكيرك فى عمايل المكرونه 
المعروف أن المكرونة بتتعمل فى حلة أو بتتعمل فى طاسة ماشى وبتطلع جميلة لكن أنها تتعمل فى قالب جبنة وتنزل سخنة فى الجبنة وتتقلب فيها وبعد كدة تتقدم لك فى طبقك مع بهاريز الجبنة أهو دة بقى اللى مفيش زى متعته فى الطعم اللى الواحد بيلاقية 

مكانهم فى : 80 شارع 9 المعادى بجوار محطة مترو المعادى

 

جوستو المعادى

 

مطعم باب الحديد 

.باب الحديد ترمز لمحطة مصر فمتستغربش لما تلاقى الديكور اللى موجود حواليك شنط سفر او الكراسى على شكل دكك القطر ( بس مريحة طبعا ) ..واللى بيكمل الجو بتاعه أنك قاعد جنب المترو فصوت القطارات بيكمل الجو الجامد ده ...

المكان واسع والأكل حلو أوى أوى
الاكل فيه نضيف جدا واستايل المكان نفسه حلو واسعاره كويسه 

العنوان : 25 شارع 9 بجوار توكيل مرسيدس ( أقرب محطة مترو ثكنات المعادى ) 3 دقايق مشى بعديها
رقم التليفون: 01277880097 / 01277880096

 

باب الحديد- المعادى


ثالثا : اماكن الترفيه للأطفال فى المعادى : 
 

* peek a boo

المكان ده كنز لاي اب وام  ، اول ما بتدخلي المكان ده بتلاقي ابنك ساب ايدك وانطلق في Park مليان لعب بيحبها و Cozy جدا وانتي بتقعدي في كافيه لذيذ مع جوزك او صحابك تشربوا حاجة وانتوا بتتفرجوا عليه بيلعب ومبسوط في مكان مقفول وامن جدا ومش بتحتاج تقوم من مكانك ..

المكان في اكل ومشروبات يعني لو القاعدة طولت كل حاجة موجودة متقلقوش بس مفيش شيشة طبعا وده شئ ايجابي جدا علشان الاطفال وهي بتلعب محتاجة جو نضيف

طيب والاسعار؟ الاسعار حلوة اوي بصراحة يعني دخول الاهل بيكون مجانا والاطفال بيكون تذكرة وبيلعب بيها طول اليوم كل الالعاب لحد ما يجيب اخره

في نوعين من التذاكر الاولى بـ 65  جنيه ودي بيلعب كل الالعاب وقت مفتوح
والتانية بـ 120 بيلعب كل الالعاب وقت مفتوح و بيشارك في Activity انه يعمل بيتزا بنفسه و بياخد عصير وفشار

المكان مفتوح كل يوم جميع ايام الأسبوع ممكن في اي وقت الولاد يلعبوا

العنوان: 3a شارع 213 متفرع من ميدان فيكتوريا (اول ما تدخل 213 من ميدان فكتوريا هتلاقيه على يمينك)

 

peekaboo

 

* كرامنتس المعادي أو فاميلي لاند

من أكبر الملاهي المغلقة في مصر، وتتميز بوجود ألعاب تتناسب مع جميع الأعمار.وواحدة من أنسب ألاماكن الترفيهية للاطفال في المعادي وتوفر فاميلي لاند لأطفالك فرصة ممارسة ألعاب البلياردو والبولينج والتزحلق برفقتكم على الجليد، إلى جانب مشاهدة السينما مع العاب الملاهي المناسبة لكل الأعمار 
العنوان: شارع مصر حلوان الزراعي المعادي، خلف أبراج عثمان.


 
رابعا : فنادق المعادى

1-  فيلا وفندق بيل ايبوك Villa Belle Epoque

مكان هائل للناس اللي بـ تدور على أجازة رومانسية في القاهرة بعيدًا عن الزحمة والدوشة، وفيلا بيل ايبوك بطرازها الأوروبي المميز بـ تقدم لك ويك إند هادئ ومريح،
 العنوان فيلا 63 شارع 13 المعادى - بجوار قسم شرطة المعادى

 

فيلا بيل ايبوك

 

2- فندق هوليداى أن المعادى holiday inn cairo maadi

مكان هادى وجميل جدا على النيل لو حابب تقضى يوم او اكتر واغلب الاوض فيه بتطل على النيل مباشرة 
العنوان :كورنيش النيل المعادى ,29 أ,بجوار اكاديمية السادات للعلوم الأدارية

 

هوليداى ان المعادى


وبكدة نكون اتكلمنا عن اماكن لا بأس بها فى المعادى ومننساش طبعا جزيرة المعادى و مول بندر المعادى لو عاوز تلعب بولينج وكارفور وكمان محمية وادى دجلة واللى اتكلمنا عنها بالتفصيل فى مقال منفصل ممكن تشوفه من هنا : محمية وادي دجلة واهم الانشطة التي يمكنك القيام بها