بالاسعار راس شيطان .. رحلة الاستجمام على اد الايد فى افضل كامبات على الطريقه البدويه

معلومات عن ''منطقة رأس شاطئان'' - نويبع 

 
متتخضوش اوى من إسمها ﻷنها فى الحقيقة طبيعة خلابة ساحرة هتستمتعوا بيها لما تروحوا هناك وهتنبسطو اوى... ودى بعض المعلومات عنها 
 
على أرض سيناء وبالتحديد في الشمال الشرقي، على بُعد ساعة سواقة من «نويبع». فى مكان عبارة عن مجموعة من الخيم منصوبة على شط البحر الأحمر وكلها على الطراز البدوي البسيط، اسمه " بساطة او راس شيطان" بيطل على شاطئ خليج العقبة  بجنوب سيناء طوله حوالي 1000 متر الا شوية ويبعد عن مدينة نويبع بحوالي 12 كم اتجاه طابا وتحيطه الجبال الخلابة المغمورة في الماء والأودية والكهوف والسهول.

وتشتهر مياه المنطقة الساحرة دى بغناها بالشعاب المرجانية الصلبة والأخطبوط وأسماك "البافر"، "الجروبر القمرية" و"شقائق النعمان" بمختلف أشكالها وألوانها من الأحمر والأخضر والأرجواني مما جعلها واحدة من مواقع الغطس المميزة في شبه جزيرة سيناء، ومش كدا وبس لان موقعها في قلب الصحراء جعلها مكان مميز السفاري وتسلق الجبال.

دة غير ان «راس شاطئان او شيطان » تعتبر من أجمل الأماكن في مصر هتحس انها مدينة خارج حدود العالم من حيث الهدوء والاستجمام وصفاء الذهن دة غير انها امان جدا هيخليك تهرب من زحمة القاهرة ، صحيح المشوار من القاهرة لهناك طويل، حوالي 6  : 7 ساعات بالعربية بس يستاهل وكفاية إنك هـ تنسى هناك زحمة العاصمة وجنانها. هـ تهرب لمكان بطبيعة بِكر وبدائي نسبيا وأسعاره رخيصة  

ازاي تروح راس شيطان

لو عندك عربية متينة هـ تكون أحسن من إنك تبقى تحت رحمة سواق أتوبيس، هلكان من السواقة ليل ونهار. ولو مسافر مع مجموعة كبيرة، ممكن تأجروا ميني باص هتكون التكلفة حوالى 1000 جنيه ذهاب وعودة.، ممكن كمان تركب أتوبيس شركة «شرق الدلتا»  من موقف «ألماظة» بـ يروح «نويبع» دة الفرد بيكون بحوالى 200 جنيه

 بس مهم تكون عارف بالظبط هـ تنزل فين على الطريق وتخلي شنطتك معاك لأن «راس شيطان» مالهاش محطة رسمية ولازم تقول للسواق عشان يُقفلك على جنب مكان ما انت عايز.

ممكن تركب طيارة لمطار شرم الشيخ وتنزل تركب أوتوبيس لمدة 3 ساعات بس كده إحنا مش موفّرين وقت قوي فـ مش مستاهلة تكاليف.

تقعد فين في راس شيطان ؟

راس شيطان عبارة عن حوالي 6 مخيمات كلهم جنب بعض تقريبا الفكرة كلها في موضوع الخيم المنصوبة على الرمل، يا إما كوخ على تل أو كشك على البحر على طول،

الاختيارين مريحين والأماكن كلها نضيفة، الأكشاك اللي على البحر أرضيتها رمل ناعم بس الأكواخ فيها خصوصية أكتر وأماكن للنوم عالية عن الأرض وليها شبابيك خاصة بيها.

أياً كان عدد الأفراد اللي هـ يناموا جوه. الحمامات مشتركة بس نضيفة وفيها مية جارية. .
 
الكهرباء هناك بمولدات وده معناه أن النور هـ يتقطع على نص الليل فـ خد معاك شمع وكشافات وبطاريات كفاية،

وتبقى فكرة كويسة لو خدت مبيد حشري وملايات ومخدات صغيرة أو " Sleeping Bag " أو أي حاجة ما تقدرش تعيش من غيرها. بـ نرشحلك مخيم «عياش كامب» عشان المكان مميز والعاملين فيه متعاونيين ، ده غير أن في صخرة ضخمة على البحر مثالية إنك تقعد عليها وتِعد النجوم، لو حابب.

في خيارات تانية للأماكن زي «CASTLE Beach camp -yasmine camp » ودول مشهورين بالأكل اللي بـ يقدموه.

وبالرغم من سحر الجزيرة إلا أن الإقامة فيها أسعارها مناسبة جدا وأقل مما تتخيل كمان ، يتراوح سعر الإقامة في الليلة الواحدة من 50 جنيه لــ 180 جنيه  حسب مكان الإقامة بس لازم تبلغ  الكامب بميعاد الحجز قبل وصولك. يعنى ممكن ب 500 جنيه تقعدلك 4 ايام تفصل فيهم عن العالم كله .. 

الاكلات في راس شيطان 

الأكل من أمتع الحاجات في الرحلة، الفطار بـ يكون وليمة من البيض والعيش البدوى والفول أو البطاطس والمربى والزبدة وسلطة الفواكه مع شاي أو قهوة ، وطول اليوم ممكن تطلب حاجات، بطاطس محمرة، بيتزا وسندوتشات وعصاير وصودا.

بالليل المنيو بـ يكون بدوي برضُه وفي رز وخضار ولحمة أو سمك وفي نظام دفع شبه متفق عليه هناك هو أنه بـ يجمع الفاتورة وتدفع مرة واحدة وأنت ماشي من المكان، فياريت تكون عارف وحاسب انت خدت إيه طول فترة إقامتك.

الانشطة فى راس شيطان

أحلى نشاط تعمله هو الإسترخاء، الخيم والكراسي اللي على البحر اتعملت عشان كده. خد معاك كتب ومجلات وكوتشينة وطاولة أو أي آلة موسيقية.

لو بـ تزهق من القعدة ممكن تتمشى أو تتسلق التلال الصخرية اللي برة المُخيم، وممكن تاخد مركب وتعمل رحلة بحرية وتستكشف المكان، معظم الناس بـ يناموا بدري وبـ يصحوا بدري عشان يستفيدوا بأطول وقت ممكن في النهار.

 
تروح إمتى لرأس شيطان 

المُخيمات هناك بـ تفتح عادةً من أول فترة الربيع لحد آخر الخريف والجو بـ يكون رائع في الفترة دي، لو حابب الشط والمية أكتر من أي حاجة تانية روح في شهر يونيو أو يوليو، بس خليك فاكر أن مفيش تكييف وشهور الصيف عموماً حر هناك.

زيارة الخريف أحسن كتير بس ياسلام لو مافيش ناموس تبقي مالهاش مثيل.

الناس هناك من ثقافات وجنسيات مختلفة. لِمْ مجموعة ظريفة من أصحابك وروحوا قضوا أجازة في الشمس هناك، ممكن «راس شيطان» تخطف قلبك وتبقى مكانك المفضل للأجازات بعد كده.

واخيرا المنطقة دى ككل من اجمل الاماكن في مصر للاستجمام ورحلات السفاري ويقابلها بوضوح في الجهة المقابلة منطقة جبل اللوز المشهورة في السعودية ومنطقة مدين وتبوك ..
الصور اللى جايه دى من ميديتيشن كامب راس شيطان والمنطقة المحيطة لخليج راس شيطان