الفيوم مش بس شلالات وادى الريان و لا السواقى الفيوم ممكن تقضى فيها ويك اند غنى جدا بالانشطه سفارى جامدة جدا بالعربيات ال 4×4 و تشوف البحيره المسحوره فى وسط الصحراء و وادى حيتان اللى كان زمان بحر فيه حيتان من قبل التاريخ بملايين السنين
و هتلاقى متحف رائع للحفريات دى و كمان متحف مفتوح فى الصحراء..
هتقدر تستمتع بالشاى على الفحم فى الصحراء على قمة الجبل ساعه العصارى و تشوى على البحيره او تدلع نفسك بوجبه شرقيه جميله فى قريه تونس..
و تشوف غيطان الكاموميل (البابونج) على طول الطريق و غيطان الورود و النباتات العطريه اللى بتتصدر لكل انحاء العالم ..
و ممكن تدخل قريه تونس اللى اشتهر سكانها بصناعه الفخار و الخزف اللى بيتصدر لكل انحاء العالم و هتشوف حيطان البيوت و هي مرسومة وملونة باجمل و ازهى الرسوم بايدين ولاد القرية
و متنساش تشترى طبق او مبخره جميله تذكار من هناك ..
و تستمتع بفن اولاد تونس اللى كان السبب فيه مدام ايفيلين (ام انجلو) الست دى فنانه سويسريه و عشقت الفيوم وعاشت معظم حياتها فيها و علمت اهل تونس صناعة الفخار و الخزف و كانت السبب فى شهره القريه البسيطه دى ..
وممكن تشوف الغروب على البحيره و تاكل احلى وجبه سمك طازه على البحيره و تنام فى بيت ريفى جميل و بسيط او فى فندق من اغلى الفنادق ..الفيوم حكايه ناس بتحب الجمال و بتصدره للعالم ..
وعشان كدا عملنا برنامج رحلة للفيوم شاملة وكاملة لكل معالم صحراء الفيوم ومزاراتها من قرية تونس لبحيرة قارون لقصر قارون لوادى الريان وسفارى وادى الحيتان وقصور العرب و البحيرة المسحورة وجبل المدورة وكمان هنقترح عليك اقامة فى فندق ظريف على بحيرة قارون (منطقة وادى الحيتان) من الاخر دة هيكون برنامج سياحى يومين بليلة هتلف فيه كل شبر جوه الفيوم وتزور اشهر مناطق الفيوم السياحية ..
تفاصيل برنامج رحلة الفيوم
اليوم الاول : ( قرية تونس - شلالات زادي الريان - رحلة بحرية )
1- الوصول الي قرية تونس بالفيوم وتناول الافطار وبعدها زيارة مدرسة ايفيلين للخزف بالقرية ثم التحرك لزيارة مبنى معبد قصر قارون .
2- زيارة شلالات وادي الريان
3- لهواة التصوير يمكنهم التجول في منطقة الشلالات واخذ صور بجانب الشلالات وفي الماء والتمتع بالجو الجميل .
4- التحرك لعمل رحله بالمركب داخل البحيرة.
لو مش عارف فنادق هناك بنقترح عليك بعد ما تلف جولتك دى تروح عصرا الى فندق نيو بانوراما البحيرة ودة فندق (3 نجوم) على ضفاف بحيرة قارون والتسكين بغرف زوجية وثلاثية (الغرف بتكون مطلة على الحديقة وليس البحيرة)
تناول العشاء مساءا فى مطعم الفندق وترتاح وتستعد ليوم جديد
اليوم التانى : (زيارة منطقة قصور العرب - عمل سفاري في صحراء الفيوم - التوجه لوادي الحيتان - زيارة جبل المدورة والبحيرة المسحورة - الاربيان نايتس)
1- الاستيقاظ مبكرا الساعه 7 صباحا .
2 - تناول الإفطار بمطعم الفندق
3- التحرك بسيارات الدفع الرباعى للاستعداد للمغامرة الشيقة فى صحراء الفيوم والبدء بمنطقة وادى الحيتان لمشاهدة الحفريات وأثار الحيتان
4- دخول متحف وادي الحيتان.
5- التحرك إلي منطقة قصور العرب وممارسة الــ sand-boarding
6- التحرك لزيارة البحيرة المسحورة وتناول وجبة الغداء
7- التحرك لزيارة جبل المدورة وصعود الجبل لمن يريد ومشاهدة اروع منظر من قمة الجبل .
8- الاستعداد للمغادرة
وانت راجع فى طريقك للقاهرة ممكن تعدى على منتجع اربيان نايتس Arabian Nights على بعد 30 دقيقه من أهرامات الجيزة طريق القاهرة – الفيوم الصحراوي – الكيلو 48
ودة منتجع سياحي على مساحه 30 فدان فيه ملاعب كره قدم وكره طائره وحمام سباحه كما يوجد به جلسات عربي وبدوى وسويتات وغرف فندقيه لقضاء اليوم الواحد والمبيت لأكثر من ليله او حتى المكوث فيه عدة ساعات
دة بالأضافه إلى وجود مطاعم أسماك ومشويات مشكله وفطائر ومندىو سنتر السفارى بالبيتش باجى أو الخيل أو الجمال وكمان مدرسه للفروسيه ويوجد بالمنتجع صالة ألعاب بها ( بلياردو , بينج بونج , بلاى ستيشن , بيبى فوت , اير هوكي ) وانشطة تانيه كتير كمان للاطفال …
وبكدة تكون قضيت احلى يومين فى الفيوم وجربت كل الانشطة وكمان روحت اغلب المزارات فى المدينة الجميله دى
ولو حابب تعرف اكتر عن كل مزار من دول بالتفصيل وتتفرج على صور كل مكان منهم ممكن تقرأ المقال دة : تعرف علي معالم الفيوم السياحية
ودلؤقتى نسيبكم مع بعض الصور ونتمنالكم رحلة سعيدة :
