لو عاير تلف العالم إبدأ ببلدك .. استمتع بشهر عسل مميز وسط الطبيعة الساحرة وافضل اماكن شهر العسل فى مصر

المقال دا يهم كل عريس وعروسة مقبلين على الزواج هنتكلم فيه عن: 

افضل الاماكن لقضاء شهر العسل فى مصر 

لو عايز عروض وخصومات كبيرة على الفنادق والرحلات السياحية فأنت فى المكان الصح .. تابع عروضنا والحق احجز معانا فى الخصومات اللى بنعملها دايما على الرحلات السياحية من هنا : 

استمتع بأكبر الخصومات علي فنادق شرم الشيخ و الغردقة و مرسي علم وغيرهم من المدن السياحية

عرسان كتير اوى معندهمش الخبرة امتى و ازاى وفين يقضى شهر العسل ويستمتع بيه فى مصر .. المقال دا هدية منى لكل عريس وعروسة واتمنالهم حياه سعيدة 

اولا لازم تعرف ان فى اماكن كتيير جدا ممكن تقضى فيها شهر العسل فى مصر ولكن اختيار التوقيت المناسب هو الاهم عشان تستمتع صح .

وهنتكلم عن اسماء المناطق التى يفضل زيارتها والتوقيت المناسب للزيارة وليس لاسماء فنادق .. اما لافضل الفنادق واسمائها يفضل زيارة مواقع حجز الفنادق  او اى شركة سياحة .

اولا : شهر العسل فى مصر في فصل الشتاء :

افضل واروع الاماكن فى مصر لقضاء شهر العسل فى البرد هى النوبة واسوان والاقصر وممكن تعمل فيها اكتر من برنامج بس اهم حاجتين ممكن تعملهم هناك :

1 . رحلة نايل كروز بين الاقصر واسوان

ودى بتكون لمدة اربع ايام وبتكون شاملة كل المزارات ودى ممتعة جدا جدا ومناسبة لشهر العسل .. وممكن وانت فى الاقصر هتركب بالوان مع شروق الشمس فى الاقصر ودا بيتكلف حوالى من 2000 الى 3000 ج للفرد على حسب الموسم .. وممكن تاخد فلوكة فى الاقصر وتزور جزيرة الموز هتكلفك حوالى 120ج الفلوكة كلها .. وفى اسوان ممكن تعمل رحلة بالفلوكة للنوبة وتستمتع بالبيوت النوبية هناك ونهر النيل والجندل ودى هتكلفك حوالى 200 ج للفلوكة .

2 . رحلة النوبة والاقامة ببيوت النوبة 

وطبعا دى هتكون رحلة شهر عسل مميزة جدا لانك هتعيش جو مختلف مع ناس طيبين .. هناك هتنزل فى فندق نوبى او ممكن فى اسوان وهتكون على النيل ليل ونهار وانت هناك هتزور متحف النوبة والسد االعالى ومعبد فيلة وممكن تاجر عربية وتطلع يوم على معبد ابو سمبل وهتكون اجمل زيارة تاريخية فى حياتك .. وياريت وانت رايح معبد ابو سمبل تروح يوم خميس او جمعة وتحضر هناك الصوت والضوء لانه مبهر جدا  بس طبعا كل المزارات دى تستدعى انك لازم تاجر عربية خاصة لان المسافات بين مكان الاقامة والمزارات بعيد وخصوصا معبد ابو سمبل يبعد عن اسوان 300 كيلو .

ودة مقال لو عاوز :  برنامج مميز للاقصر واسوان والنوبة 

من اماكن شهر العسل المميزة فى الشتا لو عاوز مكان قريب من القاهرة (قرية تونس) على ضفاف بحيرة قارون ودى للاستجمام وهى عبارة عن قرية ريفية فيها فنادق بسيطة وممكن وانت هناك تعمل سفارى وادى الحيتان (العربية ايجارها حوالى 1200 ج فى اليوم) .  ودة برنامج سياحي مميز للفيوم 

3 . من الاماكن الحلوة اوى فى الشتا برضو هى واحة سيوة وتعملك رحلة سفارى محترمة لبحر الرمال الاعظم وفى الواحة هناك فى مجموعة اوتيلات منها اللى سعره معقول ومتوسط ال ممكن يكون اليوم للغرفة الدبل فيها مثلا ب 600ج وعندك فى فنادق بيئية وتجربة مختلفة الغرفة فى اليوم هناك ممكن توصل ل 600 دولار .  ورحلات السفارى بتاجرها من مكان الاقامة ال انت نازل فيه وهما بيخلصولك التصريحات وكل حاجة وبرضو عشان تعمل مزارات واحة سيوة يفضل انك يكون معاك عربية خاصة لان المزارات بعيدة عن بعضها . ودة بردو برنامج سياحي مميز لواحة سيوة 

ثانيا : شهر العسل فى الصيف 

لو مهتم جدا بالجو ويفرق معاك انك تقعد فى مكان فيه خصوصية مع جو هوا حلو على البحر ومافيش حر يبقى عندك الساحل الشمالى وسيدى عبد الرحمن والعلمين دول افضل اماكن فى مصر اثناء الصيف لقضاء شهر العسل وهناك ممكن تنزل فى فندق او تاجر شاليه فى مارينا او اى قرية او منتجع سياحى .. وغالبا هتكون رحلة للبحر والبلاج وبس .. وعندك وانت فى العلميين لو مهتم بالمزارات الثقافية والتاريخية ممكن تزور متحف العلميين العسكرى ومقابر الالمان ومقابر الايطاليين ودول على الطريق السريع فى العلميين .

طبعا فى عندك مصيف جميل ومعروف ومحبوب من كل افراد الشعب وهو مطروح ودا شواطئ رائعة جدا ولكن يعتبر مصيف شعبى والخصوصية معدومة تقريبا فى الشواطئ ولذلك مطروح احنا نرجحها مصيف عائلى او شبابى اكتر من انها تكون مكان لشهر العسل . وفى مطروح طبعا هتزور هناك مزارات شواطئ ..

عندك الشواطئ العامة فى وسط البلد وبطول الكورنيش زى الفيروز وروميل ومطروح العام ودى كلها فى وسط البلد وسهل جدا الوصول ليها .

عندك شواطئ للزيارات فقط ومش بتنزل فيها البحر بتروح تتصور وتمشى زى شاطئ كليو باترا وشاطئ عجيبة ودول ممكن تروحهم فى يوم واحد فى مواصلات بتطلع ليهم من وسط البلد فى مطروح (اتوبيس عام) ويفضل تروحهم بعربية خاصة او تاكسى عشان تبقى براحتك (عجيبة تبعد عن مطروح ب 27 كيلو تقريبا وكليو باترا تبعد عن مطروح ب 7 كيلو تقريبا )

وعندك شواطئ جميلة للنزول والاستمتاع زى مثلا شاطئ الغرام ودا يعتبر من افضل شواطئ مطروح ودا بتركبله معدية من مطروح عند السيرك عالكورنيش ب 2 جنيه بتعديك للشاطئ الجانب الاخر من الكورنيش وهينزلك فى البلاج .. وعندك شاطئ القوات المسلحة فى الابيض ودا يبعد عن مطروح 15 كيلو ويعتبر برضو من اجمل الشواطئ وهتلاقى فى كل شاطئ العاب بحرية زى البنانا بوت والجيت سكى والبدال وبتاجرهم بالساعة .طبعا مطروح يعنى تنزل كل يوم على الكورنيش وتخرج وتتمشى ومتنساش تروح سوق ليبيا لو عاوز تشترى توابل او لبس او شوز .

ودة مقال كامل يخص مرسى مطروح سواء كانت اسعار وشقق وفنادق مطروح واهم الخروجات فيها 

ثالثا : الاماكن الاكثر شهرة والتى تناسب فصلى الصيف والشتاء :

1 . الغردقة

وهناك ممكن تنزل فى مكان من ثلاثة : 

* سهل حشيش وهو عبارة عن مجموعة فنادق فخمة على البحر بعد مدينة الغردقة بحوالى 30 كيلو  يتميز بالهدوء والخصوصية والفخامة والرفاهية .

* الجونة وهى عبارة عن قرية سياحية كبيرة على البحر بها مجموعة فنادق وشاليهات من 3 نجوم الى 5 نجوم وتتمتع ايضا بالخصوصية والرفاهية .

* خليج مكادى ودى عبارة عن قرية سياحية فى طريق سفاجا فيها مجموعة فنادق فخمة وليها خصوصية .

سواء كنت فى الجونة او سهل حشيش او مكادى .. فانت كدا تعتبر برضو فى الغردقة لان كل الاماكن دى تابعة للغردقة و ممكن تنفذ برنامج ترفيهى كامل فى الغردقة .. ودة مقال بيتكلم عن التلات مناطق دول كدا بالتفصيل ( دليلك السياحي لرحلة شاملة لكل معالم الغردقة )

2 . شرم الشيخ

وهناك ممكن تعمل حاجات كتيرة جدا خصوصا ان انك فى مدينة من اجمل 10 مدن فى العالم فيها مزارات كتيرة جدا هنتعرف عليها فى مقال منفصل ( برنامج سياحي لرحلة شرم الشيخ بالاسعار )

3 . العين السخنة

وهناك هتحجز فندق على البحر مباشرة للهدوء والاستجمام والحاجة ال ممكن تعملها هناك انك ممكن تحجز رحلة بحرية باليخت فى السخنة هتكلفك حوالى 120 ج للفرد وممكن تركب تليفريك فى بورتو السخنة وباقى الوقت هيكون للبحر والاستجمام وانصحك تعمل غطس هناك مع الفندق او مع اقرب مركز غطس مش هيتجاوز 300 ج للغطسة . ودة برنامج بيتكلم عن فنادق السخنه واسعارها : اسعار قضاء داي يوز في العين السخنه 

رابعا :اماكن يفضل زيارتها فى شهور الربيع والخريف :

1 . * مرسى علم (يفضل زيارتها فى الربيع او الخريف) وهى مدينة ساحرة الجمال تابعة لمحافظة البحر الاحمر تبعد عن الغردقة بحوالى 300 كيلو بها مجموعة فنادق تتميز بشواطئها البكر الوهمية .. وهناك ممكن تعمل رحلات برية لجزر قلعان الرملية وكمان ممكن اوى تزور محمية وادى الجمال ومجموعة شواطئ عالمية مشهورة بتواجد الدلافين وحيوان الاطوم البحرى وطبعا وانت هناك متنساش تخرج سهرة للعشا البدوى فى الجبل .. وكمان مهم جدا تعمل رحلة الغواصة من بورت غالب لانها رائعة جدا . وكل الرحلات دى بيتم تنسيقها وحجزها مع الفندق ال انت نازل فيه او من خلال اى مكتب تنظيم رحلات فى مرسى علم . وطبعا عندك هناك بيتعمل برضو اكتر من نوع لرحلات بحرية جميلة باليخت منها بيت الدولفين ومنها محمية صنداى او منطقة سطايح فى حماطة ودى اسعارها بتترواح من 450 جنيه ل 750 جنيه على حسب نوع الرحلة ومكانها . وممكن تشوف مقال مفصل عن مرسى علم ( دليلك لقضاء اجازة مميزة فى مرسي علم )

2 . دهب وطابا : ودول بقى لو انت بتحب او غاوى هدوء وطبيعة وبساطة وانت فى دهب انصحك جدا انك تعمل رحلة باللانش السريع او بالجمل لمحمية ابو جالوم وانت فى طريقك هتعدى على البلو هول .. وكمان انصحك جدا لو انت فى الشتا اوعى تفوت سفارى محمية طابا للوادى الملون والوادى الابيض ودى بتطلع من دهب فى حدود 250 ج للفرد .. ولو انت فى طابا او عديت عليها متنساس وانت فى طريقك تقف عند خليج الفيورد تتصور وكمان لو ينفع تروح قرية صلاح الدين وتروح تخد المركب من القرية الفرد ب 35 ج وتزور جزيرة فرعون وقلعة صلاح الدين هناك وممكن تحجز مع الفندق بتاعك رحلة بحرية يوم كامل باليخت تلف فيها بحر طابا وتتفرج على الشعاب المرجانية هناك وهتكون فى حدود 350 ج للفرد .

وكمان لو انت نازل فى طابا بس وطابا تعتبر واجهة جميلة جدا جدا للناس ال بتحب تقعد فى الفندق ومتخرجش وبيحبو الهدوء التام .. انصحك تنزل فى مجموعة فنادق طابا هايتس لان عندك جوا خدمات وشواطئ وحاجات كتير هتمتعك ومستوى فنادقها حلو وكمان عندك كهف الملح جوا طابا هايتس .. وياريت لو تقدر تزور فى يوم تقضيه فى قلعة زمان هتنبسط جدا خصوصا ان المكان دا مناسب جداااااااا للكابل ..  

ودول مقالين مهمين بخصوص طابا ودهب : 

دهب : تعرف على كل شبر فى دهب بالصور والاسعار 

طابا : دليل رحلتك الي طابا واشهر الاماكن السياحية بها 

فى حاجة مهمة جدا جدا جدا ودا بناء عن تجارب كتير :

لو انت متجوز فى افضل شهور فى السنة ال هما شهور ( 3 و 4 و 10 و 11 ) دول شهور الربيع والخريف ودول انسب توقيت للخروج والمتعة فى جو معتدل فى مصر انصحك تتجه دايما لمرسى علم او دهب وطابا لان جوها مناسب اكتر للجو الربيعى والخريفى اكتر من الصيف او الشتا بكتير.

المصدر : محمد النجار