لو انت من النوع اللى بيحب الاماكن اللى بتخليه يحس براحة نفسية واستجمام وتأمل يبقى انت محتاج تزور دهب وتخطفلك كام يوم اجازة هناك تفصل فيهم عن العالم ..

على اد ما دهب مدينة هادية وبطبيعتها مكان بسيط حتى شكل الفنادق بتاعتها وتصميمها بيوحى بالبساطة اكنك عايش حياة بدوية فى عالم تانى .. الا ان الانشطة فى دهب كتيرة جدا وفيها مغامرة وحركة .. 

علشان كدا فكرنا نعملك برنامج سياحى لرحلة دهب 5 ايام / 4 ليالى عشان تنبسط وتعيش تجربة مختلفة 

ولو نفسك تخطفلك يومين تروح فيهم دهب وسانت كاترين فى الويك اند ممكن تحجز سفرية دهب وسانت كاترين ب 350 جنيه وبس معانا وعيش واستمتع براحتك 
 
 

تفاصيل البرنامج السياحى لرحلة دهب

 
اليوم الاول : ( قضاء سهرة بدوي عند جبل الطويلات )


1- هتستلم الغرف فى الفندق وتستريح شويه من تعب السفر (ممكن تختار الفندق اللى يناسب احتياجاتك ) 

2- و بليل بعد ما تستريح تروح تسهر أحلى سهرة بدوى فى ( جبل الطويلات )
ودى عبارة عن تنورة و أغانى بدوى وقعدة وسط الجبل على أضواء الشموع والنجوم، ده غير الليزر اللي هتشوفه أشكال وألوان علي الجبل ، وممكن تزود عشاء بدوي كمان فى قعدتك .. 
 

اليوم الثانى :( زيارة كلا من البلوهول - محمية ابو جالوم - الممشي السياحي )


1- البلوهول ( تانى احسن مكان فى العالم للغطس ) 
هنبتدي اليوم ب سفاري بالعربيات وسط الجبل لحد ما توصل للكانيون ، تسيب حاجتك هناك و تبتدي تعمل سنوركلينج من منطقة " شق التعبان " او البلو هول اللي فيها أجمل وأغرب الأسماك اللي ممكن تشوفها وسط الشعب المرجانية

2- محمية أبو جالوم 
 اللي بيحب المغامرة لازم يزور أبو جالوم ، و دي محمية طبيعية بتوصل لها باللنش من البلوهول هتستمتع فيها بالعوم و السنوركلينج 

3- البلو لاجونا ودي  هتريح اعصابك شوية هناك من منظر ولون المايه والهدوء فيها

4- ترجع الفندق ترتاح شويه 

5- وممكن بالليل تنزل تتمشى فى " الممشى السياحى" 
وهتستمتع بالكافيهات والمطاعم اللى على البحر ودول كتير جدا و بأذواق مختلفه  غير الكافيهات التقليدية اللى نعرفها ..  دة غير ان فيه مراجيح على البحر و بازارات ومحلات تحف ورسامين ولبس وجداريات مرسوم عليها اشكالها جميل جدا هتاخد أحلي صور هناك ، غير ان كل الخدمات اللى ممكن تحتاجها تقريبا متوفرة (سوبر ماركت، ماكينات ATM ،محلات هدايا،ركوب عجل ، صيدليات ) 
 

اليوم الثالث : ( زيارة الثري بولز - وادي قني - عمل سفاري بالبيتش باجي )

 

1- الثرى بولز ( ودي محمية طبيعية ) 
هتنزل فيه  المياه تعمل سنوركلينج وتشوف أجمل وأغرب الأسماك ده غير أندر وأجمل الشعاب المرجانية و اللي حابب يعمل دايفينج هيستمتع أكتر بالمناظر دي كلها

2- ترجع الفندق تغير هدومك وترتاح شوية

3-  وبليل تعمل سفارى البيتش باجى فى ( وادى قنى )
ودة مكان ولا ف الخيال هتستمتع هناك كمان بالقعدات البدوى والسهرات وتشرب احلى كوباية شاى
 

اليوم الرابع : ( رحلة لمنطقة جبر البنت - شاطي اللاجونا )

 

1- رحلة بحرية باليخت لمنطقة  ( جبر البنت )
هتقضي فيها  أحلي يوم وسط جو ومناظر جديدة وكمان تتغدي على اليخت
 
2- شاطئ اللاجونا
اللاجونا من اجمل أماكن الغطس في البحر الأحمر لاحتوائها علي كنوز تحت الماء، وهى من أكثر المناطق اللي تُمارس فيها رياضة الغوص، عشان كدا التجربة دى لازم تكتشفها وهتشوف هناك نوادر فى اعماق البحر مش هتشوفها فى اى مكان تانى 

 

اليوم  الخامس ( الاستمتاع بشاطئ الفندق ) 

1- اﻻستمتاع بحمام السباحة فى الفندق ده بقي اليوم الفري هتفطر فيه  بدري ونقضي اليوم علي شاطئ الفندق وممكن تركب بنانا بووت ده غير الأنشطة الكتيرة اللي ممكن تعملها على الشاطئ 

2- واخيرا  تعمل check out  تسلم الغرف

وتكون بالشكل دة قضيت افضل برنامج سياحى ممكن تعمله فى دهب 
 
ودلوقتى هنقولكم على:

اسعار تقريبية للأنشطة اللى هتحتاجها فى برنامجك لرحلة دهب : 

 
1- السهرة البدوى ( جبل الطويلات ) 80 جنية
2- سفارى بيتش باجى ( وادى قنى ) من 150 : 170 جنية السنجل  و من 200 : 220 جنية الدبل 
3- أبو جالوم + البولاجونة 180 جنيه
4- ادوات السنوركلينج  ما بين 35 : 50 جنية لليوم الواحد
5- رحلة بحرية بالغدا (جبر البنت ) تتكلف حوالى  280 جنية
6- شاطى اللاجونا 50 جنية 
7-أدوات السنوركلينج 50
8- الدايفينج 350

وبكدة نكون خلصنا ولو حابب تعرف اكتر عن دهب وعن كل شبر فيها دول تقريرين كاملين عن كل حاجة فى دهب محتاج تعرفها  : 

تعرف علي كل شبر في دهب بالصور والاسعار 

تعرف على افضل الاماكن السياحية والانشطة الترفيهية فى دهب 

برنامج سياحى لدهب