مين قال ان القاهره مفيهاش غير كافيهات و مطاعم و شارع المعز و الحسين؟؟

جديد : ابعد عن الخروجات التقليدية، احجز وادفع أونلاين كل اللي نفسك فيه وانت قاعد مكانك . 

  1. اكتشف جمال النيل و احجز من هنا  فلوكة بتكفي لحد 5 افراد بــ 300 جنيه بس في الساعة .
  2. استمتع بالموتور بوت واللي بتكفي لحد 20 فرد بأسعار تبدأ من 555 جنيه للساعة للحجز اضغط هنا 
  3. بــ 99 جنيه بس هتشوف القاهرة بمنظور تاني علي قارب كاياك في قلب النيل احجز دلوقتى من هنا 

ولمزيد من الخروجات والمغامرات في القاهرة اضغط هنــــا عشان تشوف كل جديد

جبنالكم النهاردة مغامرة جديدة ومختلفه خالص فى مكان مستخبى للناس اللي عايزه تزود هرمون السعادة و حابه تعمل حاجه مجنونه و جديده في نفس الوقت.

المكان اللي هنتكلم عليه مش اي حد يعرفه بالرغم ان ناس كتير بتسافر عشان تلعب اللعب ديه مخصوص و بيكون سعر اللعبه حوالي 50 دولار لفرض يعني بتتكلم 800 جنيه.

طيب احنا هنتكلم عن انك تقضي يوم مجنون و هتلعب 4 لعب هيكلفك 300 جنيه و مش لازم تلعب كله و ممكن تتحاسب باللعبه .

طب يلا نبدا المغامره

**في مكان اغلب القاهريين يعرفوه في المقطم اسمه دير سمعان الخراز و ديه عباره عن كنيسه محفوره في صخور المقطم و معروفه جدا.
   
*ملحوظه
مش عايزينك تتخض و انت طالع طريق الكنيسه عشان هتمر علي عزبة الزبالين فهتلاقي الريحه صعبه شويه بس مجرد ما توصل الكنيسه هتلاقي الريحه اختفت.

و انت داخل الكنيسه قول للامن انك داخل عند ماريو.
ماريو ده راجل كندي عايش في مصر بقاله ٢٥ سنه و بيتكلم عربي مكسر جه مصر و عمل ايه بقى ؟!

 

منطقه العاب ملحقه بالكنيسه اسمها High Ropes و كلها عباره عن احبال مربوطه في منطقه الجبل.

هناك هتلاقي ٤ العاب بس الاربعه امتع من بعض بمراحل و العاب مش مألوفة بالنسبة لنا عشان مش بنشوفها غير بره او علي التيلفزيون.

اول ما تدخل منطقه الالعاب هتلاقي منطقه لجلوس لناس اللي حابه تتفرج بس و تتصور و الجلوس مجانا يعني مش لازم تطلب او تشتري حاجه.

هتلاقي حمام نضيف عشان لو حبيت تغير هدومك.

قبل ما تبدا اللعبه هتدخل منطقه يلبسك فيها الخوذة و شورت حزام و دول وسائل الامان.

بعد كده هتدخل منطقه الالعاب الي هتلاقي فيها:
 

اول لعبه اسمها zip line

=======================

و ديه اهم لعبه لازم تبدا بيها و ديه عباره عن برج بتطلع عليه و تتربط في حبل و تتزحلق و طبعا اللعبه ديه هتحس في الاول بخوف رهيب في الاول بس هتلاقي قمه استمتاع و انت بتتفرج علي المقطم و انت طاير و تتفرج علي الكنيسه من اعلي نقطه.
اللعبه ديه محتاجه ثقه في نفسك انك في امان و مفيش خطر عليك.
سعر اللعبه ديه 75  جنيه.

*ملحوظه مهمه
اللعبه ديه مش بتشتغل غير قبل ما الدنيا تضلم عشان تكون شايف الدنيا من فوق.
 

2- لعبه تسلق الصخور 

======================

اللعبه ديه لازم تبدا بيها قبل اللعبتين التانيين عشان محتاجه طاقه عاليه و فيتنس عالي جدا عشان مجهود عالي انك تطلع ارتفاع عالي جدا عشان تضرب الجرس و طبعا متخفش بيكون في شخص انت مربوط بيه عشان يحافظ علي توازنك و انت طالع و عشان لو ايدك سابت الصخور تكون في نفس ارتفاعك و متقعش.
سعر اللعبه ديه 50 جنيه
 

3- لعبه الاحبال المنخفضه (low ropes)

===================================

و من هنا بتبدا الاثاره انك تمشي علي احبال و جسر و اللعبه ديه محتاجه توازن و حتي لو رجليك ثابت و انت علي ارتفاع فبيكون في حبل تاني بتتزحلق عليه عشان يوصلك المنطقة الثانية  و تكمل اللعبه.
ديه سعرها 75 جنيه
 

3- لعبه الاثاره High rope 

=================================

و ديه حلاوتها انها ارتفاع عالي جدا و بتمسك في احبال و تتشعبط في الجبل و تتحرك بالحبل زي طرزان.
ديه اصعب لعبه عندهم بس كل ده امان بنسبة ١٠٠٪
سعرها 100 جنيه.
 
**اهم الملحوظات
-روح بملابس رياضيه و كوتشي و بلاش جينز عشان حركه رجلك تكون سهله

-قبل ما تروح لازم تحجز قبلها مع ماريو عشان تعرف في اماكن و لا لأ
و ده رقمه 01200140662
 
-لو رايح بالمواصلات اركب اي عربيه راحه المقطم و قولهم دير سمعان و هينزلك في اقرب مكان فتنزل تركب توك توك ب ٥ جنيه يطلعك لفوق.

-لو عندك فوبيا من الاماكن العاليه بلاش تروح.
 
- المكان امان بنسبه ١٠٠٪ و الناس هناك متعاونه جدا جدا و بيهرجوا معاك عشان تتلاشي الخوف.
 
- لو سنك اقل من ١٨ سنه فلازم يكون معاك حد من اهلك عشان يمضي انك سليم و مش بتعاني من مشاكل صحيه.
 
-المكان شغال طول الاسبوع ما عدا يوم الاحد.
 
-مش لازم تلعب كل حاجه و بتحاسب بعد اما تخلص لعب. وده اخر تحديث للاسعار يعنى وقت ما هتروح هتلاقى الاسعار دى مفيش فيها تغيير .

جديد : ابعد عن الخروجات التقليدية، احجز وادفع أونلاين كل اللي نفسك فيه وانت قاعد مكانك . 

  1. اكتشف جمال النيل و احجز من هنا  فلوكة بتكفي لحد 5 افراد بــ 300 جنيه بس في الساعة .
  2. استمتع بالموتور بوت واللي بتكفي لحد 20 فرد بأسعار تبدأ من 555 جنيه للساعة للحجز اضغط هنا 
  3. بــ 99 جنيه بس هتشوف القاهرة بمنظور تاني علي قارب كاياك في قلب النيل احجز دلوقتى من هنا 

ولمزيد من الخروجات والمغامرات في القاهرة اضغط هنــــا عشان تشوف كل جديد

وممكن تتفرج على صور كل لعبة من خلال حبة الصور اللى جايين دول : 

 

المصدر : صفحة Traveller Experience