خروجة مجمع الأديان البلد الوحيدة فى العالم اللى فيها المقدسات للديانات السماوية الثلاثة فى شارع واحد

الخروجة دى مش هتكلفك غير تذكرة المترو وبس يعنى 2 جنيه
هتشوف أماكن تاريخية مش هتتخيل أنها بالجمال دة

هتشوف ألتقاء الأديان السماوية الثلاثة فى مكان واحد
المسجد والكنيسة والمعبد اليهودى فى شارع واحد

طيب اقرا المقال ده كويس و جربه بنفسك و احكم في الاخر
هتركب مترو الانفاق الخط الاول ب 2 جنيه و تنزل محطه ماري جرجس وبكدة دى تكون بداية الرحلة

البداية هتكون مع الكنيسة المعلقة وبعد كدة حصن بابليون

:وبعد كدة هتدخل على منطقة فيها 6 كنائس و هم

كنيسة القديس أبي سرجة، وكنيسة القديس مارجرجس، وكنيسة القديسة بربارة، وكنيسة القديس أبي سيفين، وكنيسة القديس تادرش الشاطبي، وكنيسة الملاك ميخ


كل كنيسه من دول ليها قصه و تاريخ و طبعا اهمهم الكنيسه المعلقه
وأنت ماشى فى الممرات اللى بين الكنائس دى هتحس فعلا أنك ماشى فى شوارع القدس اللى بنشوفها فى الأفلام الوثائقية
طيب انا كواحد معرفش في التاريخ بس حابب اعرف عنهم هعمل ايه؟
في كل كنيسه و خصوصا المعلقه هتلاقي شباب متطوع من الكنيسه بيشرحلك تاريخ الكنيسه.

-طيب هل الاماكن ديه ليها تيكت او بدي فلوس لمتطوع ده؟
لا خالص من غير تيكت و المتطوعين بيشرحولك كل قصة بيعتبروا ان ده شرف ليهم ان يعرفوا الناس تاريخ الكنيسه

المتحف القبطي

جنب الكنيسه المعلقه هتلاقي المتحف القبطي و سعر التذكره ب 10 جنيه للمصريين. وتذكرة التصوير ب 50 جنية داخل المتحف للقطع الأثرية 
لكن فى بهو جميل جدا لما بتخلص زيارة ده هتطلعوا أحلى صور فى المكان دة 
فى المتحف هتلاقي كل حاجه خاصه بالتاريخ القبطي من القديم الي الحديث. وطبعا زيارة المتحف فى وجود مرشدين بيبقى الموضوع مختلف تماما

هتطلع بعد كدة على المعبد اليهودي

و ديه برده مجانا و هتلاقي راجل هناك ممكن تخليه يشرحلك المعبد ده مجانا. 

أخيرا بقى مع مسجد عمرو بن العاص

ادخل المسجد ده و اتفرج علي طراز المساجد بتاعه زمان و طبعا مينفعش تدخل بشورت او ملابس ضيقه و هناك في زي اسدال بتاجره من المسجد و بترجعه و انت خارج ده بالنسبة للبنات 
كده انت عملت رحله ب 12 جنيه و زوذ عليهم 2 جنيه تذكره المترو رجوع و يبقي كده كله 14 جنيه بالظبط


مواعيد الزيارة من ١٠ صباحا حتى ٤ عصرا 

 

المصدر : صفحة افضل اماكن الفسح والخروج فى مصر