الدليل التاريخي لكيفيه الحصول علي تأشيرات بلاد امريكا الجنوبيه
فى البداية لازم نفتكر ان :
انواع التأشيرات في اي مكان في العالم 4 انواع
* بلاد بدون تأشيرة
* بلاد بتأشيرة اونلاين
* بلاد بتأشيرة عند الوصول
* بلاد بفيزا مُسبقه من السفاره
----------------------------------------------------------------
اولا : بلاد بدون تأشيرة :
الاكوادور : هي البلد الوحيدة اللي بدون اي فيزا للمصريين في امريكا اللاتينيه , لما بتوصل هناك بتاخد ختم دخول لمدة 3 شهور
---------------------------------------------------------------
ثانيا : بلاد بتأشيرة عند الوصول :
بوليفيا : هي البلد الوحيدة اللي بفيزا عند الوصول للمصريين في امريكا اللاتينيه , لكن لازم لازم لازم تدخل من منفذ دولي مش بري يعني لازم تسافرلها طيران , وبتدفع 50 دولار عند الوصول وبتاخد ختم صلاحيه شهر
----------------------------------------------------------------
ثالثا : بلاد بفيزا اونلاين
كوبا : البلد الوحيدة اللي في لاتين امريكا والكاريبي اللي بتدي الفيزا عباره عن ورقه خارجيه مبتطبعش ابدا علي الباسبور وبيسموها Tourist Card وبتبقي ب 105 يورو
وحتي ختم الدخول والخروج بيبقي علي الورقه دي
بتملي الابلكيشن علي موقع السفارة وتروح بنفسك مقابله مع قنصل وسهله جدا وبتطلع بعد اسبوع
وفي شركات سياحه بتتعامل مع السفاره مباشره بتجبهالك وانت قاعد في مكانك ابقي اسأل عليهم جنب السفاره
---------------------------------------------------------------
رابعا : بلاد بفيزا مسبقه من السفاره :
عشان بس منكررش الكلام والناس تزهق .. الورق المطلوب لباقي البلاد بيكون متكرر ومعروف بيختلفوا فقط اختلافات بسيطه عشان كدة هكتب الاول الورق العام المتكرر ده عشان تحت في التفاصيل لما نكتب كلمه " الورق العام " تبقي خلاص عرفت احنا بنتكلم عن ايه بدون تكرار
الورق العام لاي فيزا في اي سفاره لامريكا الجنوبيه من مصر :
1- كشف حساب بنكي لاخر 6 شهور مع حركه سحب وايداع
2- اتش ار ليتر من شغلك لو موظف .. شهادة قيد لو طالب .. سجل تجاري لو صاحب عمل
3- حجز فندق مبدئي
4- حجز طيران مبدئي
5- باسبور ساري صالح لمدة 6 شهور او اكثر ويكون فيه صفحتين فاضيين و صورة منه
6- صورتين 4 في 6 وتكون صور حديثه
7- ابلكيشن الفيزا بتملاه من موقع السفاره وبعدين تطبعه
8- تترجم كل الورق للاسباني
----------------------------------------------------------------
1- بيرو :
نفس الورق العام باستثناء
* كشف الحساب البنكي لاخر 3 شهور فقط
* لازم تجيب فيش جنائي ليك criminal record وتترجمه اسباني
بس السفاره دي غريبه حبتين في الاجراءات .. ازاي يعني ؟
بيشترطوا انك اصلا تبعت ميل للسفاره الاول علي الايميل دة : conpercairo@gmail.com عشان يبعتولك الاوراق المطلوبه ولما تجهز الاوراق تعملها سكان كوبي وتبعتهالهم تاني علي نفس الميل
وبعد كدة بيحددولك معاد انترفيو ولكن الانترفيو بيكون في التليفووون .. فلازم تكون بتعرف تتكلم انجلش عشان تعرف ترد علي الاسئله في التليفون
وبعد المكالمه دي ب يوم او يومين هيكلموك تاني .. لو وافقوا علي ورقك هيدوك رقم حساب في البنك عشان تروح تدفع فيه 30 دولار ثمن رسوم الفيزا ودي من مميزات فيزا البيرو انك مبتدفعش اي مليم الا لما يوافقوا علي الفيزا
وبعدين تروح السفاره بنفس الورق الاصلي بقي اللي عملته سكان كوبي عشان يطبعولك الفيزا و بتستلمها بعد يومين عمل فقط والتأشيرة بتطلع بصلاحيه سنه كامله ومدة اقامه 6 شهور
----------------------------------------------------------------
2- تشيلي :
نفس الورق العام باستثناء
* كشف الحساب البنكي لاخر 3 شهور فقط
و الاجراءات تقريبا زي سفاره بيرو بس باختلافات بسيطه
هتبعت الاول ايميل ل سفاره تشيلي اللي هو دة : cchile.cairo@minrel.gob.cl وهيردوا عليك بالاوراق المطلوبه عشان تبعتها كوبي علي الميل
وبعدها هيحددوا اذا كنت محتاج انترفيو شخصي فيس تو فيس في السفاره ولا لأ
والاجراءات بتاخد شهر
رسوم الفيزا 30 دولار لو سنجل انتري .. و 50 دولار لو مالتي انتري .. ولو اترفضت بيتختملك علي الباسبور بالرفض
-------------------------------------------------------------------------
3- الباراجواي : السفاره الوحيدة اللي طلباتها مختلفه تماما عن اي سفاره تانيه في امريكا اللاتينيه
محتاج باسبور ساري
و صورتين 5 في 5 خلفية بيضة ،
و فيش و تشبيه
كشف حساب بنكي لاخر ١٢ شهر
خطاب من جهة العمل
وثيقة تأمين صحي
صورة من شهادة الميلاد
صورة من البطاقة
شهادة صحية للحالة النفسية و البدنية من مستشفي حكومي مصري مختومة
حجز فندق
حجز طيران
خطاب دعوة مرسل من حد مقيم في البراجواي
طبعا لازم كل الورق ده يترجم اسباني
و مصاريف الفيزا حوالي ٧٠ دولار
------------------------------------------------------------------------
4- البرازيل :
نفس الورق العام باستثناء
* الاوراق بتترجم انجليزي عادي مش برتغالي
* رسوم الفيزا 80 دولار
* الابلكيشن هنا مختلف تماما عن اي سفاره لانك بتملاه ع النت من 5 صفحات زي فيزا امريكا بالظبط
* السفارة في ابراج النايل سيتي كورنيش النيل ولو اترفضت بيتختملك علي الباسبور بالرفض
--------------------------------------------------------------------
5- الارجنتين :
نفس الورق العام باستثناء
* لازم تأمين سفر يغطي مدة السفر بتاعتك
* وجود دعوة من مواطن ارجنتيني أو دعوة من مؤسسه تجاريه او مؤتمر ..
لو الدعوة من مواطن ارجنتيني هتدفع 150 دولار فقط رسوم تأشيرة
لو الدعوة من مؤتمر او مؤسسه تجاريه هتدفع 200 دولار رسوم الـتأشيرة
----------------------------------------------------------------
6- الاوروجواي :
الورق العام + رسوم الفيزا 700 جنيه ( كانت 370 قبل التعويم ) .. لكن اسؤا حاجه فيها ان التأشيرة بتاخد 3 شهور كاملين عشان تطلع يعني اللي يقدم عليها يكون فاضي و معندوش مصالح بالباسبور عشان الباسبور هيركن في السفاره 3 شهور فأكثر
التاشيره بتديك فتره اقامه فى البلد لمده 3 شهور بشرط السفر فى خلال 60 يوم تعد من يوم استلامك التاشيره
----------------------------------------------------------------
7- كولومبيا :
نفس الورق العام + رسوم الفيزا حسب نوعها ( في انواع كثير منها v vistor visa ) وبتتراوح ما بين 80 أو 140 أو 340 دولار
ودة الموقع بتاع السفاره http://www.cancilleria.gov.co/…/procedures_s…/visa/v-tourism
--------------------------------------------------------------------
تم حظر اننا نتكلم عن فنزويلا لان حاليا من اخطر بلاد العالم في انك تزورها وعليها حظر امني وسياسي لدخول الاجانب عشان كدة مش هنتكلم عنها في الشرح
المصدر : صفحة Traveller Experience
