هننقلكم من خلال المقال دة تجربه شخصية جدا لولادة طفل في امريكا وازاى الابن اخد الجنسيه وازاى دة بيكون فرصه للوالدين في المستقبل ان هما كمان ياخدوا اقامه و جنسيه
والموضوع المره دي هيكون بأحدث Updates وكل خبايا الموضوع و هل فعلا الميدكيد بيأثر علي تجديد الفيز ولا لأ ؟
وهل ظباط الهجره بيشوفوا فواتير المستشفي ولا لأ
وازاي تسافر من مصر و الاجراءات اللي تعملها هنا و في امريكا ؟
وكمان تفاصيل المصاريف كامله؟
كل دة هنجاوبك عليه بالتفصيل
---------------------------------------------------------------
اولا: الولادة في امريكا بتدي المولود ( اي مولود ) الجنسيه الامريكيه فورا حتي لو كنت جاي بفيزا سياحه
وبتدي الابن دة الحق انه يقدم لأهله علي لم شمل بعد ما يتم هو 21 سنه و الاجراءات بتقعد حوالي 3 سنوات عشان ياخدوا جرين كارد ثم الجنسيه
ترامب كان حاول ف بدايه السنه انه يمرر قانون ان اي حد اتولد ف امريكا بفيزا سياحه مش من حقه انه يقدم لوالديه علي لم شمل وانه يادوب يقدم لمراته او اطفاله فقط في المستقبل ..
بس طبعا الكونجرس مقبلتش القانون .. ويبقي الحال علي ماهو عليه
------------------------------------------------------------------
عشان تولد ابن في امريكا انت محتاج حاجتين
1- فيزا سياحه
2- تأمين طبي ( ميدكيد ) أو تدفع مصاريف المستشفي كاش
-------------------------------------------------------------------
1- فيزا السياحه
كلنا عارفين ان فيزا السياحه لأمريكا ملهاش اي مقياس
بس نصيحتنا هنا ان امتي تقدم عليها ؟ في اول شهور الحمل .. يعني اول لما تعرف ان مراتك حامل تقدم علي فيزا سياحه
عشان حتى لما تدخلوا المقابله مع القنصل ميحسش ان بطنها كبيرة وانها رايحه عشان تولد بس
------------------------------------------------------------------
2- الميدكيد أو الميدكير
لو انت رايح علي اساس انك متدفعش اي حاجه وتولد ببلاش فبنسبه 99% تأشيرتك هتتكنسل لما ترجع
وهنا الناس نوعين
* في نوع يقولك مش مهم انا رايح لخطه ومهمه محدده .. وهي ان ابني ياخد الجنسيه .. مش مهم بقي الفيزا بتاعتي انا و ومامته تتلغي أو لأ .. منا خلاص ساعتها هكون حققت ال انا عايزة وهدفي اتحقق وهو ان ابني خد الجنسيه .. دة نوع من الانواع ..
نوع تاني يقولك لا انا برضه عايز اتفسحو كمان تبقي الفيزا ساريه لو حصلت هنا في الامور امور نخلع فورا علي هناك ..
اهو تفضل معانا الفيزا احسن فهندفع فلوس المستشفي كلها
حدد انت انهي نوع وعلي اساسه انطلق
------------------------------------------------------------------
لو انت من النوع الاول عندك حاجه من الاثنين
1- تستخدم حاجه اسمها emergency care وده للناس اللي معاها فيزا سياحة وده كفيل يغطي مصاريف الولادة
ببساطه اول لما تحس ان مراتك هتولد هتتصل بالاسعاف عشان يودوها المستشفي وبتولد من غير ما تدفع اي مليم
2- انك تعمل حاجه اسمها ميدكيد ودة تأمين طبي للام والابن وبيغطي كل مصاريف تحاليل وتكاليف الولادة
في ولايات كثير بتعمل الميدكيد للناس ال معاهم فيزا سياحه
وبعد ما ابنك يتولد بتكلم المستشفي عشان يطلعولك حاجه اسمها zero balance تثبت ان مش عليك اي مليم من الولادة دي
* في نوع من الناس بيحب يروح لمحامي عشان يستخرجله كارت الميديكير او الميديكيد باثبات اقامه غير حقيقيه ( كأنه معاه جرين يعني ) .. مصاريف الموضوع ده وصلت لحوالي ٤٠٠٠ دولار، وبنسبة ٨٠% الموضوع بيتكشف بعد حوالي ٦ شهور والمديونيه بتاعت الولاده بتتربط على حساب الأم وبتنزل بعد كده international collection وتوصل السفاره هنا في مصر وطبعا بيترفض تجديد التأشيره الا بعد الدفع، والمبلغ ساعتها بيتضرب في ٢، علشان الفوايد ومصاريف التحصيل الخ ...
----------------------------------------------------------
لو انت من النوع اللي عايز يدفع مصاريف المستشفي كامله فركز معانا شويه
اقل مصاريف للولاده كاش في الساحل الشرقي حوالي 6000 ل 8000 دولار شامله المستشفى بإقامه ليلتين والدكتور والتخدير ودكتور الاطفال.
و مصاريف الاقامه في نيويورك وضواحيها ماتقلش عن ١٥٠٠ دولار في الشهر ودي في الغالب اوضه بحمام ومطبخ ان وجد.
----------------------------------------------------------
ثانيا :مراتك تسافر من مصر وهي في الشهر الكام ؟
في بدايه الثامن .. اول اسبوع ف الثامن تتكل علي الله وتروح .. وطبعا يكون معاها تقرير طبي عشان بعض شركات الطيران بتمنع ركوب الحوامل بدون تقرير طبي
واهم حاجه لو ظابط الجوازات في الدخول قالها انتي جايه عشان تولدي تقول ايوة ومتكدبش وهو كدة كدة هيدخلها
--------------------------------------------------------------
ثالثا : بعد الولادة ايه الإجراءات عشان اطلع الباسبور الامريكي لأبني ؟
المستشفي بتبعتلك واحدة عشان تسجل كل المواليد ال اتولدوا عندها وبتديك ورقه تملي فيها كل بياناتك وبيانات الام والاسم ال اختارتوه للولد
ويبعتوه ل نوتر عشان تطلع شهادة الميلاد .. ومدة استخراج شهادة الميلاد حسب الولايه
في ولايات بتصدرها بعد شهر وولايات تانية بعد اسبوع ولما بتطلع بتروحي النوتر دة ( زي السجل المدني عندنا ) وتاخد الشهادة دي
بعدين تشوف موقع مركز اصدار الباسبور في الولاية اللي مراتك ولدت فيها وتملي كل البيانات وبعدين بيحددولك معاد بالتليفون عشان تروح انت و مراتك وابنك و تصور ابنك صورة بمواصفات معينه هما هيقولوهالك ولما تروح هتحلف القسم وبعدين الباسبور بيطلع في خلال من اسبوعين ل شهر
--------------------------------------------------------------
طيب انت ولدت ابنك وعايز ترجع هيحصل ايه ؟؟
دي اهم نقطه، بنسبة ١٠٠% لو راجع على طيارة مصر للطيران من نيويورك، ضباط الهجره والجنسيه واقفين يوميا (يوميا يعني يوميا) على باب الطياره وكل شغلتهم الاسر اللي معاهم اطفال من اول حديثي الولاده لغاية ٨ سنين (مولودين في امريكا)،
لو مالقاش الام والاب او احدهما معاه جرين كارد او باسبور امريكي، بيسأل سؤال واحد، فين مستندات دفع مصاريف الولاده؟ وطبعا لما مابيكونش معاهم مستندات او المستندات ناقصه او مش واضح فيها انهم دافعين بالكامل وماعليهمش اي فلوس، بيشطب على التأشيره بنفسه وفي ساعتها بالفلوماستر ويكتب عليها CANCELLED
وياخد بصمات صاحب الباسبور ويقوله انت ممنوع من دخول امريكا لغاية ما طفلك يوصل ١٨ سنه ويديلك جرين كارد
ف علشان تفادى اى مشكله الاحتياط واجب علشان متفقدش التأشيرهارجع ع اى حاجة غير مصر للطيران على التركيه كونكشن اسطنبول مثلا ،هتضمن وقتها ان الامور مشيت تمام
-----------------------------------------------------------------
المصدر : صفحة travel secret club
