قضى احلى ايام فى كرواتيا وتعرف على اهم الاماكن السياحية فيها

فى المقال هنجاوبك على 
1- لية تروح  كروتيا بالاخص ؟
2- معلومات سريعة عن كرواتيا والعملة المحلية للبلد
3- استخراج الفيزا
4- الطيران والفنادق واسعارهم
5- المواصلات الداخلية والاكل والشرب واسعارها 
6- الاماكن اللى ممكن تتزار فى كرواتيا
 

1- لية تروح كرواتيا بالاخص ؟ 

**الرقى والامان
كرواتيا هى من انضف بلاد اوروبا الشرقية " اوكرنيا سلوفنيا . . الخ " سواء كانت ثقافة او معاملة الناس والامان وعدم وجود العنصرية 
فهى واخدة ثقافة اوروبا الغربية والناس راقية جدا  ومش قايمة على الدعارة او المخدرات او الملاهى الليلية زى معظم اوروبا الشرقية

**الاسعار
كرواتيا اسعارها رخيصة مقارنة ببلاد اوروبا الغربية " فرنسا المانيا ايطاليا .. الخ "
 

**المناخ
مناخها معتدل وحلو جدا مش سقعة اوى ولا حر اوى 
واحسن فترة ممكن تسافر فيها شهر 9 او 10 الاسعار والطقس بيكونوا افضل حاجة فى السنة

**المناظر الطبيعية 
هتزور فيها اجمل اماكن عشان الطبيعة هناك بكر و المدن فيها راقية وشوارعها جيدة جدا
**الفيزا سهلة مقارنة ببلاد الشنجن ومافهاش تعقيد
اغلب الناس بتفهم انجليزى والمانى يعنى مش هيقابلك مشكلة فى اللغة..

2- معلومات سريعة عن كرواتيا 
 

هى دولة من دول الاتحاد الاوروبى وليس الشنجن " يعنى الفيزا بتاعتها ليها هى بس مش لدول الشنجن
اغلب سكانها من النساء ودة لان متوسط سن النساء هناك 81 سنة والرجال 74 سنة
متستغربش لما هتشوف اغلب سواقين الترام والباصات ستات واغلب الاماكن شغال فيها الستات
البلد كلها 4 مليون فأنسى الزحمة والمرور والكلام دة هناك.. 
"حاجتين مهمين اوى" 
الناس مش بتنام بدرى اوى زى المانيا مثلا فالمحلات هناك شغالة لحد 9 وساعات 10 بليل وفى اماكن للاكل بتشتغل طول الليل عادى بس دة فى العاصمة والاماكن السياحية بس
اما من حيث العملة عملتها الكونا ودى ب 3 جنية تقريبا
 

3- الاوراق المطلوبة لاستخراج الفيزا 
 

لو معاك فيزا شنجن مالتى انترى سارية مش بتحتاج فيزا لكرواتيا ودى ميزة حلوة
اما لو مش معاك

**دى الاوراق المطلوبة  ..زى اغلب الدول:
- شهادة تحركات لحسابك البنكى لمدة 3 شهور ويكون حسابك فية ما يعادل 150$ عن كل يوم هتقعده هناك
- لو شغال وثيقة من الشغل تثبت عملك في شركتك او لو صاحب عمل يبقي  سجل وبطاقة ضريبية و لو طالب يبقي  شهادة من الجامعة " لو عاطل الموضوع هيكون اصعب شوية "
- حجز فندق وطيران رايح جاى مبدأى "يفضل يكون مدفوعين ومؤكدين طبعا لو ينفع "
- تأمين سفر فى شركة كويسة
- صورة معداش عليها 3 شهور 
- طلب الاستمارة مملى 
- صور لكل الفيز القديمة والاختام اللى فى الباسبور 
- وفى الاخر لما يتأكدو ان الورق كامل هتحط ايصال دفع قيمة الفيزا
التقديم على الفيزا بيكون عن طريق المكتب دة http://www.vfsglobal.com/croatia/Egypt/Tourist.html
ومش بتحتاج لمعاد قبلها لحد دلوقتى
سعر الفيزا 67$ + حوالى 600 ج مصاريف للمكتب
 

4- اسعار الطيران والفنادق في كرواتيا 
 

*- الطيران رايح جاى لو حجزت قبلها بفترة كويسة هيكون بحوالى 280 $ على الاقل 

مع العلم ان مافيش طيران مباشر لهناك لازم ترانزيت
وبنصح تدور فى الموقعين دول لاى طيران
https://www.skyscanner.net
https://www.airtickets24.com

- متوسط ساعات السفر للوصول لكرواتيا 11 ساعة شاملة الترانزيت

*-الفنادق و الاستديوهات
فى اغلب الاحيان بتتراوح بين 100 ل 300 كونا يعنى " 300 ج ل 900 ج " وبيبقى فيها حمام خاص بيك ولوحدك وفيها تكيف ومكان ممتاز
دور فى 
www.airbnb.com
www.booking.com
وبالنسبة للاماكن السياحية بتكون فى نفس السعر فى اوقات غير المواسم لكن فى المواسم السعر بيوصل ل 300 يورو واكتر فنبعد عن شهر 6 و7 و8
 

5- المواصلات الداخلية والاكل والشرب واسعارها في كرواتيا 
 

الدنيا هناك مش غالية طبعا مقارنة بأوروبا

فمثلا ممكن تركب الباص من المطار للسنتر بيجى كل نص ساعة ب 30 كونا " 90 ج " شامل نقل كل حاجتك
اما المواصلات الداخلية الترام ب 4 كونا والباص حسب المكان اللى هتروحه بس الاغلب مش غالى والمواصلات هناك نضيفة جدا ومش زحمة غالبا
الاكل والشرب فى متناول الجميع وفى مطاعم تركية وحلال هناك فى العاصمة اما فى المدن التانية حاول تاكل فراخ بس "بالنسبة للمسلمين "
ممكن تاكل اكلة كويسة جدا ب 50 كونا واكل الشارع ب 7 كونا وانتا طالع
اما الشاى هناك بيبدأ من 6 كونا ل 11 كونا " 18 ج ل 33 ج " يعنى ارخص من بعض الكافيهات فى مصر
وبردو نبعد عن الاماكن السياحية ياريت

 

6- الاماكن اللى ممكن تزورها فى كرواتيا 

 

الاماكن كتير جدا بس اول حاجة ننصحك بيها انك تروح فى اوقات غير المواسم 
 
1- االعاصمة زاغرب 
مليانة متاحف وهى مدينة صغير مقارنة بالقاهرة تقدر تلفها كلها فى 3 ايام بحد اقصى ودى اهم الحاجات فيها

** Gornji Grad and the Church of St. Mark's ودى كنيسة مشهورة 

** Zagreb Cathedral and Treasury بردو كنيسة جميلة جدا من جوة وبرة
تتمشى بقى فى المدينة وتشوف 

** The Art Pavilion and the Meštrović Gallery

** The Croatian National Theatre 
ودى مبانى اثرية شكلها تحفة 

** Maksimir Park ودى حديقة عامة وفيها حديقة حيوان صغيرة بس جميلة 

**Zagreb Botanical Garden حديقة تحفة بمعنى الكلمة روعة فى الجمال
 
2- زادر " دى مدينة ساحلية عاملة زى الاسكندرية كدة "
ممكن تلفها فى 3 ايام بردو

** City Walls and Gates  المكان دة مليان اماكن اثرية كتير وجميلة فعلا 

** St. Donatus’ Church من اشهر الكنايس هناك 

** Sea Organ و Greeting to the Sun Word ودة مكان روعة موصلين الات موسيقية بتعمل موسيقا بامواج البحر + مكان بيعمل الوان بالطاقة الشمسية

**الكورنيش هناك بجد روعة ومش هننسى الشواطئ هناك رخيصة واغلبها ببلاش
 
3- دة اهم مكان لازم تروحها  دى محمية طبيعية حاجة كدة تحفة 
** Plitvice Lakes National Park

فى النهاية هتكون قضيت حوالى 8 ايام قمة فى المتعة والاسترخاء
--------------------------------------------------------------------------------------------------------------------
 
المصدر : Travel Secret Club