استراليا من الدول القويه جدا اللى فيها فرص العمل كتير بمعدل دخل عالى جدا

عايز تهاجر استراليا باي طريقه ؟؟ يبقي المقال دة هيجاوبك عن حاجات كتير فى دماغك
وعشان موضوع الهجره لاستراليا طويل جداا .. فأحنا هنحاول نتكلم عن اهم النقط وازاى تبدأ 
 
------------------------------------------------------------
هجره استراليا بنظام النقط ..فكرتها زي الجمعيه كدة بتفضل تحوش القرش علي القرش عشان في اخر الشهر تجمع مبلغ وتقبض الجمعيه 
اهو هجره استراليا كدة بالظبط بس بدل فلوس الجمعيه بتكون نقط .. بتفضل تحوش النقطه علي النقطه لغايه لما يبقي معاك اكبر عدد من النقط اللي يسمحلك انك تهاجر..  
------------------------------------------------------------
عشان تهاجر استراليا لازم تعمل 4 حاجات :

1- يكون وظيفتك أو مهنتك اللي بتشتغلها في مصر مطلوبه اصلا هناك في استراليا 
2- تجمع الحد الادني من النقط عشان تفتح ملف علي موقع الهجره 
3- تمتحن ايلتس عشان تثبت ان لغتك الانجلش قويه 
4- تعادل شهادتك بتاعه مصر عشان تعرف تشتغل بيها في استراليا
يعني هما 4 خطوات ( وظيفه مطلوبه + لغه + معادله + تجميع نقط ) 
----------------------------------------------------------------------
طيب ايه المطلوب واحسب النقط بتاعتي ازاي وايه اقل حد من النقط عشان اهاجر ؟؟

1- لازم تكون مهنتك من المهن المطلوبة في استراليا

طب وانا بعرف مهنتي مطلوبه منين ؟؟
بتدخل الموقع دة فيه  قوائم المهن المطلوبه
https://www.border.gov.au/…/skilled-o…/combined-stsol-mltssl

وقوائم الوظائف اتعدلوا ل قائمتين :
the Medium and Long-term Strategic Skills List .. MLTSSL
the Short-term Skilled Occupation List ... STSOL
-------------------------------------------------------------------

طيب مهنتي مطلوبه اعمل ايه ؟

2- تبدا تعرف تقسيمه النقط عشان تحسب انت هتجيب كام نقطه

عشان تعرف تحسب النقط بتاعتك ادخل علي الموقع دة 
https://www.migration.tas.gov.au/points_calculator

وبردو احنا هكتبهملك بالعربي عشان نوفر وقتك 
 
1- نقط السن
لو سنك اقل من 24 تاخد 25 نقطة
لو سنك من 25-32 تاخد 30 نقطة 
لو سنك من 33-39 تاخد 25 نقطة 
لو سنك من 40-44 تاخد 15 نقطة 
لو سنك اكبر من 44 تاخد صفر نقطة بشرط متعديش 50 سنه 
 
2- نقط الشهادة
بكالريوس او اي شهادة اعلي منها واقل من الدكتوراه تاخد 15 نقطه 
يعني لو بكالريوس او ماجستير تاخد 15 نقطه 
لكن لو معاك دكتوراه تاخد 20 نقطه 
لو معاك دبلوم تاخد 10 نقط 
 
وهما بياخدوا اعلي شهادة ليك يعني لو معاك ماحستير ودكتوراه هياخدوا نقط الدكتوراه بس
ولازم تعادلها لانها غير معترفه بيها في استراليا والمعادلة بتكون اما تقييم او امتحان ودي بتفرق على حسب الوظيفة بتاعتك 
 
المعادله اسمها skill assessment ودي معادله تقييم للمهارات ومش اكاديمك بس زي بتاعه كندا يعني مش بس هتقيم للمؤهل لا كمان ل سنوات الخبره او امتحانات بتعملها الخ 
 
طيب اعادلها منين وايه التفاصيل بتاعت المعادله ؟؟
في 10 جهات تعادل وتقييم فيهم مهنتك بتقدر تعرفهم من الموقع دة
https://www.border.gov.au/…/Skills-assessment-and-assessing…
 
طب افرض انا بشتغل في حاجه تانيه غير اللي درستها 
يعني انا خريج طب اسنان لكن بشتغل شغلانه غير الطب اعمل ايه ساعتها ؟؟ وأقيم الشهادة ازاي ؟؟ 
عادي، تقييم المؤهل لازم كده كده يتعمل عشان مش هتعرف تعمل بروفيل من غيره. الوظيفه بقي انت بتقدم علي النوك اللي ليك خبره فيه بغض النظر عن المؤهل
يعني المؤهل بيتقيم وتاخد عليه نقط حسب هما حسبوه كام سنه، بالنسبه للوظيفه بتقدم علي نوك وظيفتك وتجيب شهادة خبره تاخد عليها نقط حسب كام سنه 
 
ولكن عشان محدش ينصب عليك ويعملك البحر طحينه 
استراليا بالذات لو التقييم للشهادة بعيد عن مؤهلك الاصلي اللي انت اتخرجت بيه بيقلل من نقطك جدا عكس كندا
 
3- نقط سنين الخبره
لو خبرتك 3 سنين تاخد 5 نقط 
لو 5 ل 7 سنين تاخد 10 نقط 
لو 8 سنين تاخد 15 نقطة
لو من 8 ل 10 سنين تاخد 20 نقطة
 
4- نقط اللغه
الامتحانات المعترف بيها في استراليا يأما ايلتس او بي تي اي
استراليا اقل اسكور بتقبله للايلتس 6666 في كل فرع مش توتال .. لو جبتهم مبتخدش ولا نقطه 
لو جبت 7777 في كل فرع بتاخد 10 نقاط 
لو جبت 8888 في كل فرع بتاخد 20 نقطة
 
5- نقط المرافق او الشريك 
المتقدم الاساسي بياخد 5 نقط من الشريك لو الشريك وظيفته موجودة مع المتقدم الاساسي فى نفس القائمة ويقيم شهاداته زيه بالظبط 
ويكون الحد الادني من الايلتس هو 6666 ويسافر معاك 
 
**طب ازاى اعرف ان المهنه موجوده على قائمه المهن المطلوبه على الموقع الرسمى؟
الموقع الرسمى صعب التعامل معاه شويه لذلك فى مواقع هتساعد فى الموضوع مواقع دقيقه جدا جدا وثقه هتدخل تكتب الوظيفه فى خانه البحث علشان تعرف المهنه موجوده والجهه اللى هيتم فيها التقييم ايوه التتقيم للشهاده والخبره يعنى ايه الكلام ده؟
هتدخل على رابط من الاتنين دول.
https://www.anzscosearch.com/search/
http://deltaimmigration.com.au/
 
وتكتب المهنه اللى بتشتغلها بتطلع المهنه ومعاها كود للمهنه نفسها طبقا لقائمه الوظايف على الموقع الرسمى للهجره وكل مهنه ليها جهه مختصه ومعترف بيها من الحكومه الاستراليه الجهه دى بتسجل عليها وبتبعتلهم شهاداتك الدراسيه وشهادات الخبره وتدفع الرسوم وبعدها بيبعتولك تقرير التقييم اللى بناء عليه بيتم احتساب النقاط فى البند ده وطبعا زى ماقولنا كل وظيفه وليها جهه تقييم خاصه بيها.

فى قايمتين للمهن المطلوبه فى استراليا زى ما قولنا فوق  وهما مهن مطلوبه على المدى الطويل وهى المهن المطلوبه بكتره فى استراليا ودى فى الغالب بتكون مؤهل لفيزا 189 اللى هى افضل واسهل فيزا لاستراليا.
وفى مهن تانيه لاتصلح مع الفيزا 189 وبتكون مؤهل لقيزا 190 او فيزا 489 ودى بتحتاج شروط زياده شويه زى ترشيح المقاطعات او عرض عمل من استراليا.

يعنى معنى كدا عشان تهاجر استراليا للعماله المهره عندك 3 انواع فيزا هما 190 و189 و489 

اختيارك لنوع الفيزا بيديك نقاط 
فيزا 189 مش هتاخد منها ولانقطة
فيزا 190 محتاجة ترشيح ولاية فعشان كدة بتديك 5 نقط
فيزا 489 بتديك 10 نقط 
 
لو حسبت كل النقط دي ولقيت نفسك مجمع 60 نقطة تقدر تفتح بروفايل علي موقع الهجره وتهاجر 
دة الارضي بتاع اي مهنه باستثناء المحاسبه الارضي بتاعها 65 وساعات 70 حسب العرض والطلب 
 
طب مهم جدا نركز على المهام الوظيفيه المقبوله لكل وظيفه
طبعا انت عارف مهنتك اسمها ايه ، كل مهنه بتكون مكتوبه بالاسم مع كود للمهنه واحيانا بيكون فى اختلاف طفيف فى اسم الوظيفه مابين المهنه الحاليه واسم المهنه على الموقع. 
على سبيل المثال المهنه دي موظف فى العلاقات العامه بتلاقى المهنه ليها اكتر من شكل وكلهم واحد 
Public Relations Professional 
Public Relations officer
بعد فتح الموقع والضغط على مفتاح بحث هتكتب المهنه فى مستطيل البحث كما فى الصوره  التالية:

 

 


بعد كتابه المهنه ووجودها مع كود الوظيفه بكده المهنه بتكون موجوده على قايمه المهن المطلوبه وظهور جهه التقييم وخلينا ناخد مثال علشان نفهم اكتر  وليكن المثال على مهندس كيميائى.
زى ماهو باين فى الصوره اللى جاية وجود المهنه على قايمه الوظايف بكود 233111 وجهه التقييم هى EA


 

بعد كده بتدخل تراسل جهه التقييم المناسبه لوظيفتك بمجرد الضغط على المربع الصغير بتاع جهة التقييم بتتحول مباشره على الجهه لمعرفه متطلبات وشروط تقييم الشهاده وشهادات الخبره وبنكمل المثال لمهندس كيميائي ده رابط جهه التقييم.
https://www.engineersaustralia.org.au/

نصايح هامه جدا جدا
بعد ظهور المهنه وكود المهنه الموقع بيديلك جهه التقييم وانواع الفيزا المتاحه للمهنه ومعلومات كتير اهمها المهام الوظيفيه المطلوبه فى المهنه دى اللى حضرتك هتكتبها فى السي فى وشهادات الخبره علشان تاخد على درجات التقييم زى ما فى صوره دى :


 

كمان بيديلك مسمى تانى لنفس المهنه.
بكده نكون شرحنا بطريقه بسيطه موضوع التقييم يارب يكون واضح للجميع

-----------------------------------------------------------------
طب بعد كدا نسأل سؤال مهم ..  هي التكلفه هتكون كام تقريبا ؟؟ 
لو فرد لوحدة بطوله من 100 ل 120 الف جنيه 
لو فرد و زوجته و طفلين حوالي 250 الف جنيه 
ودول بدون اي وسيط او مكتب سمسره انت بتدفعهم اصلا لاداره الهجره والخارجيه الاستراليه
----------------------------------------------------------------
طب انا دفعت كل دة وامتحنت انجلش و عادلت شهادة .. و خلاص خدت الفيزا وسافرت 
هروح هناك هلاقي شغل ؟؟
بص انت في استراليا عكس كندا .. في استراليا انت بتكون عامل معادله يعني تقدر تروح تشتغل فورا في مهنتك ولكن في عقبه كبيره هتقابلك اللي اسمها local experience
ان صاحب العمل الاسترالي هيفضل انه يجيب حد عنده خبره في البلد احسن من اللي لسه جاي جديد وميعرفش في نظام البلد ونظام الشغل 
 
وساعتها انت عشان تفهم البلد ف الاول بتشتغل حاجه اسمها survival jobs اللي هي أوبر - كاشير - كول سنتر - مطعم وهكذا عشان تكفي مصاريفك وتظبط وضعك في اول 6 شهور 
 
طيب برضو معرفتش بعد ال 6 شهور هعمل ايه ؟
هتبدا تعرض نفسك علي الشركات ف التخصص بتاعك باقل الاسعار عشان تاخدهم كوبري فقط انه يبقي معاك local experience في مجالك وبعدين بعد ما تبقي خبره تبدا تفرض شروطك عليهم
---------------------------------------------------------------
طيب انا عملت كل دة ونقطي كامله و وظيفتي مطلوبه وكله تمام اعمل ايه بقي ؟؟ 
 

هتكون كدا خلصت المرحله الاولي وتدخل علي المرحله اللى بعد كدة هنحاول نكتبلك اهم الخطوات

هتعمل 4 خطوات كمان : 
1- خطوة expression of interest اللي هي EOI
وده انت بتعمله اون لاين على موقع الهجره في الفيزا اللي انت اختارتها عشان الحكومه الاستراليه تبعتلك دعوة
والمدة اللي هتنتظرها عشان تاخد الدعوة بتكون حسب انت مكمل نقطك ولا مش مكملها وحسب نقطك قد ايه
ودي عايزة شرح طويل اوي هنبقي نشرحها في بوست لوحده 
 
2- بترفع كل الورق بعد ما تكون ظبطه بكل الصيغ اللي هما محددينها و وثقته فى EOI
 
3- خطوة مراجعه اوراقك كامله من ال Case officer المسؤل عنك عشان لو في حاجه ناقصه تعملها 
 
4- تعمل الكشف الطبى والفيش وتاخد الجرانت بعديها
الكشف بتعمله في مستشفيات هما محددينها 
والفيش لازم تعمله من اى دوله قعدت فيها اكتر من 6 شهور وبيكون صالح لمده سنه 
وبعد كدة يبقي معاك الجرانت والفيزا والاقامه الدائمه لمدة 5 سنين في استراليا
 
اسئله سريعه
1- في هجره لاستراليا من غير لغه ؟ مفيش
2- مينفعش اعمل معادله لما اروح هناك واسافر ؟ مينفعش لازم تعملها من مصر
3- ينفع اهاجر وانا صفر خبره ولسه متخرج ؟ ينفع بس تركز  اوى في الايلتس
4- ينفع اخد اقامه استراليا واروح بيها نيوزيلاندا ؟ ينفع طبعا وتشتغل بيها كمان
5- لازم اروح استراليا فورا بعد ما خدت الفيزا ؟؟ لازم تروح في خلال سنه من حصولك عليها
6- المدة اللي اخدها عشان اهاجر قد ايه ؟؟ لو كل حاجه جاهزة تاخد 6 شهور .. لو مش جاهزة تاخد سنه ونص او سنتين

وبكدا نكون خلصنا يارب نكون قدرنا نجاوب على جزء كويس من الاسئلة اللى ممكن اى حد يفكر فيها

المصدر : صفحة Traveller Experience