ازاي الواحد يسافر اوروبا و يسافر بسعر رخيص نسبيا ؟!

طب ايه اللى ممكن تعمله فى هولندا من حيث السكن والمواصلات والاكل 


خلينا نتفق ان السفر الي اوروبا عند ناس كتير ليه دايما ٣ عوائق:

١- ازاي يجيب الفيزا الشنجن
ودى ممكن تعرفها من خلال انك تقرأ المقال دة : خطوات التقديم علي فيزا الشنغن وكيفية الحصول عليها 
 
٢- سعر الطيران العالي ودة اتكلمنا عليه بشكل تفصيلى فى مقال منفصل قبل كدا ممكن تشوفه من هنا : تعرف علي خطوط الطيران الارخص فى العالم 

٣- سعر الاقامه نفسها ودة هنعرفك تعمل ايه عشان تقعد بسعر رخيص وببلاش كمان لو عاوز .. 


المقال دة هيكون بشكل عام للناس اللي مش متجوزه علشان هيكون فيه تنطيط كتير، اللي قادر انه يتنطط ممكن جدا يقضي اسبوع او اتنين في اوروبا في اكتر من دوله مش بس هولندا بتكلفه اجمالية مش هتعدي ال ١٥ الف جنيه مصري. لو مش عايز يتنطط و يقضي الدنيا بشكل مستقر اكتر (خصوصا لو في اسره و كده) المبلغ هيتضاعف

 نبدأ بالطيران ( متوسط تكلفة تذاكر الطيران لمنطقة الشنغن ) :

سعر التذكرة لمنطقه الشنجن رايح جاي بتتراوح ما بين ٥٠٠٠ الي ١٢٠٠٠ علي حسب الوقت والمدينه. لو مثلا هتدخل عن طريق أمستردام، اختار وقت في يوليو او اغسطس و هتتكلف في حدود ٦٥٠٠ جنيه مصري
علشان تدور، عيش علي الموقع ده:
https://booking.travil.io/ar/

تانيا الفيزا ( تكلفة استخراج الفيزا والتأمين الصحي لأي دولة من دول الشنغن ) :

الفيزا بتتكلف في حدود ١٩٠٠ جنية مصري و تأمين صحي في حدود ٦٠٠ جنيه. 
بس مش ديه المشكله، المشكله في الرفض. علشان تضمن قبول الفيزا، التزم بالخطوات ديه:

١- جهز كل الأوراق المطلوبه منك من موقع الفيزا

٢- لما ينطلب منك كشف حساب بنكي، الهدف هنا مش انك تروح تستلف ٥٠ الف من ابوك و تحطهم هناك و تطلع كشف و تسحبهم تاني يوم. الهدف ان يكون في تعاملات كتير علي الحساب بتاعك في اخر ٦ شهور. لو مفيش، اعمل كارت ديبيت و اعمل معاملات كتير قبل التقديم
٣- لما ينطلب منك جواب HR مش تروح تجيب اي جواب من اي مكان عليه اي ختم و خلاص! القنصلية بتعمل مقارنه ما بين المرتب اللي مكتوب في الجواب و الأرقام اللي في كشف الحساب بتاعك 
٤- متجبش تذكره طيران مضروبة علشان أوقات كتير بيدخلوا رقم الحجز في موقع شركه الطيران و يكشفوا
٥- متجبش فندق مضروب. أحجز عن طريق موقع booking و أحجز حاجه قابله للإلغاء و ألغيها بعد الفيزا ما تطلع
6- تقدم itinerary واضحة جدا للرحلة
7- على عكس المشاع, أنت مش محتاج تثبت إن عندك املاك في مصر وكده. لو فعلا عندك شغل مستقر وحساب بنكي عليه معاملات كتير, ده كفاية

وممكن تعرف اكتر عن اسباب الرفض بالتفصيل من خلال المقال دة : اسباب رفض فيزا الشنغن واجراءات التظلم لكل سفارة 

 

طب كده انت صرفت حوالي ٩٠٠٠ جنية مصري لحد دلؤقتى و بقيت في هولندا خلاص. تعمل ايه بقى ؟!

ثالثا بالنسبة للاقامه في هولندا :

عليك و علي الموقع ده:
https://www.couchsurfing.com
ده مش بس هيديلك اقامه ببلاش، لا، و هتتعرف علي ناس من البلد هيدلوك علي أرخص أماكن الاكل و المواصلات حتي الي مابين الدول
بس عمتا السكن: فيه أكتر من اقتراح على حسب الميزانيه:
 
- الفنادق: غالية جدا! اقل حاجة هناك بتخش في 1000 جنية في الليلة. booking هو حبيبك في الموضوع ده
 
-حاجة زي airbnb: ده ممكن تعتبره Uber بتاع الشقق. بيبقي ناس عندها اوضة زيادة بيتاجرها بالليلة وبتبدأ من أول 230 جنية في الليلة.

-حاجة زي couchsurfing: اللى قولنا عليه فوق ده ببلاش! مش هزار, ده 100% ببلاش! ده زي airbnb بالضبط بس الفرق إن بيبقي فيه ناس عارضة إنها تستضيف ناس عندها في البيت (واحيان كتير بتبقي اوضة مقفولة) ببلاش لفتره مش طويله (يعني مش أكتر من أسبوع ولا 10 أيام) في سبيل التعرف على حضارات اخري وكده

رابعا المواصلات في هولندا  :

المواصلات في هولندا كتيرة وأشهرها المترو بسبب ان سعره طبعا رخيص مقارنة بباقى المواصلات ، يعنى هيكلفك حوالى ما بين 12-30 يورو عشان تتنقل في مدن هولندا؛ وإذا كانت المسافة قصيرة ممكن التكلفة تكون أقل من 5 يورو.
لو عاوز مثلا تروح من  أمستردام لمدينة روتردام بالمترو التكلفة هتكون 26 يورو ووقت الرحلة هيكون  40 دقيقة. ومن أمستردام إلى لاهاي التكلفة هتكون 7 يورو فى 50 دقيقة.
فى كمان عندك الدراجات ودى هناك  وسيلة التنقل الرئيسية لأغلب السكان المحليين والسياح واسعار استئجار الدرجات هناك يببدء من حوالي 10 يورو يوميا ( بس خلى بالك فى اماكن مبتسمحش براكبي الدراجات فلازم  تسأل الاول).
ولو انت هلتنقل داخل المدينة بالمترو الموضوع هيبقى رخيص جدا مش هيكلفك الا حوالى 3 يورو.
ملحوظة : ننصح بتجنب التاكسي لأن أجرة أقرب مكان ليك هتكون مكلفة جدا 

 

خامسا بالنسبة للأكل في هولندا واسعارها:

هناك للناس اللي بتاكل أكل حلال بس, مطاعم العرب والمصريين مالية الدنيا. والناس اللي بتاكل أكل عادي, هتلاقي مطاعم من كل شكل ولون. ممكن تاكل واجبات من أول 4 يورو لحد 40. يعني كله موجود.

سادسا  بالنسبة للِشوبينج:

هتلاقى ادامك مشتريات كتير بقي وخصوصا في أدوات التجميل والشامبوهات والكلام ده علشان سعرها بالضبط نص السعر في مصر.
وأي فاتوره قيمتها أكتر من 50 يورو تقريبا  ممكن تطلب من المحل انه يديلك ورق الضرايب علشان أنت سايح وتاخد الضرايب اللي دفعتها (اللي في المتوسط بتبقي في حدود 14% من تمن الفاتوره) وانت مسافر.

 سابعا إيه اللي محتاج تعمله قبل ما تسافر هولندا :

1- لو أنت من بتحب المتاحف يبقى لازم تاخد بطاقة المتاحف السياحية :

بطاقة المتاحف دى  أشهر البطاقات السياحية في هولندا  بتوفرلك فرصة انك تزور المتاحف في أمستردام وخارجها لمدة شهر كامل مع تخفيضات كبيرة بـ 59 يورو بس.
بتقدر من خلالها توصل  لــ 32 متحف في أمستردام وأكثر من 400 متحف في جميع أنحاء هولندا

وممكن تاخدها من الموقع دة :
https://adaminfo.amsterdam.ticketbar.eu/…/museum-card-tour…/

 

2-  تشتري تذاكر كل حاجة من على الانترنت علشان هتكون ارخص بكتير, ودور دايما على التذاكر المجعمه هتكون ارخص بكتير من كل تذكره مفرده. يعني على سبيل المثال:

تذكره مجمعه فيها متحف الشمع, ومتحف التاريخ الدموي والرحلة بالقارب: https://goo.gl/PHN3Y1
تذكره مجمعه فيها ال aquarium والمدينة القزمه: https://goo.gl/dx6XKa

طب إيه اللي محتاج تعمله اول لما توصل: إنك في المطار هتلاقي مكن بيبيع تذاكر مترو و ترام واوتوبيس مكتوب عليه GVB. ده اشتري منه تذكره 3 أيام أو أسبوع (على حسب هتقعد قد إيه) ومش هتندم. ده هيبقي معاك تذكره تركب بيها عدد لا محدود من تقريبا كل وسائل المواصلات في امستردام وهتوفر عليك فلوس كتير جدا!

يعني الخلاصة  لو رحلة فرد واحد,ممكن تروح أسبوع وتتبسط جدا جدا وتدفع بالكتير 12000 جنية. (ده لو اخترت السكن أبو بلاش)
 

دلؤقتى بقى نسيبكوا مع الصور عشان تشوفوا جمال هولندا وحلاوتها 

المصدر : صفحة Traveller Experience