ارخص سعر لتايلاند فى التاريخ بتكلفة 7100 جنيه

طيران ذهاب و عوده = 6400 جنيه 
اقامه لمده 10 ايام = 700 جنيه
يبقى المجموع = 7100 جنيه


طيب ده يتعمل ازاى بقى

احجز طيران القاهره بانكوك ذهاب و عوده على طيران الخليج (جولف اير) 
الذهاب: الاربعاء 25 يوليو 2018
العوده: الجمعه 3 اغسطس 2018
المده: 10 ايام
سعر التذكره ذهاب و عوده بالضريبه: 6400 جنيه
خلى بالك ده سعر النهارده كل يوم الطيران بيغلى زى البورصه.
ودى صورة التذكرة عشان اللى مش مصدق.

احجز بقى هوستيل SiBamboo فى بانكوك لمده 10 ايام / 9 ليالى ب 38 دولار = 700 جنيه فقط 
ده سعر النهارده ممكن السعر يغلى بعد كده اى وقت.


طب دة بالنسبة لحجز الطيران والتذكرة والهوستيل

طب ايه هى خطوات التقديم والاوراق المطلوبة عشان تطلع فيزا تايلاند ؟ 

النظام دلؤقتى بقى عبارة عن ابليكيشن لازم تكتبه أونلاين ومش هيتقبل أي ابليكيشن مكتوب بالإيد
هتدخلوا على الموقع الرسمي للسفارة وفيه الأبليكيشن:
http://www.thaiembassy.org/cairo/en/services/68399-Visa-Application.html

*** الاوراق المطلوبة لاستخراج فيزا تايلاند :
- حجز طيران
- حجز فندق 
- كشف حساب بنكي (يكون لآخر 3 شهور) وفيه حركة كانوا طالبين الرصيد ميكونش أقل من 10000 جنيه مصري للفرد و مش أقل من 30000 جنيه مصري لو للعائلة
- صورة شخصية عادية حديثة 3*4 بخلفية بيضاء (وخلى بالك مش هيقبلوا الصورة لو هيا نفس صورتك على الباسبور) 
- الباسبور طبعا يكون باقي على انتهائه مش اقل من 6 شهور (وصور الباسبور ورقة بياناتك صورتين) 
- صورة الإقامة بالنسبة لغير المصريين المقيمين فى مصر
- ورقة جواب عمل (وبالنسبة لأصحاب الشركات السجل التجاري والبطاقة الضريبية) 
- وبالنسبة للطلبة شهادة قيد من الجامعة ولو عندك معاش استخرج ورقة رسمية بمعاشك.

وطبعا كل الورق لازم يكون انجليزي (وأي ورقة بالعربي لازم تترجمها من مركز ترجمة معتمد)
التأشيرة تقريبا فى حدود 700 جنيه (ممكن أقل أو أكثر بس هى فى الحدود دى).

 

** وعشان احنا يهمنا انك توفر فى سفريتك هنديلك نصيحه مهم هنشرحهالك بالتفصيل :

تايلاند من الدول اللى بترجعلك قيمة الضريبة على القيمة المضافة (ليك كسائح)
من خلال الموقع ده 
http://vrtweb.rd.go.th/index.php/en

تقدر تعرف ايه اللى ليك واللى عليك والشروط المهم يكون المحل اللى هتشتري منه يكون عارض اليافطة دي
"VAT REFUND FOR TOURISTS"

فى نموذج كدة معين اسمه P.P.10 
بتقدمه ده شرط من الشروط وفى الموقع هتفهم كل حاجة وشارح كل حاجة.
وطبعا الفاتورة الأصلية بتقدمها لضابط الجمارك فى المطار (وخلى بالك قبل ما تعمل check-in)

وخلى بالك لو ضابط الجمارك ده رخم هيطلب انه يشوف الحاجة نفسها اللى انت اشتريتها (فنصيحة ابقى جهزهم كلهم فى شنطة واحدة عشان متتعبش وانت بتدور على الحاجة والطلب ده قانوني يعني من حقه).

وفى طبعا حركة كدة لازم تكون عارفها دي هدية مننا ليكوا 

عشان ترجعلك قيمة الضريبة لازم تكون اشتريت من مكان معين بحد أدنى 2000 بات فى اليوم

* معلومة: عملة تايلاند اسمها البات والدولار الأمريكي يساوي تقريبا 35 بات تقريبا

طب يعني ايه فى اليوم ؟ يعني ممكن تشتري حاجة ب 500 بات وترجع تانى فى نفس اليوم تشتري ب 1500 بات كدة يبقى انت ينطبق عليك الشرط وكدة من حقك ترجعلك قيمة الضريبة بس بشرط برده أنك لما تروح بعد
كدة تشتري تانى يكون فى نفس اليوم وتقدملهم الفاتورة الأولى وباسبورك.

بتقدم كل ده وبعد ما تعمل check in وبعد ما تعدي على ضابط الجوازات وتاخد ختم خروج هتروح على المكتب VAT Refund Office وتاخد قيمة الضريبة.
وطبعا خلى بالك عشان كل ده يتم لازم لما تروح تشتري من محل عليه اليافطة الى قولت عليها وبالحد الأدنى اللى قولت عليه لازم تطلب منه النموذج P.P.10 
وتطلب منه فاتورة الضريبة الأصلية وبتقدملوا الباسبور بتاعك.

 

المصدر : صفحة traveller experience & Husam Mokhtar