محتار او لسة ماخترتش تروح فين فى العيد ‬
 
" خلينا متفقين ان اما الواحد بيكون زهقان و بيقول نفسه يغير جو - اول حاجه بتيجي في باله يكون الجو حلو و يكون مكان قريب يعرف الواحد يطلع يومين و يرجع - فبنفكر في العين السخنه مثلا بس الفكره ان الواحد هناك بيروح مش بيلاقي حاجه يعملها خصوصا مش كل الناس بتحب تنزل البحر ..

- طب الحل ايه ؟؟
ممكن نستكشف مكان جديد بنفس المواصفات بس في حاجات كتير ممكن تتعمل زي انك تتسلق الجبال أو تتفرج علي الشلال و تتزحلق علي الرمل  أو تركب فلوكه في البحيره و تاكل الاكل الفلاحي الجميل

- طيب فين الكلام ده ؟؟

كل دة فى الفيوم..  تقدر تنظم يوم مع عائلتك وتروحوا الفيوم وتستمتع بشلالاتها وطبيعتها الجميلة

،ده غير زيارة بعض الأماكن التاريخية هناك زي معبد قارون ووادي الحيتان ، جبل المدورة ووادى الريان وغيرهم… 
طب تعالى نرتب الرحله مع بعض 

 

 

 *لو انت معاك أولاد و عامل حسابك علي بيات فقصادك مكانين للبيات 

في هناك مكان اسمه الواحه:

و ده يعتبر مكان فندقي بس مش 4 او 5 نجوم بس في ملاهي بسيطه لاطفال و المطعم علي البحيره و الغرف نظيفه الي حد ما
و ده الفطار بيبدا ب 25 جنيه و شامل ربع فطير مشلتت و معاه جبنه بالخيار و الطماطم و مش و عسل اسود.

المكان التاني اسمه ذات المسافر:

و ده معمول علي الطراز البدوي البسيط جدا و بيطل علي أراضي خضراء و مفيش خوف علي الأطفال و في ملاهي هناك
اسعار الغرفه بتبدا ب 120 جنيه و طبعا الغرف علي الطراز البدوي البسيط جدا.

 
- ندخل علي المغامرات 

- اول مكان و انت لسه بصحتك هو انك تزور " القرية التونسية "

ودى احلى مكان  للاستجمام والبعد عن التكونولوجيا في قرية منعزلة مابين جمال بحيرة قارون - وسحر الطبيعة - وهدوء الصحراء
القرية مجهزة بكل مظاهر الحياة المتواضعة البسيطة والجميلة 
ويوجد فيها غرف علي اعلي مستوي كشاليهات وغرف اخري بسيطة نظيفة ومرتبة وانا حطيت النوعين في الصور
القرية بتطل علي البحر فتقدروا تعملوا سفريات بحرية وتركبوا المركب او تنزلوا مياه بحيرة قارون الهادئة .. 
القرية مربوطه بالصحراء فتقدروا تعملوا سفاري  ومليانة اماكن خضراء وشلالات للراحة النفسية
هناك هتقدر تنعزل تماما عن الواقع الخارجي وتعيش في واقع اخر وفي قرية كاملة متكاملة وتمشي في شوارعها وتجرب اكلها وتستمتع بموقعها المتميز  مش بس كدا دة مكان مناسب للي حابين يتعملوا خزف وزخرفة وصنع فخار يعني كورس تعليم في مكان رائع يساعد علي الابداع وممكن كمان تشترى من هناك اللى انت عاوزه .. 

 

 

•ثانيا : جبل المدوره: 

ودة انت محتاج فيه تجربة المتعه فى مغامره انك تتسلق جبل المدوره وتشوف المكان كامل من اعلى نقطه فيه و ده حلو و امن لشباب من سن 15 سنه و يفضل بلاش أطفال اثناء التسلق للاستمتاع و التركيز..


• ثالثا : وادي الحيتان

ودة من احسن الاماكن اللى ممكن تزورها ف مصر لو بتحب الصحرا والحفريات و النجوم المكان بعيد عن القاهره ب 150 كيلو و بعيد عن الفيوم ب 40 كيلو و مفهوش شبكه خالص بس مكان وهمى 

ودى شويه نصايح كدا للى عايز يروح هناك :

* الجو بيبقى حر بالنهار و تلج بليل لازم تتقل كويس او تعمل حسابك 

* تاخد معاك كشاف عشان بليل مفيش نور غير ف مكان اللى ف الكافيه اللى بيعمل الاكل و الحمام بس

* خد معاك شوز خفيف عشان المشى احتمال تمشى كتير ف المتحف المفتوح 

* حتلاقى شويه ثعالب هناك بتيجى بليل متقلقش منها بس خلى بالك علشان بيحبوا يسرقوا الاكل  اعمل حسابك لو حتنام مفيش غير خيم بس للنوم 

* متنمش بدرى عشان تتفرج على النجوم والشهب لان ده احسن مكان ممكن تشوف فيه نجوم وشهب ومجره درب التبانه ونجوم كتير جدا مش فاكر اسمهم

* استمتع جدا وافصل ومحدش حيوصلك عشان مفيش شبكه فى المكان

 

 

• رابعا : وادي الريان :

و اتفرج هناك علي الشلال وادخل المحميه بعد كده اطلع علي البحيره و اركب فلوكه لمده 45 دقيقه.
و انت هناك هتلاقي اكشاك بتاجر البورد لو حابب تتزحلق علي الرمل و سعر التاجير يبدا من 25 جنيه و بعد كده طير بالباراشوط عن طريق عربيات 4*4 و استمتع بالمناظر من فوق و سعره يبدا من 50 جنيه و غالبا 15 دقيقه. واستمتع بلعب (كرة القدم - كرة السرعه – الراكت - الكره الطائره) ..


 
•خامسا : قصر قارون

يعتبر من المزارات المعروفه هناك والقصر ده بيرجع الى العصر اليونانى بيحتوى على 3000 غرفة تقريبا و كان بيستخدم لتخزين الغلال في العصر الاسلامى.


وفى هناك البحيرة المسحورة اللى بتشوفها من اعلى جبل المدورة  سميت بالمسحورة علشان ألوانها بتتغير على مدار اليوم مع أشعة الشمس
دة غير ان فى قرية اسمها  قريه ماضي الأثرية و ديه لسه مكتشفينها حديثاً 

 

 

واخيرا لو عاوز برنامج سياحى تقضى يومين فى الفيوم اقرأ المقال دة هتلاقى فيه برنامج شامل هيخليك تزور الفيوم شبر شبر : برنامج سياحي منوع لأجمل ويك اند ممكن تقضيه في الفيوم