اتكلمنا فى المقال اللى فات عن الجزء الاول من موضوع الهجرة والاقامة فى تركيا وهو الفيزا والتصريح الامنى وكيفية استخراجهم ..

وهو : اجراءات فيزا تركيا والتصريح الامني وكيفية الحصول عليهم

وهنستكمل معاكم فى الجزء دة

كل ما يخص الاقامة فى تركيا واجراءتها وانواع الشغل هناك وكمان الدراسه فى تركيا وتكاليفها 

 
 بس فى البدايه مفيش معلومه عن الحياه في تركيا مش هتلاقيها في المقال دة ان شاء الله ...عشان كدا موضوعنا النهاردة طويل شويه لاننا هنتكلم ونجاوب فيه عن كل حاجة بتدور فى دماغكم  ، دة غير ان المقال مبني علي تجارب واقعيه وحقيقيه لناس عايشه هناك 


----------------------------------------------------------------
زي ما اتكلمنا في الجزء الاول عن الفيزا والتصريح الامني .. نفترض ان انت خلاص عرفت تجيب فيزا السياحه وعرفت تعمل التصريح و وصلت بالسلامه تركيا ..


اولا :الاقامة في تركيا  انواعها واجرءاتها : 

 ازاي تقعد قانوني وتعمل اقامه ؟ الاقامه في تركيا كذا نوع :

1- اقامه عائله : انك تكون متجوز حد تركي .. ودي ليها ميزة انك تقدر تقدم ع الجنسيه 

2- اقامه عمل : ان حد تركي شركه او مؤسسه تعملك عقد عمل .. بتدي الجنسيه بعد 5 سنين 

3- اقامه مستثمر : انك تستثمر مشروع او مبلغ معين في مشروع هناك .. بتدي الجنسيه بعد 5 سنين

4- اقامه لاجئ : بيسموها اقامه انسانيه .. او ايا كان المسمي .. وبتكون لجنسيات معينه زي السوريين 

5- اقامه دراسيه : انك تدرس سواء علي حسابك او بالمنح .. مش بتدي الجنسيه مهما درست 

6- اقامه سياحيه : ودي هنتكلم عنها بالتفصيل تحت بعد شويه 

7- اقامه عقاريه : عن طريق شراء عقار .. تشتري بيت بمبلغ معين وتاخد اقامه بيه وبتكون اقامه قصيرة وبتتجدد كل سنه طول ما انت لسه مالك العقار ( مبعتوش لانك لو بعته هتتلغي الاقامه )
(و الاقامه عن طريق شراء عقار دي مبتديش الجنسيه كلام مؤكد 100 % ..ده حوار عاملينه شركات السياحه هناك عشان ينصبوا علي بعض الناس) ..


---------------------------------------------------------------

حد هيقول التقسيمه دي مش مظبوطه المفروض توضحوا ان انواع الاقامات نوعين : اقامات طويله الامد واقامات قصيره الامد ، و مفيش حاجه اسمها اقامه سياحيه اصلا .. هي قانونا اسمها اقامه قصيره الامد و من ضمن اسباب إعطائها بغرض السياحه ، ومفيش حاجه اسمها اقامه دراسيه اصلا .. هي قانونا اسمها اقامه قصيره الامد ومن ضمن اسباب اعطائها بغرض الدراسه ..
تمام .. كلنا عارفين دة ، لكن احنا بنخاطب عموم الشعب .. لو احنا اتكلمنا بالصيغه دى الناس مش هتفهم ..عشان كدة حبينا نبسطها للناس عشان ميحسوش ان الموضوع مكلكع..


----------------------------------------------------------------

الاقامه السياحيه :

بتروح بفيزا السياحه او الزياره العاديه وتعمل الاقامه السياحيه هناك ودي عباره عن تصريح اقامه لمدة سنتين كحد اقصي ( ساعات بتطلع بسنه واحدة لبعض الحالات ) .. وبتتجدد بعد انتهاء المدة ..
ودي بتبقي اقامه قصيره تُمنح بغرض السياحه فقط .. ومستحيل تاخد منها الجنسيه مهما جددت ..
يعني فايدتها انك تقدر تقعد في تركيا بشكل قانوني .. وتقدر تخرج وتدخل من تركيا زي ما انت عايز وفي كل مرة بتروحها بعد الاقامه مبتحتاجش اي تصاريح امنيه تاني 
 
-معنى كدا انها  لغرض السياحه بس يعني مش هقدر اشتغل بيها ؟ 

**قانونا مبتقدرش .. لكن فعليا وعلي ارض الواقع العالم كله بيشتغل بيها هناك ومحدش بيتكلم 


---------------------------------------------------------------------------
 

طيب ايه خطوات الاقامه السياحيه دي والاوراق المطلوبه ؟؟ 

فى حلين ..  انت ممكن تروح لاي مكتب سياحه موجود ف تركيا او اشخاص مصريين موجودين هناك وتديله 300 ولا 350 دولار ويروح معاك المقابله 
اما لو انت حابب تعتمد على نفسك  ف ركز معايا ف الكلام اللي جاي
لو انت فوق ال 18 سنه هيطلبوا منك الطلبات الجايه : 

-------------------------------------------------------

1- جواز سفر, صوره منه , ترجمه جواز السفر للتركي

2- تأشيرة الدخول و اخر ختم دخول للاراضي التركيه بشكل نظامي من أي معبر حدودي

3- ايصال تصريف بقيمة 6000 دولار, أو كشف حساب جاري من البنك يكون الرصيد فيه نفس القيمة المطلوبة بالدولار ( احيانا بيتغاضوا عنه ومبيطلبهوش اوقات كتير )

4- الرقم الضريبي او رقم المعاملات الماليه

5- طلب الرانديفو الأساسي .. رانديفو يعني المعاد اللي بتاخده عشان تقدم علي الاقامه

6- عقد ايجار صالح و حقيقي موثق عند كاتب العدل ويكون العنوان عنوان رسمي في سيستم الدوله .. وتصديق عقد البيت في ال noter ..

7- صحيفه السوابق ودي اسمها Sabika Belgesi وبتطلعها من المحكمه

8- اثبات العنوان بتأكد انك ف العنوان الفلاني زي السجل المدني عندنا + اثبات الاسم واللقب كامل + ايصال رسوم للدوله لاصدار البطاقه البلاستيكيه واجراء المعاملات ودي ب 50 دولار .. و 6 صور شخصيه ملونه ليك

9- تأمين صحي اسمه سيغورتا لو هتعمل اقامه لمدة سنة هتدفع تأمين من 80 ل 100 دولار ( بتختلف حسب الشركه ) لكل شخص .. ركز لكل شخص

و لو هتعمل اقامه سنتين يبقي هتدفع تأمين الضعف من 160 ل 200 دولار
ولو عائلة هتعملها , لازم كل واحد يكون عنده تأمين صحي... وبيستفيد من التأمين الصحي بتخفيض بعض تكاليف الرعاية الصحية حتى 60%
ملحوظه : هناك في شركات تأمين كتير بتعملك الموعد بتاع المقابلة وتملالك الابليكيشن بحوالي ٣٠ ليرة (ده مقابل ما بيملوا الابليكيشن بدالك....لكن اصلا الابليكيشن مجاني...وهو ده اللي بتاخد فيه ميعاد المقابلة )

10- بتقدم جميع الأوراق بمركز الأمنيات - فاتح. وبعدين في خلال شهر بتطلع الاقامه وتستلمها .. 
المواعيد بسبب الضغط الرهيب بتبقي اقل حاجه بعد شهر و بعد ما بتقدم كل الاوراق بتستني حوالي 15 يوم او شهر كمان علي ما الاقامه تطلع ..

--------------------------------------------------------------------

طيب لو عايز تعمل اقامه لابنك وهو اقل من 18 سنه او انت نفسك عندك اقل من 18 سنه وعايز تعمل اقامه ايه الاجراءات ؟؟ 

1- شهادة الميلاد الاصليه 

2- في حاله الانفصال بين الاب والام

* لو الاب او الام حد فيهم منفصل تجيب اصل شهادة الطلاق أو تجيب قرار المحكمه بالحضانه انها الحاضنه الوحيدة لو في مشاكل بينهم
* لو الاب او الام حد فيهم متوفي يجيب اصل شهادة الوفاه 

3- في حاله ان الاباء مرتبطين ولكن احد الاباء في مصر ومش موجود ف تركيا وقتها :

لو الام بتعمل الاقامه لاولادها لوحدها من غير الاب لازم تجيب وكاله من الاب
والعكس صحيح لو الاب بيعمل الاقامه لوحده من غير الام لازم يجيب وكاله من الام

ولو الاتنين هيعملوها مع بعض يجيبوا اصل شهادة الزواج 
 
4- شهادة الدخول والخروج ودي بتطلع من الامنيات
والحاجات دي لازم تكون متوثقه الاول من الخارجيه في مصر وبعدين تتوثق في سفاره تركيا في مصر وبعدين تتوثق في حاجه اسمها قائم مقام في تركيا وبعدين تقدمها في الامنيات


------------------------------------------------------------------

-انتو بتقولوا الاقامه بعد المقابله بتاخد 15 يوم أو شهر علي ما تطلع ؟؟ طب اصلا التأشيرة بتاعتي بتكون شهر واحد .. هعمل الاقامه ازاي وانا اصلا هكون كسرت الـتأشيرة ؟؟ 
لا متقلقش :

1- انت اهم حاجه تقدم اوراقك وتروح الرانديفو قبل انتهاء التأشيرة ولما بتروح الرانديفو بتاخد ايصال الايصال دة بتقدر بيه تقعد تستني الاقامه لغايه لما تطلعو بتستني حوالي 15 يوم او شهر بالكتير بعد ما الرانديفو ما يخلص وبعد ما بتاخد الايصال
يعني انت لازم اول لما رجلك تلمس ارض تركيا تقوم مباشره تبدا ف الاجراءات عشان تعرف تاخد معاد وتروح الرانديفو قبل انتهاء مدة تأشيرتك 

2- ممكن تعمل توكيل لاي صديق يستلمها مكانك ويبعتهالك بالبريد لو انت هترجع مصر يعني 

3- بتقدر تعمل المعاد من وانت ف بلدك اصلا ( مكاتب كتير بتعملهالك ) وبتبعتله صور الباسبورات وبعدين قدم ع التأشيرة ولما تاخدها تقوم تسافر وتيجي علي معاد الرانديفو مباشره


------------------------------------------------------------------

طيب دلؤقتى انت جبت  فيزا سياحه و عملت تصريح امني و جيت تركيا و عملت كل الكلام دة  وبقي معاك اقامه سياحيه
هتسأل نفسك . هاكل منين ؟؟ هشتغل ايه ؟؟ ايه انواع الشغل ؟؟ والمرتبات نظامها ايه ؟؟ 
طيب نمسك حاجه حاجه ونتكلم فيها

مفتاح الشغل في تركيا هو اللغه .. التركي .. لازم تكون بتعرف تركي ..

1- اعرف تركي ازاي يعني ؟ يعني اكون fluent ؟؟
* تعرف تركي يعني تبقي فاهم الجمل ومستوعبها وتقدر تعمل محادثه بينك وبين اللي قدامك بحيث يكون فاهمك وفاهم كلامك حتي لو بتتكلم بلهجه مكسره ..

2- طيب انا بعرف انجلش كويس اوي هل ينفع بدل التركي ؟
* لا مينفعش ومش هتلاقي شغل محترم وأدمي بالانجلش 

3- طب هو اللغه التركيه دي عشان اتعلم اتكلم بيها محتاج وقت قد ايه ؟
* مينفعش نحددلك مدة معينه  .. في ناس اتعلمتها بعد 5 سنين وناس تانيه اتعلمتها بعد سنه وناس تالته اتعلمتها بعد 6 شهور وناس رابعه بتقعد عمرها كلها مش عارفه تتعلمها .. الموضوع حسب قدراتك واستيعابك ومجهودك وتفرغك في تعلم اللغه 

4- طيب اتعلم منين التركي ؟؟
* لو انت بتحب ال self study هديك لينكات جميع القنوات اللي بتعلمك التركي من علي الانترنت زي :

*https://www.youtube.com/user/ar1tr
*https://www.youtube.com/user/turkiyaganetelard
*https://www.youtube.com/channel/UCvB6gOqNHfg2qP2hpN8Yd0g
*https://www.youtube.com/watch?v=u7YOVk33K1Y

* في تطبيق ممتاز لممارسه اللغه في الأندرويد اسمه Doulingo هيفرق كتير معاك ..
* اما لو انت معاك فلوس فهتاخد كورسات في المركز الثقافى التركى" يونس إمرة " في الدقي .. 


ثانيا : انواع العمل فى تركيا 

طيب هي انواع الشغل هناك ايه والمرتبات كام ؟؟ مبدأيا .. اي شغل تركي ب 12 ساعه في اليوم .. 

* لو شغل مبيحتاجش شهادة عليا ومن غير تركي : من 800 ل 1000 ليره 
زي العمال بالظبط بمختلف انواعهم 

* لو شغل مبيحتاجش شهادة عليا ومعاك تركي : من 1200 ل 1500 ليره
زي كول سنتر - مطاعم - كاشير - سواق 

* لو معاك صنعه مميزة اوي ومعاك تركي : من 1500 ل 2000 ليره 
زي سباك - نقاش - نجار 

ولو بتفهم في الخياطة هتلاقي شغل كتير لان ورش تصنيع الملابس كتير جدا

* لو شغل بشهادات عليا وبعد المعادله بتاعتك ومعاك تركي : من 2000 ل 4000 ليره 
زي دكتور - مهندس..

هل في مرتبات اقل من الارقام دي ؟ ايوة طبعا بس دول قليلين  .. احنا بنتكلم علي الاغلبيه من الناس .. 
.
ملحوظه رقم 1 : الشهادات الطبيه كلها بتحتاج لمعادله .. وعشان تعمل معادله لازم تتعلم تركي .. ولازم تمتحن وتاخد كورس تركي معتمد اكثر من 6 شهور
وبعد ما بتمتحن تركي بتقدم بقي علي موقع وزاره الصحه في انقره وبعدين بيحددولك الجامعه وجهه المعادله وتفاصيل المعادله وفلوسها 
.
ملحوظه رقم 2 : الصيدله و الطب البيطري هي الشهادة الوحيدة اللي مينفعش حد اجنبي يشتغل فيها في تركيا . الصيدله للاتراك فقط
طب الاسنان طبقا لاخر update انهم سمحوا للناس مؤخرا بممارسه المهنه لغير الاتراك 
الحل : لو انت صيدلي او بيطري تفتح مؤسسه وتخلي اطباء اتراك هما اللي يشتغلوا فيها وانت اللي تديرها فقط بس طبعا دي عايزة صرف كتير 
ملحوظه رقم 3 : عشان تشتغل بشهادتك الجامعيه في تركيا لازم معادله وعشان تعملها هتاخد اجراءات متقلش عن سنه من تعب تعليم لغه و اجراءات امتحانات يعني لازم تكون عارف انك هتتعب كتير عشان تشتغل بشهادتك


--------------------------------------------------------------
 

طيب تكاليف المعيشه في تركيا هتبقي ازاي ؟؟؟ 

اولا مصاريف المعيشه بتنقسم ل جزئين ..

* الجزء الاول اللي بياكل اي مرتب وهو السكن ..

* الجزء التاني وهو الاكل والشرب والمواصلات وفواتير ( مياه - كهربا - غاز - نت ) 


الجزء الاول اللي هو السكن : الايجارات بتختلف حسب المدينه .. وحسب المنطقه نفسها جوة كل مدينه ..
اسطنبول غاليه .. باقي المدن رخيصه

ايجار سكن شبابي .. شيرنج يعني .. بيتراوح ما بين 250 ل 300 ليره

ايجار شقه كامله اوضتين وصاله بيتراوح ما بين 800 ل 900 ليره 

في حاجه اسمها كوميسيون .. وفي حاجه اسمها تأمين .. وفي حاجه اسمها بدون فواتير .. اتأكد من ال 3 حاجات دول قبل ما تمضي اي عقد 

يعني مثلا يقولك ايه .. العرض السحري ايجار شقه 3 اوض وصاله ب 600 ليره .. فانت تفرح .. يجيلك ف الاخر ويقولك تم اضافه الكوميسيون أو الفواتير  .. لازم تبقي واعي عشان اكثر حاجتين بينصبوا فيهم في تركيا : الاقامات وعقود الايجار 
 
* الجزء التاني وهو الاكل والشرب والمواصلات وفواتير ( مياه - كهربا - غاز - نت )

لو اسره .. اب و ام .. و طفلين .. يعني اربع افراد زي معظم الاسر المصريه هتحتاج فواتير غاز وكهرباء ومياه .. و اكل وشرب ومواصلات .. 1000 ليره في الشهر تقريبا

يعني من الاخر كدة اسره اربع افراد هتعيش في اسطنبول محتاجين اقل حاجه 1800 ليره شهريا عشان تدفع ايجار سكن واكل وشرب و فواتير وكل حاجه .. يعني لازم الاب و الام يشتغلوا مع بعض 

طب لو انت لواحدك هناك ..فممكن تعمل اي حاجه .. ممكن تنام مع 10 في الاوضه .. ممكن تقضيها وجبه واحدة ف اليوم المقصود ان اي حد سنجل ممكن يحوش من اي مرتب بياخده اساسا ويعيش بأي مرتب بياخده 
لكن انا بركز علي الاسره لان قرار الانتقال لأي اسره من مصر صعب وعايز دراسه ولازم نوعيهم .. انما انت سنجل يعني هتستحمل وعموما المصاريف بتاعتك هتكون نص مصاريف الاسره.

-----------------------------------------------------------------------
 

ثالثا : الدراسه فى تركيا 


طيب انا عندي اولاد في سن المدارس ايه وضعهم ؟؟ 

التعليم في المدارس الحكومية مجاني لاي مقيم حتي الاجنبي ... لكن الدراسه في المدارس بالتركي .. وعشان انت اجنبي بتدرس سنه لغه الاول في المدارس .. 
عندهم السنين الدراسيه مختلفه عننا .. احنا هنا 6 سنين ابتدائي و 3 اعدادي و 3 ثانوي 
هما هناك 4 بس ابتدائي و 4 اعدادي ( بيسموه متوسط ) و 4 ثانوي

لو هتعلم ابنك في مدرسه خاصه او بمعني اصح مدرسه عربيه ( مش عايز تعلمه في مدارس الاتراك ) هتدفع متوسط حوالي 1000 دولار في السنه 

في مدارس خاصه بتبقي ب 600 و 700 دولار و مدارس ب 1500 و 2000 دولار بس احنا بنتكلم علي المتوسط 
التعليم الجامعي :

للاسف التعليم الجامعي مش مجاني ابدا للاجانب .. هو مجاني للاتراك بس يعني لو عندك اولادك في سن الجامعات لازم هيدفعوا فلوس .. وطبعا الرسوم بتختلف حسب الجامعه وحسب التخصص .. لكن بتدخل في رينج 2000 دولار 
لكن تقدر تقدملهم في المنحه التركيه اللي بتنزل كل سنه بحيث متدفعش اي مليم ليهم

ودي لينكات التقديم :
http://hajjajj.com/المنح-الدراسية-بكالوريوس-في-تركيا/
http://masdarona.com/scholarships-in-turkey-2017-2018
 

المصدر : صفحة Traveller Experience