خلاصة القول بخصوص السفر لتركيا والحصول على الفيزا

كل حالات استخراج فيزا تركيا سواء الكترونى او من السفارة ،اسعار التأشيرات بأنواعها، ازاى تستخرج التصريح الامنى والاوراق المطلوبة له بالتفصيل الممل

هنتكلم فى المقال دة عن كل حاجة تخص الهجرة والاقامة فى تركيا بس المقال دة مقسم على جزئين :

الجزء الاول : هنتكلم عن الفيزا والتصريح الامنى وازاى تطلعهم
الجزء التانى : هنتكلم عن الاقامة وإجراءاتها وانواع الشغل فى تركيا

الجزء الاول :عشان تعرف توصل ل تركيا لازم فيزا .. وعشان تاخد الفيزا لازم تركز معايا شويه

أولا : تأشيره تركيا ليها حالتين:

*الحاله الاولي : لو كان عمرك أقل من 20 أو أكبر من 45 , فمش هتحتاج تعمل تأشيرة من السفارة , لكن هتعمل تأشيرة الكترونية من علي موقع السفاره وبتدفع رسومها بالفيزا كارد
ولو معاك شنجن ساريه او امريكا ساريه ( شرط انها تكون ساريه وقت دخولك تركيا ) بتدخل تركيا إما بفيزا من المطار من خلال ماكينات مخصصه في مطارات تركيا

إما بفيزا الكترونيه
ودة الموقع اللي بتعمل من عليه الفيزا الالكترونيه https://www.evisa.gov.tr/en/
---------------------------------------------------------
*الحاله التانيه : لو عمرك اكبر من 20 واقل من 45 ف هتحتاج تأشيرة من السفاره
وهنا هتنقسم علي حسب ايه اللي مكتوب في باسبورك

1- لو مكتوب طالب او حاصل علي.. مش هينفع تقدم علي تأشيرة سياحه عاديه وهتحتاج تقدم علي تأشيرة زيارة عشان تعرف تطلع التصريح الامني من مجمع التحرير
وتأشيرة الزياره لازم دعوة من شخص تركي أو من شركة في تركيا
وممكن تطلع الدعوة من بعض شركات السياحه ب 100 دولار تقريبا..

لو انتي بنت ومكتوب في باسبورك حاصل علي.. او طالبه ممكن تطلعي فيزا مرافق مع زوجك او والدك أو اخوكي
بس بشرط لو هتسافري من مصر لازم زوجك أو والدك أو اخوكي يكون مسافر معاكي من مصر .. عشان تقدرى تطلعى تصريح أمنى مرافق للزوج

يعني لو متزوجه مثلا وعايزة تطلعي فيزا مرافق لتركيا

* هيكون مطلوب من الزوج :
-كشف حساب بنكي لاخر 6 شهور
-جواب من جهه العمل ( أو السجل التجاري والبطاقه الضريبيه )
-حجز فندق وطيران مبدئي
-تأمين للسفر من اي شركه تأمين ( 3 شهور لو هتقدم في سفاره القاهرة و شهر واحد لو هتقدم من قنصليه اسكندريه )
-الباسبور و صورتين مقاس 4 في 6 ..
ودة بشرط ان الزوج يكون مثبت في باسبوره مهنه عشان يعرف يطلع تأشيرة السياحه العاديه
اما انتي هتكوني مرافق ليه وهيكون مطلوب منك باسبور و صور شخصيه و تأمين سفر فقط
---------------------------------------------------

2- لو مكتوب في باسبورك مهنه , ف انت هتقدم علي تأشيرة سياحه عاديه من غير دعوة ولا أي حاجه
وهتحتاج الاوراق الروتينيه العاديه : كشف حساب بنكي لاخر 6 شهور , جواب من جهه العمل , حجز فندق وطيران مبدئي , تأمين صحي للسفر لمدة 3 شهور لو من القاهرة و شهر واحد لو من اسكندريه , الباسبور و صور شخصيه
بعد ما تملي كل البيانات علي موقع السفاره هتحجز ميعاد , وترفع الورق المطلوب منك وتجهز كل الورق الباقي وتروح بيه السفاره
--------------------------------------------------

سعر التأشيرة الالكترونيه حوالي 21 دولار امريكي
سعر التأشيرة السياحيه سنجل 60 دولار امريكي , مالتي 195 دولار تقريبا
سعر التأشيرة الزياره سنجل 60 دولار امريكي + ( الفلوس اللي هتدفعها لشركه السياحه عشان الدعوة )
ودة موقع السفاره https://www.konsolosluk.gov.tr/ و الفيزا بتاخد حوالي اسبوع عمل وبتطلع بعدها وبتروح تستلمها
وبعد التأشيرة ما تطلع تروح بيها المجمع بتاع التحرير الدور الأول مكتب رقم 15 عشان تطلع التصريح الامني..
------------------------------------------------------

ثانيا: " التصريح الامني " ودة ركز فيه لانه مهم جدا ..

عشان تسافر تركيا من مصر .. مصر عملتلك حاجة اسمها التصريح الامني
لو انت مسافر تركيا و سنك أكبر من 18 سنه و أصغر من 40 سنه فحضرتك محتاج تصريح أمني حتى لو كنت رئيس الوزراء , طيب ايه الاوراق المطلوبه للتصريح الأمني؟

في 4 حالات ليها :
1- في حاله فيزا الزيارة مطلوب منك الباسبور و صورته و صورة الفيزا

2- في حاله وجود مهنة في الباسبور يعني فيزا سياحه عاديه مطلوب منك برنت تأمينات مختوم و جواب HR مترجم بالعربي و صورة الباسبور و صورة الفيزا
اما لو انت مهنتك اللي في الباسبور ليها نقابه وهي مهنه نقابيه يعني زي دكتور مهندس محامي الخ الخ ومكتوب كلمه " حر " ممكن متقدمش برنت تأمينات اصلا ولا اتش ار ليتر ويكفي فقط كارنيه النقابه

3- لو انت معاك فيزا امريكا ساريه او شنجن ساريه وطلعت الفيزا الالكتروني ومكتوب في باسبورك مهنه او حاصل علي.. تقدر تطلع التصريح بالفيزا الاونلاين عادي

4- لو انت معاك فيزا امريكا ساريه او شنجن ساريه وطلعت الفيزا الالكتروني لكن مكتوب في باسبورك طالب مبتقدرش تطلع التصريح بالفيزا الاونلاين ولازم تكون فيزا زياره

( خد بالك لو انت طالب لازم فيزا زياره حتي لو كان معاك فيزا العالم كله لازم تطلع فيزا زياره ) ..

ولازم تكون حافظ اسم الوالد خماسي , ويكون معاك فكه
المدة اللي بيطلع فيها التصريح الامني بتتراوح ما بين يومين لأسبوعين
وبيكون صلاحيته شهرين يعني لازم تسافر خلال شهرين من استلامك للتصريح والا التصريح هيبقي لاغي وكانك معملتوش
.---------------------------------------------------

طب افرض بعد كل دة معرفتش تطلع التصريح لاي سبب كان .. عندك حل من تلاته :
1- واسطه جامدة يا عقيد يا عميد يا لواء
2- تغمز حد من الامناء هناك الورقه ام 200 جنيهوهو يتصرف
3- يكون معاك شنجن ساريه فتسافر على اليونانيه مثلا ترانزيت تركيا وتدخل تركيا بالفيزا الشنجن وتاخدها ف المطار ولا من شاف ولا من دري

4- حاله رابعه فيها ريسك كبير جدا جدا جدا جدا انك تطلع من مصر بطيارتين منفصلتين علي اي بلد قريبه ( كوبري ) زي دبي مثلا وبعدين من هناك ل تركيا
ولازم طبعا تكون عامل فيزا دبي الاول
ليه بقول انها ريسك ؟؟؟؟؟
عشان لو ظابط المطار شاف تأشيرة تركيا علي الباسبور و معاكش تصريح ليها و رايح بلد تانيه احتمال كبير يشطب لك عليها
-------------------------------------------------------------

طيب أقدم تبع السفاره في القاهره و لا القنصليه في الأسكندريه ؟
لو أنت من سكان القاهره و الجيزة يبقى تقدم في القاهره فقط و ممنوع تقدم في القتصليه في أسكندريه
لو أنت من سكان اسكندريه أو الدقهليه و محافظات وجه بحري تقدم في القنصليه في اسكندريه فقط

عنوان السفاره التركية ..
لو انت في القاهرة 25 شارع الفلكي، باب اللوق، السيدة زينب، محافظة القاهرة
لو انت في الاسكندريه ...باب شرق....قريبه جدا من محطه القطار والموقف الجديد
------------------------------------------------------
اسئله بتتسأل كتير وممكن تدور فى دماغك احنا هنا هنردلك عليها زى مثلا:

1- لو اتنين رايحين شهر عسل والاتنين طلاب او الاتنين حاصلين علي يعملوا ايه ؟؟

**في الحاله دي واحد منكم هيطلع تأشيرة زياره بدعوة من شخص تركي
والتاني يطلع مرافق معاه

2- لو زوجك شغال في السعوديه ( اي دوله برا مصر ) وعايز يقدم من مصر يعمل ايه في جواب الاتش ار ؟؟

**اتصلى بالسفارة اسالى ينفع زوجك يقدم خطاب صادر من السعودية ولا لأ .. هو العادي والطبيعي ينفع طالما هيطلع مختوم من هناك بس الافضل التأكد من السفاره جايز مبيقبلوش ورق سعودي في السفاره التركيه في مصر

3- انا طالبه ومعنديش حساب بنكي وفلوسي كلها كاش اعمل ايه ؟؟

**ينفع تقدمي بحساب والدك او والدتك

4- انا طالب وعايز اسافر تركيا اعمل ايه ؟؟
**للاسف الحل مع اي شركه سياحه تعملك دعوة عشان تطلع فيزا زياره
وبعد ما تطلع فيزا الزياره تروح بيها المجمع عشان تعمل تصريح امني

وبعد كدة تروح الهايكستب او حلميه الزيتون بتاعت الجيش عشان تطلع تصريح السفر وخلي بالك بتطلعه في الاجازات بس ولو انت في اخر ترم في الكليه مش هتعرف تطلعه اصلا وملكش سفر , يعني سافر في اي سنه من سنين الكليه ماعدا اخر سنه

5- هل ممكن الدعوة اللي جايه من شخص تركي تترفض في السفاره ؟؟
ايوة طبعا في حاله ان الشخص اللي بيعمل دعاوي تكون السفاره عارفه انه بيعمل دعوات لكل الناس واي حد وبالتالي هو اتحرق خلاص في السفاره .. عشان كدة لازم تتأكد من شركه السياحه كويس اوي ان الشخص اللي هيعملك دعوة ميكونش كدة

6- في سؤال في الابلكيشن بيقولك عملت تأمين السفر ولا لأ .. ولو عملته بيسألك عن تواريخ الصلاحيه بتاعته .. هل لازم اكون عامله قبل ما اسجل علي الموقع ولا اسجل الاول واقوله معملتش واخده معايا يوم المقابله ؟؟
**الاحسن انك اول خطوة تعملها قبل ما تسجل الابلكيشن اصلا انك تكون عامل تأمين السفر وحجزت الفنادق والطيران المبدئي وبعدين تسجل عشان تكتب التواريخ كامله وتخلص نفسك
هو ينفع طبعا تقوله معملتوش وتسجل الاول وتعمله بعدين وتاخدة معاك يوم المقابله بس لو دي اول مرة ليك خليك في ال safe side واعمل تأمين السفر الاول قبل ما تملي الابلكيشن

فى المقال دة استكمال موضوعنا من خلال الجزء التانى وهو الاقامة واجراءتها وانواع الشغل فى تركيا والدراسه هناك