المقال دا بمثابة برنامج او تقدر تقول دليل سياحى لزيارتك لشرم الشيخ واهم الحاجات اللى ممكن تزورها هناك .
اليوم الاول : وصول الفندق والاستمتاع بالبلاج والبسين الخاص به
مبدئيا التسكين فى اى فندق بيكون مش قبل الساعة 12 الظهر يعنى معنى كدا انك محتاج تريح اول يوم ويكون برنامجك خفيف ..
وبالتالى اول يوم دا اللى هو يوم الوصول هيكون هو اليوم الوحيد اللى هتقضيه فى الفندق بتاعك .. يعنى تريح وتشوف البلاج الخاص فى الفندق وتنزل البسين ..
اليوم التانى :الاستمتاع برحلة بحرية لمحمية راس محمد او جزيرة تيران - زيارة الف ليلة وليلة
هقولك تعمل ايه .. هتشوف اى حد من الناس اللى بينظمو رحلات داخلية داخل شرم الشيخ ودول مكاتب كتير جدا منتشرة فى كل حتة فى شرم وكمان ممكن تلاقى جوا الفندق بتاعك .. اسال الريسبشن واطلب منه انك عاوز تعمل رحلة بحرية (يوم كامل) والرحلة هتكون رحلة من الساعة 8 ص الى 4 م شاملة الغداء والمشروبات على اليخت فى البحر الاحمر وهتكون لمكان من اتنين (منطقة راس محمد او جزيرة تيران) والاتنين حلوين وممتعين جدا ونفس التكلفة تقريبا ... سعر الرحلة دى شاملة الانتقالات من والى الفندق .
بس قبل ما تطلع على اليخت تكون عامل حسابك فى ماسك لو ناوى تنزل تعمل سنوركلينج من اليخت وتشوف الشعاب والاسماك الملونة ودول بيتم تأجيرهم من المرسى البحرى اللى هتركب منه . وممكن لو عاوز تعمل غطس بتنسق مع مشرف المركب قبلها وبتنزل من اليخت ..
طيب باقى اليوم هتعمل فيه ايه ؟؟ هترجع الفندق تغير وتاخد وجبتك وبعدها تبتدى تستعد عشان المفروض الساعة 8 بالدقيقة تكون موجود فى الهضبة فى مكان اسمه الف ليلة وليلة ودى عبارة عن مبنى ضخم قرية فيها حفلات وسهرة حلوة .. هتاخد تاكسى وتقوله ودينى الف ليلة وليلة والحفلات دى والدخول التكت بتاعهم مش هيتجاوز 100 جنيه للفرد بس فى حاجة مهمة وانت بتقطع التكت لازم تاكد عليه على الشباك .. انك تحضر الحفل كامل يعنى العرض التراثى والعرض الفلكلورى والحفل الفنى والشرقى لان فى حفلتين بسعرين مختلفين .. فى حفل كامل اللى هو ممتع ومفيد جدا وفى حفل فنى فقط ودا ارخص ومش ممتع اوى لكل الناس . الحفلة بتبدء 9 تقريبا وبتنتهى 12 بالليل .
اليوم التالت : زيارة محمية راس محمد والاستمتاع بغابات المانجروف وشق الزلزال زالخليج الخفي وايضا البحيرة المسحورة وقضاء احلي امسية في سوهو سكوير وهوليود شرم الشيخ وخليج نعمه
هتصحى الصبح تاخد وجبتك فى الفندق وبعدها تكون متفق مع حد من اتنين (لو معاك عربية هتحتاج معاك دليل بس / ولو مش معاك عربية هتحتاج عربية بالسواق ) عشان تزور اجمل واروع محمية ممكن تزورها فى حياتك فيها متعة ونزول بحر ومغامرة جميلة وهى محمية راس محمد بس المرة دى تزورها برى مش باليخت وعلى فكرة زيارتك للمنطقة باليخت مختلفة تماما عن الزيارة البرية يعنى دى لا تغنى عن دى..
طيب العربية لو هتاجر تاكسى لاربع افراد مش هياخد منك اكتر من 400 ج بس اتاكد منه انه حافظ الطريق جوا المحمية وزارها قبل كدا ولو هتاجر اى ميكروباص ل 14 فرد مش هيخد اكتر من 600 ج للمجموعة كلها ..
على البوابة كل فرد هيدفع تكت 5 جنيه للفرد ومواعيد المحمية كل يوم من 5 ص الى 4 م. ومتنساش البطاقة الشخصية معاك ضرورى جدا .
طيب هنشوف ايه جوا المحمية ؟؟
هتبدء بالبوابات الحجرية الضخمة اللى هتعدى منها وتقف تتصور عندها .. بعد كدا هتدخل على غابات المانجروف وبعدين شق الزلزال وبعدين الخليج الخفى او البحيرة المسحورة ..
وبعد كدا هتروح على المنظار فوق الجبل فى منطقة التقاء خليج السويس بخليج العقبة (مجمع البحرين) وهناك ممكن تتفرج بالمنظار من فوق الجبل على البحر والمراكب اللى ماشية والسفن.
وبعدها تنزل على منطقة تحت الجبل ملياانة شعاب مرجانية واسماك ملونة من الشط من برا وتقدر تنزل فيها وتستمتع باحلى سنوركلينج .
هتخلص يومك وترجع على فندقك تغير وتاخد وجبتك طيب هتنام ؟؟؟ انت مش جاى شرم عشان تنام اصلا ..
هتنزل تاخد تاكسى او عربية وتعمل لفة حلوة هتروح مكان عام كدا اسمه سوهو سكوير وهناك هتتفرج على عروض النافورة الراقصة اللى بتشتغل فى عرض جميل كل ساعة وهتتصور احلى صور هناك ...
وكمان ممكن تطلع على منطقة اسمها هوليود شرم الشيخ هناك مدينة العاب اطفال وحدائق وحفلات ونافورة راقصة وعروض رائعة جدا ..
تخلص بعدها بمسافة صغيرة تروح تتمشى فى خليج نعمة هتلاقى محلات وفنادق وكافيهات وعروض فنية كتير ..
ممكن تختم سهرتك فى السوق القديم فى شرم الشيخ .. كل الاماكن دى دخولها مجانا ومفتوح للناس اماكن عامة ماعدا هوليود شرم الشيخ هى اللى بتكيت 30 جنيه تقريبا ..
اليوم الرابع : رحلة سفاري بالبيتش باجي وتختم برنامجك بزيارة خليج نعمه او زيارة محمية نبق او الاستمتاع بالانشطة الترفيهية فى شرم الشيخ
هتكون حاجز رحلة سفارى بيتش باجى ودى رحلة ممتعة اوى ممكن واحد او اتنين يركبو على البيتش باجى وبتطلع لها من بالليل وقت الفجر عشان تحضر شروق الشمس فى الجبل .. الرحلة بتاخد حوالى 3 ساعات وبترجع وقت الفطار .
وممكن بعد الفطار تستعد تسلم الغرفة للفندق وتروح تختم البرنامج بتاعك برحلة من خليج نعمة بتاخد حوالى نص ساعة بالجلاس بوت .. بتركب بوت زجاجى وتمشى بيه فى البحر تتفرج على الشعاب المرجانية والأسماك من المركب او ممكن تركب الغواصة ودى بتكون اغلى شوية عن الجلاس بوت .. فى كمان محمية جميلة فى شرم الشيخ ممكن تزورها فى النهار اسمها محمية نبق ودى فيها نباتات المانجروف وطيور مهاجرة كتيرة ودخولها مجانا بدون تكيت بس هتحتاج برضو عربية معاك تتحرك بيها جوا المحمية لانها منطقة جبلية
فى طريقك وانت رايح او جاى من شرم بتعدى على شوية حاجات فى الطريق أشهرها نفق الشهيد احمد حمدى فى السويس اللى بتعدى منه اسفل قناه السويس عشان تعدى من السويس الى شبه جزيرة سيناء او العكس وكمان هتعدى فى الطريق على راس سدر وحمام فرعون وعيون موسى والطور..
البرنامج دا جزء مبسط من اجمل واهم حاجات ممكن تعملها فى شرم الشيخ فى اى وقت مع العلم ان شرم الشيخ فى فترة الصيف بتكون حر شوية ولكن بتفضل من اجمل مدن مصر وبحرها روعة .. وانصحك اوعى تفوت زيارة محمية راس محمد برى .. لانها من اجمل محميات العالم كله بلا مبالغة..
اتمنى لحضراتكم رحلات سعيدة .. فى الصور اللى تحت دى هتلاقوا اغلب الاماكن اللى اتكلمنا عنها
المصدر : صفحة فيها حاجة حلوة
