اللى نفسهم يقضوا وقت جميل فى أسوان الجميلة فأحنا هنتكلم مبدئياً عن أسوان وحبة نصائح كدا علشان تعرفوا الدنيا ماشية ازاى هناك... 

لكن قبل ما نبدأ مقالنا خلينا نقولكم على عروض وخصومات كبيرة جدا لو بتفكر تروح الا قصر واسوان نايل كروز ممكن تشوفها من اللينك دة : 

قضي أجمل رحلة نايل كروز الاقصر واسوان ( 4 ايام / 3 ليال ) شاملة الانتقالات والاقامة كاملة فقط ب 2775 جنيه 

المقال طويل بس هيكون شامل كل شبر فى اسوان 

اولا :وسيلة المواصلات لأسوان هى : ( طيران - اتوبيس - قطار ) 

*طيران 

-مصر للطيران 
-النيل للطيران 

*اوتوبيس 

*قطار

-قطار نوم الكابينة المفردة ب 500 جنية والفرد فى الكابينة المزدوجة 300 جنية 
-قطار top VIP ب 400 جنية الفرد
-قطار VIP درجة اولى 235 جنية
-قطار VIP درجة ثانية 135 جنية 
-قطار اسبانى مكيف ب 234 الدرجة الاولى و 67 جنيه الدرجة الثانية.

بالنسبة للقطر النوم وال vip الاتنين كويسين بس قطر النوم بيكون فيه ميزة الخصوصيه أكتر
---------------------------

ثانيا : اشهر المزارات السياحية فى أسوان 

 

جزيرة معابد فيلة 

المسلة الناقصة

أثار جزيرة الفنتين

جزيرة معبد كلابشة

مقابر النبلاء بألوانها الجميلة ''دولة قديمة من الاسرة 6 والاسرة 11'' 

أثار جزيرة سهيل

معبد كوم امبو قريب جداً حوالى 45 كيلو شمال أسوان.

معبد ادفو 

دة بالأضافة طبعاً لمعبد أبو سمبل الشهير هو ييحتاج نصف يوم لزيارته لأنه بعيد شوية، 280 كيلو تقريبا،ً لكن محدش أبداً زار أبو سمبل الا وأنبهر بيه.. 

 

معبد أبو سمبل 

 

صور من داخل معبد ابو سمبل

معبد فيله 

صور من معبد أدفو

 

فيه هناك 4 متاحف في اسوان  :
 

متحف النيل 
متحف النوبة 
ومتحفين أثار الفنتين ''الصغير هو إللى مفتوح حالياً ''
فيه عرض للصوت والضوء فى معبد فيله وهو حلو هتستمتع بيه 
فيه بردو عرض صوت وضوء فى ابو سمبل بس هيحتاج انك تبات ليلة فى فندق هناك ودة هيكلفك شوية..

 

متحف النوبة

متحف النيل بأسوان

 

ثالثا :بالنسبة للأسعار فى أسوان

اتعامل كانك فى أى مكان وفاصل من غير كسوف طالما بتتعامل مع خدمة او سلعه سعرها مش ثابت و غير معلن للكل..

بالنسبة للتاكسى فى المشاوير الصغيرة بيكون فى حدود 20 او 25 جنية اما لو هتروحوا مكان زى فيله والسد ممكن يتكلف فى حدود 150 الى 200 جنيه 
**اسعار مراكب جزيرة فيله هى حوالى 100 جنية من فرد الى 8 افراد + اكرامية بسيطة للمراكبى .

**السد العالى ممكن تزوره مع فيله فى يوم واحد. 

**أبو سمبل ممكن تزوره بطريقتين :- 

1/ مع شركة سياحة فى ليموزين او ميكروباص سياحى او اتوبيس مكيف والفندق اللى انت هتنزل فيه بيقدر يوفر الرحلة دى بس هيبقى اغلى من المواصلات العامة طبعاً. 

2/ مواصلات عامة ميكروباص بتاخده من موقف الأقاليم فى اسوان اللى بتروحه بميكروباص من الكورنيش.

**المسلة الناقصة ممكن تروحها بتاكسى 

او تركب ميكروباص خط التأمين الصحى وتنزل عند المستشفى العسكرى فى وشها كدا هتلاقى شارع بدايته مبنى شرطة النجدة وبعدة هتلاقى منطقة اثار المسلة الناقصة .. 

ياريت بقى تركز فى الجزئية  دى::

(( لو روحت من غير مرشد مش هتفهم اى حاجة ولا هتعرف المسلة فين أصلاً لانها غير مكتملة اصلا ولسه مش مفصولة من الأرض فــ الحل لو هتروح من غير مرشد انك تطلب من الحارس انه يفتحلك مركز الزوار وتتفرج على فيديو وثائقى عن المسلة)). 

 

المحطات المائية بالسد العالى بأسوان

رمز الصداقة المصرية السوفيتية من الداخل

 

القرية النوبية

ودى محتاجة مقالة لوحدها  بس احنا هنختصرها فى الاماكن المشهورة. 
1/غرب سهيل ودى أشهر قرية نوبية حالياً و واحدة من القرى النوبية تقدر تروح لها عن طريق:-

- بمركب ''اتفق الاول وانت وشطارتك وياريت تكون بالساعه علشان تعرف تاخد وقتك هناك والابحار من الكورنيش لحد هناك بياخد تقريباً 40 دقيقة والرجوع حوالى من 25 الى 30 دقيقه ''
- عن طريق تاكسى مخصوص واتفق معاه. 
- عن طريق ميكروباص عمومى رايح منطقة صحارى وبعد ما تعدي خزان اسوان او السد القديم بتنزل وتاخد تاكسى او توكتوك يوديك لحد البيوت النوبية المشهورة عند مرسى المراكب. 
 

2/ جزيرة هيسا ودى بتروحها بمركب من مرسى فيله او مرسى اسمه ''بتانيون'' جنب السد القديم ودى تقدر تعمل فيها كامبينج.

3/ جزيرة أسوان والمرسى بتاعها جنب KFC. 

4/ غرب أسوان والمرسى بتاعها قدام محطة القطار على الكورنيش. 

واليكم بعض الصور اللى بتبين جمال النوبه:

 

بخصوص معبد كوم امبو تقدر تروحه عن طريق :-
-تاكسى مخصوص او عربية سياحة. 
تروح موقف الاقاليم وتركب عربية كوم امبو وتقول للسواق نزلنى قدام شارع المعبد هتلاقى هناك تكاتك فقط بعشرة جنية يوديك لحد المعبد وبعد ماتخلص تاخد تاخد تكتك تانى يرجعك للموقف وترجع اسوان بميكروباص. 
او تركب القطر وتنزل محطة كوم امبو وتاخد تاكسى يوديك المعبد. 
مقابر النبلاء ودى رخيصة خالص
هتعدى بمركب الاهالى من مرسى غرب اسوان من على الكورنيش قدام محطة القطر هتلاقى الناس رايحة تركب عربيات من الناحية اليمين انت تدخل شمال هتلاقى شباك التذاكر وتقطع تذكرة وتطلع السلالم الاثرية 165 سلمة 
 او تأجر جمل يوديك لحد فوق تدخل تشوف مقابر سير نبوت و ميخو وسابني الجميلة نبلاء مصريين حكموا أقليم أسوان من الاف السنين وتطلع بعد كدا وتتسلق الجبل لحد عند قبة ابو الهواء ..

*مقابر النبلاء وجبل ابو الهواء لازم ليه كوتشى أو حذاء رياضى للتسلق. 

بالنسبة لاسعار تذاكر دخول المزارات السياحية في اسوان هى كالأتى :-

جميع المعابد المصرية للمصريين 10 / 20 جنية للفرد و 5 جنية للطلبة والأطفال 
السد العالى 10 جنية للفرد الكبير و5 جنية للطلبة والأطفال. 
رسم دخول الحديقة النباتية ''جزيرة النباتات'' 5 جنية للفرد '' بدون إيجار المركب ". 

 


مقابر النبلاء 

معبد كوم امبو


رابعا :المطاعم في اسوان :-


1/ بورتو سونو - بجوار موقف الأقاليم ومنظر غروب الشمس والنيل من هناك تحفة وعندهم بوفية سلاطات جميل جداً ..

2/ الدوكة - جزيرة فى النيل وليها مركب بتروح وتيجى الجزيرة كل ربع ساعه تقريباً مجاناً والمرسى بتاع المركب دى قدام سنترال أسوان العمومى ومكتب مصر للطيران بجوار نادى القضاة.

3/مكة - مكانه فى شارع ابطال التحرير فى شارع موازى للكورنيش ومشهور جداً.

4/ المصرى- فى شارع المطار متفرع من شارع السوق السياحى .

5/ أشرى توتكى - مطعم وكافية نوبى فى جزيرة أسوان وليه مركب مخصوص بتتحرك كل ربع ساعه والمرسى بتاعها جنب KFC قدام مديرية الأمن. 

6/ المبروكة - مركب- نفس مرسى KFC. 

7/ ماكدونالد و كنتاكى موجودين فى منتصف كورنيش اسوان بينهم وبين بعض 10 دقائق. 

8/ مطعم نادى التجديف ''الشرطة المصرية'' موجود على الكورنيش جنب ماكدونالد. 

9/ مول أسوان بلازا فيه مطاعم وكافيهات كتير زى سيلينترو وتحت هتلاقى كمان واحد بيعمل كريب ووافل حلو ..

10/ الفنادق المشهورة فى غرب سهيل والبيوت فى القرى النوبية عموماً بيعملو اكل تحفة بس قولهم ظبطولى البهارات

**اسماك

الشيف خليل - جنب محطة القطار.

جمبريكا - فى شارع صلاح الدين او الشارع الجديد متفرع من الكورنيش.

جمبرى افندى - طريق الخزان بجوار بنك التنمية والائتمان الزراعى. 

السلام - فى شارع السوق السياحى 5 دقائق مشى من محطة القطار.

**بيتزا وفطائر 

اسمه ايه ''هو اسمه كدا '' خلف مبنى محافظة أسوان. 

قصر الهدى بردو خلف مبنى المحافظة. 

بيتى - أمام المحطة وقبل السينما.

التحرير - امام المحطة على ناصيه شارع السوق السياحى . 

**فول وطعمية 

الونش - خلف مبنى محافظة أسوان. 

وفيه هتلاقى محلات كتير كويسة فى محيط المحطة وفى اماكن كتير تانيه..
----------------------
لازم تشترى بهارات وفول سودانى وكركدية من هناك 

ياريت تجيب معاك حذاء رياضى او مريح للمشى.
طاقيه لحمايتك من الشمس ..

خامسا : الفنادق في اسوان 

لو محتاج فنادق فى  اسوان سعرها رخيص فيه فنادق حوالين المحطة زى ياسين ونورهان دول جنب بعض على طول اطلع من المحطة وامشى شمال شوية كدة وأسأل عليهم وكمان قبلهم فيه سمر لاند
ويمين المحطة جنب مطعم بيتزا '' esmo eh'' فيه فندق اسمه الصفا .. 
وفيه جنب المحطة بردو بيت شباب بس انت وحظك بقى لان الاماكن دى حجزها لما بتوصل .. 
كمان بعد ياسين ونورهان فيه فندق اسمه الاخوة فوق فسخانى السد العالى دة ارخص كمان

دة غير ان أسوان فيها منتجعين 

1/منتجع موفينبيك '' ثانى أغلى و أفخم فندق فى أسوان بعد اولد كتاركت'' 

2/منتجع جزيرة أيزيس 
Booking.com  

هيساعدك كتير من خلال تقييم النزلاء للفنادق اللى عليه.. 

بس عموماً أشهر الفنادق فى أسوان هى:

اولد كتاركت
موفينبيك
هلنان 
بسمة 
ايزيس الجزيرة 
فيله

 

 

منظر الغروب من فندق موفينبيك

وبكدا نكون اتكلمنا معاكوا عن كل حاجة تقريبا فى اسوان ونسيبكوا دلؤقتى مع الصور 

 

المصدر : صفحة Traveller Experience