عشان النفسية محتاجة مرسي مطروح دة مقال شامل كل الاسعار والخروجات والانشطة فى مرسي مطروح 

النهارده هنتكلم باستفاضه عن مطروح ..  مرسى مطروح من الاماكن الجميله جدا ده لو عايز تستمع بالبحر الصافى والرمله النقيه ..
وهناك هتقضوا وقت جميل بالنهار علي البحر وبليل تخرجوا وتستمعوا بركوب العجل و التسوق في شوارعها..

بس خلينا نتفق ان مطروح مش بتاعت يوم صد رد اقل حاجه تروح تقعدلك 5 ايام

 

1- ساعات السفر لمرسي مطروح :

تقريبا من القاهره بالكتير 6 ساعات او 7 ساعات ومن الاسكندريه 3- 4 ساعات

2- الحجز والاقامة في مرسي مطروح واسعارالشقق و الفنادق:

مطروح من الاماكن اللى ممكن تروحها من غير ماتحجز لان اغلبها نظام شقق سكنيه مش فنادق بس .. الفنادق عددها قليل وفى الاغلب سعرها عالى عن الشقق ممكن يكون الضعف تقريبا .. لو عايز تحجز فندق عليك بمواقع الحجز  انما لو قررت تروح من غير ماتحجز ماتقلقشى اول ماتوصل مع اول سواق تاكسى هتقابله ممكن يدلك على شقق كتير لان معظم سواقين التاكسى هناك سماسره او تنزل وسط البلد او اى مكان عايز تقعد فيه وهتلاقى سماسره كتير جدا.. 

افضل وقت تروح فيه مطروح  هو شهر 7 او شهر 8 بلاش قبل كده او بعد كدا لان البلد جوها جميل ولو روحت فى شهور تانيه مش هتستمع بالبحر لان الجو هيكون ساقع شوية

واسعار الفنادق لو هتقعد فى حاجه فوق 3 نجوم يبقى الاوضه الزوجى هتكون فى حدود 1200-1700 جنيه

وفيه فنادق اقل من 3 نجوم بتكون اسعار الاوضه فيها من 500-700 جنيه

الشقق بقه على حسب مكانها يعنى لو صف اول على البحر من 500 – 900 جنيه ولو صف تانى يبقى من 300-500 وممكن تاخد حاجه ابعد من اول 200 جنيه ... ميزه الشقه بقه انها بتبقى اوض كتير يعنى ممكن تاخد اسره من 5-6 افراد

 

3- افضل مكان تقعد فيها منطقه هناك ممتازه اسمها "العوام " وفيها كل حاجه

ميزه مطروح ان كل شط فيه مميزات والشواطىء هناك كتير ولازم كل يوم تروحلك شاطى جديد عشان تبقى شوفت كله

بالترتيب كده ," شاطى الابيض " احسن شاطىء بس مشكلته ان بعيد عن وسط البلد بس انقى مايه ورمله ويجى بعديها شاطى " عجيبه "

ولو انت مش بتاع موج ومعاك اطفال يبقى عليك بشاطى " الليدو" او " مطروح العام " او "النخيل "
 

اشهر شواطئ مطروح روميل وعجيبة والابيض و كيلوباترا والجونة وبلو بيتش والبوسيت وشط الغرام و الرميلة مينا حشيش .

الشواطئ الكويسه للاطفال روميل و البسنت المياه مفيش فيها امواج و واطيه .
 

الشواطئ العامه زي الليدو و مطروح العام و روميل مش هقول وحشه بس هتلاقي فيها شوية زباله ومش صافيه اوي الي هيا .
لازم تروح عجيبه لازم عجيبه ما هو انتا هتروح عجيبه يعني هتروح عجيبه

اعمل حسابك في ميزانيه مخصصه للكراسي و الشمسيات الاسعار مش هتبقي ثابتة طبعاً ده مش رسمي ده استغلال من الناس لكن كل شط ليه رسوم ثابتة والمفروض انها بتبقي متعلقة في الشط بس طبعاً بتختفي  بس طبعاً انت برده ممكن تشتكي لو حسيت ان الاسعار مبالغ فيها.

 

4- وبالنسبة للأكل والمطاعم فى مطروح

في محل نضيف وقريب من البحر هو في وش محل قرية كمونة للمشويات
اسمه عزت ..بيعمل سندوتشات بطريقة البقالة الاسكندراني..عيش فينو رفيع..جبنة و سجق و كبدة و بيض بسطرمة..مربي بكريمة..حلاوة..عسل.

عاوز تأكل سمك عليك و علي ( اسماك مجدي ) مكانه في شارع متفرع من شارع الاسكندريه ناس علي وضعها السمك بتاعهم علي وضعه البلطي شديد مشكلتهم التأخير و الزحمه يعني هات معاك كرسي و اعمل حسابك ان الأكل بيتأخر شوية بس هتأكل سمك تحلف بيه طول حياتك..
وعندك برضه اسماك ابوشعفة عند المحكمة القديمة و حمو التمساح عند بنك مصر 
عاوز تأكل مشاوي عندك كمنه و عبده كفته ,مشوياتهم حلوه و خاصه كمنه
وكمان في ابو سلطان اكل بدوي بقي من الاخر وقعده عرب علي الارض وجو لذيذ

عاوز حلو ؟ عندك هريسة احمد حسنين بيعمل هريسه بالبندق اصلي و قدامه الدمياطي هات منه بلح الشام حلو اوى

وطبعاً مينفعش تبقي في مطروح بلد اللب و متجبش لب ابيض من عند النصر الي في علم الروم , بس خد بالك علشان هتلاقي محمصه  كتير باسم النصر , فاسأل علي محمصه النصر المسيحيه هتلاقي عليها امم حتي لو الوقت الساعه 4 الفجر  .


مطروح الصبح حاجه و بليل حاجه تانيه خالص الكورنيش حلو .. كُل ترمس و اقعد عـ البحر

وكمان الكافيهات حلوه في مطروح و كتير و القعده حلوه في الهواء و هتلاقي الكافيه الي علي قد الايد

بتحب البلاي ستيشن ؟ في مطروح هتلاقي بلاي ستيشن و قعدات عرب من الاخر حاجه قمه المتعه .

لو معاك اطفال ممكن تطلع على السيرك وده هتلاقيه اخر الكورنيش عند فندق المشير احمد بدوى والتذكره ب 45 جنيه

مطروح فيها سينما والتذكره بـ 20 جنيه مستوى السينما مش عالى اوى وكمان زحمه شويتين فى الموسم 

ودلؤقتى نسيبكم مع الصور عشان تستمتعوا بجمال مطروح وحلاوتها ..

 

المصدر : صفحة افضل اماكن الفسح والخروج فى مصر