المقال دة هيكون طويل و منعا للملل قررنا نقسمه على جزئين هنتكلم فيهم عن: خطاب الرفض والتظلم الخاص بفيزا الشنغن
الجزء الأول :نموذج الرفض
الجزء الثانى: خطاب التظلم
اولا .. نموذج الرفض لفيزا الشنغن:
طبعاً الرفض من أصعب المواقف اللى ممكن حد فينا يتعرض لها خصوصاً مع صعوبة الإجراءات و التعقيدات اللى بنواجها و المجهود اللى بنبذله فى تجهيز المستندات المطلوبة للتأشيرة.
طبعاً بيكون الإحباط رهيب جدا لما تستلم الباسبور و بدل ما يكون عليه استيكر التأشيرة تتصدم بوجود خطاب الرفض و طبعاً الأسباب من وجهة نظرنا بتكون غير منطقية و تلاكيك. لكن فى الواقع إن فى أحيان كتير بيكون الغلط من عندنا و ممكن نعمل غلطة بسيطة جداً عن عمد أو عن جهل و تكون السبب فى رفض التأشيرة.
قبل ما نبتدى خلينا ننوه إن الكلام الجاى خاص بتأشيرة الشنغن فقط، لأن قانون التظلم خاص بالشنغن
سفارة أمريكا على سبيل المثال مافيش تظلم على قرار رفض التأشيرة.
كذلك بريطانيا لغت موضوع التظلم على تأشيرات الزيارة سنة 2013 و أصبح التظلم قاصر على أنواع معينة فقط من التأشيرات.
خلينا نتكلم على خطاب الرفض، خطاب الرفض موحد فى كل السفارات و لكن طبعا بيكون مطبوع بلغة السفارة فأحنا بحثنا عن نسخة بالإنجليزية عشان تكون سهلة فى الفهم و هانكتبها بالعربى عشان الناس اللى الإنجليزى عندها بعافية تقدر تتابع معانا (1)
1- وثيقة السفر/ جواز السفر مزور
2- عدم تبرير الغرض من الزيارة / عدم إستيفاء شروط الإقامة
3- الموارد المالية المقدمة غير كافية لتغطية فترة الإقامة المطلوبة
4- إستنفدت فترة الـ 90 يوم /180 المسموح بها / أو تعديتها
5- وجود إنذار على نظام الفيزا الألكترونى بعدم منحك فيزا
6- صدور قرارمن أحد الدول الأعضاء/أو أكثر من دولة أنك تشكل تهديدا للسلامة و والأمن والصحة العامة وفقا للمادة 2 (19) من اللائحة (المفوضية الأوروبية) رقم 562/2006
7- عدم تقديم تأمينى طبى مناسب
8- المعلومات المقدمة لتبرير الغرض من الزيارة وشروط الإقامة لا يمكن الاعتماد عليها
9- عدم التأكد من مغادرتكم منطقة الشنجن قبل إنتهاء التأشيرة
10- عدم وجود دليل كاف يدل على أنك فى وضع يسمح لك بالحصول على الفيزا مقدما / عدم تقديم دليل يبرر تقديمكم فى الفيزا عند الدخول (بصراحة السبب ده مافهمتهش معناه)
11- طلب صاحب التأشيرة إلغاء التأشيرة
* الرفض ممكن يكون لسبب واحد بس و ممكن يكون لعدة أسباب مجتمعة
طبعا الأسباب (2)،(3)،(8)،(9) هم اللى يهمونا لأنهم الأكثر شيوعاً
السببين (2) و (8) دول توأم ممكن يكون الرفض لسبب واحد فقط منهم او بيكونوا مع بعض و هم خاصين بالإقامة و حجز الفندق و ده ممكن يكون ناتج لعدة أسباب منها إنك عملت حجز مع شركة سياحة و اتلغى تلقائى بعد 48 ساعة و لما السفارة شيكت مالقتش حجز أو إنك تكون عملت حجز على بوكينج و لغيته قبل ما التأشيرة تطلع أو إن ورقة الحجز مش مكتوب فيها الإسم أو إنك عامل حجز غير مدفوع و السفارة طالبة حجز مدفوع ... دى نوعية الأخطاء فى حجز الفندق اللى ممكن تؤدى للرفض للأسباب (2) و (8)
بالنسبة للسبب (3) خاص بالحساب البنكى و غالبا السبب ده مش بييجى لوحده لأن ناس كتير بتقدم كشف حساب محترم و بتترفض فدايما بيلزقوا معاه أى سبب تانى سواء السبب رقم (9) أو السببين رقم (2) و (8) بس ده لا يمنع إن فى بعض الأخطاء اللى ممكن تؤدى للرفض للسبب ده منها إن بعض الناس بتودع مبلغ كبير قبل إصدار كشف الحساب و طبعا لما يكون حد مقدم كشف حساب كان فيه 10 آلاف و بعدين يودع فجأة مبلغ 100 ألف جنيه و هو مقدم كشف خطاب من جهة العمل بأن راتبه 2000 جنيه و مافيش أى بيان إن فى مصدر تانى للدخل طبعا لازم السفارة تشك فى مصدر الفلوس.
بالنسبة للسبب رقم (9) و الخاص بالشك فى إنك هترجع بلدك طبعا لازم نعذرهم مع عدد الناس اللى بتسافر و تكسر فهم فقدوا الثقة فينا عشان كده بيطلبوا انك يكون عندك روابط تربطك ببلدك زى إنك يكون عندك وظيفة ثابتة مستقر فيها بقى لك كذا سنة و ياسلام لو تكتب الرقم التأمينى فى خطاب العمل أو عندك بيزنس خاص و عندك بطاقة ضريبية و سجل تجارى من سنين (مش من 6 شهور) أو إنك تكون طالب فى الجامعة و لازم ترجع لدراستك أو حالتك الإجتماعية ..... إلخ
الأسباب (1)،(5)،(6) ربنا معاهم
السبب (7) نادر الحدوث عشان كده دايما الشركات بتطلب الباسبور عشان تنقل البيانات بالظبط لأن أى خطأ فى البيانات على وثيقة التأمين بيؤدى للرفض (7)
السبب (4) إحنا عارفين إن قانون الشنجن بيسمح بالإقامة 90يوم كل/180 يوم متفرقين أو مجتمعين فنفرض إن واحد أخد تأشيرة مالتى 6 شهور و أقام ال 3 شهور بتوعه المسموح بيهم و خلصهم و رجع ثم قدم أنه عايز يسافر تانى خلال الست شهور نفسهم الفيزا هتترفض ممكن يقدم طبعا بس يخلى تاريخ السفر بعد إنتهاء ال 6 شهور / أو أنه يكون تعدى فترة ال 90 يوم إقامة المسوح بيها داخل الشنجن ده برضو هيترفض التأشيرة
السبب (10) زى ماقولت لكم مش فاهمه عايزين إيه بالظبط
و السبب (11) إن الشخص طالب بإلغاء الفيزا بعد الحصول عليها
ده كان ملخص نموذج الرفض
طيب بالنسبة للإجراء نفسه بيتم إزاى ؟ إجراء التظلم بيختلف من سفارة للتانية و الشخص اللى أخد رفض بيقدر يقدم تظلم خلال 30 يوم أو 60 يوم من إستلام خطاب الرفض
- بعض السفارات التظلم بيكون عن طريق إرسال خطاب الطعن إلى المحكمة المختصة فى البلد نفسها
- و بعض السفارات بيتم التظلم على مرحلتين .... المرحلة الأولى إنك تتظلم أمام السفارة نفسها بإرسال إيميل أو تسليم خطاب للسفارة باليد ..... المرحلة التانية فى حالة رفض السفارة للتظلم بتبعت خطاب طعن للمحكمة المختصة فى البلد نفسها
أحنا هنا هنذكر كيفية عمل تظلم فى بعض السفارات اللى متأكدين منها
1 – سفارة ألمانيا:
بتسمح بتقديم طلب تظلم باليد الى السفارة او من عن طريق ارساله بالفاكس أو إيميل السفارة
visastelle@kair.diplo.de
و ذلك خلال 30 يوم من إستلام الرفض و بيتم دراسة ملف المتظلم عن طريق موظف قنصلى آخر لضمان الحيادية فإذا تم قبول التظلم بيتم الإتصال لإرسال جواز السفر للسفارة لأخذ التأشيرة و فى حالة الرفض بيتم رفع دعوى قضائية فى ألمانيا للتظلم ضد قرار السفارة (2)
ملحوظة: التظلم لازم يكون موقع بخط اليد من صاحب التظلم (فى حالة ارساله بالفاكس أو الايميل يتم طباعته و التوقيع ثم سحبه سكانر) و يجب ان يكون مكتوب باللغة الألمانية
2 – سفارة فرنسا
بتسمح بتقديم تظلم من خلال إرسال إيميل إلى السفارة
admin-etrangers.le-caire-fslt@diplomatie.gouv.fr
Bta.scec@diplomatie.gouv.fr
Cgfcaire@link.net
هتستلم ايميل أوتوماتيك منهم انه فى حالة الموافقة هيتم الاتصال خلال ٤٨ ساعة و فى حالة عدم الرد خلال 48 ساعة يبقى التظلم اترفض
و فى حالة القبول يتم الإتصال بالمتظلم عشان يودى باسبوره للسفارة
فى حال الرفض يبقى بتنقل على المرحلة التانية انك بتبعت خطاب التظلم باللغة الفرنسية إلى العنوان المكتوب فى خطاب التظلم
(فرنسا ممكن مايردوش على الايميل و بيعتبروا عدم الرد رد بالرفض)
3- سفارة أسبانيا
بيتم تقديم التظلم على نموذج مخصوص من خلال مكتب BLS فى القاهرة أو القنصلية فى إسكندرية و فى حالة رفض التظلم من خلال السفارة بيتم عمل طعن من خلال المحكمة على العنوان الموضح بخطاب الرفض
4- سفارة المجر
بيتم تقديم التظلم خلال 8 أيام من إستلام خطاب التظلم إلى السفارة نفسها و بيتم دفع 30 يورو مصاريف و هم بيقوموا بارسال الطلب للمحكمة عن طريقهم و فى حالة القبول بيتم الإتصال لإرسال جواز السفر للسفارة
5- سفارة اليونان
القنصلية فى إسكندرية لا تقبل التظلم و يجب عمل طعن من خلال محامى يونانى بمصاريف على عنوان المحكمة فى المكتوب فى خطاب الرفض (ماعنديش فكرة عن المصاريف)
6- سفارة هولندا
برضو مافيش تظلم من خلال السفارة
بيتم إرسال الخطاب بالبريد إلى عنوان المحكمة المكتوب فى خطاب الرفض
7- سفارة ايطاليا (المصدر أ/ شروق الخطيب)
بيتم ارسال ايميل الى
info.italyegypt@vfshelpline.com
او
ambasciata.cairo@esteri.it
و بيتم تواصل السفارة مع المتقدم فى حالة قبول التظلم
فى حالة رفض السفارة للتظلم يتم ارسال الطعن على عنوان المحكمة الموضح فى خطاب الرفض
8- سفارة التشيك
بيتم تسليم الخطاب باليد شخصيا إلى السفارة
فى حالة رفض التظلم بيتم ارسال الطعن على عنوان المحكمة المذكور بخطاب الرفض
9- سويسرا
بيتم كتابة خطاب تظلم باحد اللغات الاربعة الرسمية المستخدمة فى سويسرا و ارساله عن طريق الشخص نفسه او من ينوب عنه (شركة او شخص داعى) فى خلال ٣٠ يوم من الرفض الى عنوان المحكمة
the State Secretariat for Migration (SEM) CH-3003 Bern-Wabern.
و بيتم دفع مبلغ ٢٠٠ فرنك سويسرى رسوم ادارية
10- بولندا بيتم تسليم خطاب التظلم باليد إلى السفارة
و فى حالة رفض التظلم بيتم ارسال الطعن على العنوان المذكور بخطاب الرفض
***ملحوظة
** الخطاب اللى بيتبعت على الايميل بيكون باللغة الانجليزية لكن الخطاب اللى بيتبعت على عنوان المحكمة فى البلد نفسها بيكون باللغة الرسمية للدولة
الخطاب يكون موقع باليد من صاحب التظلم
طيب بالنسبة للخطاب نفسه اللى هو أهم جزء فى عملية التظلم كلها
ودة لى مقال لواحده اللى هو الجزء التانى .. ( شرح مبسط لخطاب التظلم علي فيزا الشنغن المرفوضة )
(1) نموذج الرفض
https://eeas.europa.eu/…/annex_vi_visa_refusal_form_en_0.pdf
(2) إجراءات التظلم فى السفارة الألمانية
http://m.kairo.diplo.de/…/53…/rk_merkblatt_remonstration.pdf
المصدر : صفحة Traveller Experience
