كل ما تحتاج معرفته لزيارة معبد خنوم في اسنا 2020، الأسعار والمواعيد وسبب التسمية
من أشهر المعابد الموجودة في مصر وده بسبب إنه لسه محتفظ على النقوش اللي فيه بألوانها الزاهية بشكل جيد ده غير السقف الخاص بيه واللي يعتبر من أجمل الأسقف الموجودة في المعابد المصرية كلها وعشان كده هنتكلم النهاردة بتفاصيل أكتر عن الإله خنوم وتاريخه وإكتشاف معبده ده غير مواعيد الزيارة وسعر التذاكر..
.jpg)
إكتشاف معبد خنوم
المعبد تم إكتشافه وتنظيفه من الرديم سنة 1843م في أواخر عصر محمد علي باشا، وكان سبقه زيارة العالم الفرنسي شمبليون سنة 1828م وذكر إنه شاف نقوش في المعبد تحمل اسم الملك تحتمس.. ويعتقد إن المعبد الحالي تمت إقامته على أطلال معبد قديم بيرجع لعصر الأسرة ال18 بين 1468-1436 قبل الميلاد واللي اتذكر فيها مدينة إسنا بإسمها، ولكن تهدم المعبد بعدها وتم إعادة بناؤه من جديد في العصر الصاوي للأسرة ال26..
مين هو الإله "خنوم"
في الدين المصري القديم كان بيتم تصوير الإله خنوم على شكل كبس له جسد إنسان وكان بيتم الإعتقاد إن الإله ده هو اللي بيقوم بعملية الخلق المادي للإنسان من طمي النيل، فالرواية كانت بتقول إنه بيشكّل الأطفال الصغيرين من طمي النيل المتوفر عند أسوان وبعدين يضعهم في أرحام أمهاتهم وكانت عبادته منتشره في أماكن كتيرة في مصر زي أسوان وإسنا وممفيس وغيرهم..
معبد خنوم عبارة عن ايه؟
المعبد موجود على بُعد 100م من نهر النيل وبينخفض بعمق 9م عند مستوى الأرض الحالي لمدينة إسنا وتقدر تنزل له عن طريق سلم، وتم تخصيصه لعبادة الثالوث خنوم ونيت ومنحيت، وبيحمل سقف صالة المعبد 24 أسطوانة بإرتفاع 13م وعليها نقوش وزخرفة بألوان زاهية ومتميزة، وبتعتبر من أجمال صالات الأعمدة في مصر وده بسبب تماثل النسب وطريقة نحت تيجان الأعمدة ولإنها لسه محتفظة بحالة جيدة لحد الآن
موقع معبد خنوم
المعبد موجود في مدينة إسنا على بعد 160 كم شمال مدينة أسوان 65 كم جنوب الأقصر، وتقدر توصل إسنا عن طريق القطر أو ميني باص من أسوان وبتاخد وقت حوالي ساعتين..
مواعيد معبد خنوم في أسوان
تقدر تزور المعبد طول أيام الأسبوع حتى في أيام الجمعة والسبت والعطلات الرسمية من 9 الصبح ولحد 5 مساءً..
أسعار تذاكر معبد خنوم في أسوان
السعر بيختلف حسب جنسية الزائر فمثلا هنلاقي إن سعر التذكرة للأجانب 80 جنيه وللطلبة الأجانب 40 جنيهأ، أما المصريين فسعر التذكرة ب 10 جنيه وللطالب ب 5 جنيه.
