كل ما تحتاج معرفته لزيارة غرب سهيل في أسوان 2020، أهم المزارت وسبب التسمية
غرب سهيل هي واحدة من أهم القرى في محافظة أسوان، فطبيعتها البسيطة واحتفاظها بالتقاليد النوبية الأصيلة جعلت منها متحف مفتوح للحياة النوبية، خاصة بعد ما قرر أكتر من 50 بيت في القرية تعديل بيوتهم عشان تستقبل السياح.. وبرغم إن بداية غرب سهيل السياحية كانت في سنة 2004م إلا إنها حققت نجاح كبير وتعتبر تجربة فريدة من نوعها وعشان كده هنتكلم أكتر في المقالة دي عن تاريخ القرية وإزاي اتحولت لمكان سياحي وممكن تعمل ايه هناك ده غير موقع القرية وإزاي توصلها وسبب تسميتها بالإسم ده..
تاريخ قرية غرب سهيل
هي واحدة من أهم قرى النوبة في جنوب ميدنة أسوان، بدأ الناس تسكنها بكثافة من حوالي 100 سنة بعد بناء خزان أسوان القديم سنة 1902م وده نتيجة لهجرة كتير من سكان الجزر اللي تضررت من بناء السد، وعاشت القرية زي كتير من قرى النوبة في فقر وبطالة لحد ما اتغير الوضع بالتدريج مع إفتتاح متحف النوبة سنة 1997م وقيام شباب القرية بحكي الحياة النوبية بكل تفاصيلها لحد ما جت فكرة تحويل قريتهم لمتحف مفتوح يحكي عن عادات وتقاليد النوبة على أرض الواقع، خاصة إن غرب سهيل متعرضتش للتهجير ومعظم أهلها من النوبيين وهم الأقدر على حكي تراثهم على الطبيعة..
تحول غرب سهيل لمكان سياحي!
البداية كانت من الأهالي اللي قرروا يعملوا تعديلات صغيرة على بيوتهم عشان يكون فيها ورش ومصانع صغيرة للمشغولات اليدوية النوبية، ده غير أماكن لضيافة السياح.. وبدأت أفواج كتيرة تيجي تزور القرية وتشوف البيوت النوبية الملونة والأكل واللبس النوبي على الطبيعة، وده شجّع كتير من الأهالي إنهم يهيئوا بيوتهم لإستقبال الأجانب وأفواج السياحة الداخلية لحد ما وصلت لأكتر من 50 بيت في القرية، وده جعل القرية مزار سياحي مهم في مدينة أسوان برغم كل المزارات التاريخية الفرعونية اللي موجودة فيها..
سبب تسمية القرية بالاسم ده؟
قرية غرب سهيل موجودة غرب نهر النيل وخاصة غرب جزيرة سهيل التاريخية، واللي كانت جزيرة مقدسة لعبادة الآلهه خانوم، ومن هنا جت التسمية ب "غرب سهيل" ولكن ده سبب خلط لإسم الجزيرة الأصلي والبعض بيقول عليها "جزيرة غرب سهيل" وده طبعًا اسم مش مظبوط..
ايه الحاجات اللي ممكن تعملها في غرب سهيل؟
غالبًا ما بيبدأ اليوم بالوصول للقرية عن طريق نهر النيل في مراكب شراعية وبتوصل عند سفح رملى اسمه "بربر" وهناك هيكون فيه قافلة جمال تنقل الزوار داخل القرية وهناك تقدر تتجول براحتك داخل البيوت النوبية وتجرب الأكل النوبي وتتفرج على التماسيح اللي بيربوها في البيوت والبنات يقدروا يرسموا الحنة وهتكون فكرة رائعة لو أنهيت اليوم بقاعدة لطيفة على واحدة من قهاوي القرية اللي بتطل مباشرة على النيل..
موقع قرية غرب سهيل في أسوان
القرية موجودة غرب جزيرة سهيل وبتبعد حوالي 15 كم عن مدينة أسوان، ولها طريقين للوصول إليها، الأول بري عن طريق كوبري خزان أسوان، أما التاني عن طريق نهر النيل بمراكب شراعية ودي الوسيلة المفضلة لمعظم زوار القرية..
