جزيرة الفنتين في اسوان (سبب التسمية ، اهم المزارات، موقعها وازاي تروحها )

كل ما تحتاج معرفته لزيارة جزيرة الفنتين في أسوان 2020، أهم المزارت وسبب التسمية

تعتبر جزيرة الفنتين من أهم المزارات السياحية في مدينة أسوان، فبرغم صغر مساحتها اللي بتبلغ 1500م طول و500م عرض، إلا إنها كانت مركز التجارة الرئيسي على مدار عصور كتير بين الجنوب والشمال ده غير إنها كانت مركز للقاعدة العسكرية البريطانية لحدود مصر الجنوبية، بالإضافة لطابعها النوبي المميز وسكانها النوبيين اللي لسه محافظين على البيوت الملونة واللبس النوبي، كل دي أسباب تخلينا نتكلم النهاردة عن الجزيرة دي وعن تركيبة السكان فيها وإزاي تقدر توصلها وأهم المزارات فيها وسبب التسمية.. 

سكان جزيرة الفنتين في أسوان

أغلب سكان الجزيرة من "النوبيين الكنوز" وعددهم بين 5 آلاف إلى 7 آلاف، وبيعيشوا في قريتين وسط الجزيرة وهم "سيو" و "كوتي" وأغلب سكّان الجزيرة شغّالين في الأعمال اليدوية والسياحة، الجزيرة لسه محتفظة بالطابع النوبي فهتشوف هناك البيوت الملونة والشوارع الرملية ده غير اللبس النوبي زي الجرجار للستات والجلابية والعمة "الكاسر" للرجالة.. 

موقع جزيرة الفنتين 

الجزيرة موجودة في قلب مدينة أسوان، وعشان توصلها من السوق القديم هتتمشي حوالي 10 دقايق لحد ما توصل لمحكمة أسوان الإبتدائية وهناك موجود مرسى الجزيرة، تقدر تاخد أي مركب أو فلوكة تنقلك على الجزيرة.. 

سبب تسمية الجزيرة بالاسم ده؟

اتعرفت الجزيرة في النصوص المصرية القديمة بإسم "أبو" بمعنى الفيل وده لإن الجزيرة كانت ميناء مهمة لإستقبال العاج الأفريقي المستخرج من ناب الأفيال، وبعدين اتحولت في اللغة اليونانية إلى "الفنتين" ومعني عاج سن الفيل وفضل الإسم ده لحد دلوقتي هو الإسم المتعارف عليه للجزيرة.. 

معابد جزيرة الفنتين في أسوان

بدأت أعمال البناء على الجزيرة في أواخر عصور ما قبل التاريخ واستمرت للعصر الإسلامي المبكر، بدأت المعابد في الجزيرة من خلال "ساتت" وهي آلهه الفيضانات وده بدأ مع الأسرتين الأولى والتانية في حدود 2800 قبل الميلاد، أما المعبد التاني فكان في بداية الأسرة السادسة سنة 2250 قبل الميلاد تقريبًا، والتالت بناه الملك سنوسرت الأول سنة 1950 قبل الميلاد، وأخيرًا المعبد اللي بنته الملكة حتشبسوت سنة 1480 قبل الميلاد تقريبًا، ده غير معبد الآله "خنوم" واللي اتنهبت حجارته ومبتقاش منه غير عمود المدخل الرئيسي، واستمر البناء في عصر الأسرة 26 وبنوا مقياس للنيل واستمر استخدامه لحد وقت قريب، ومن بعدهم اهتم ملوك البطالمة والرومان بالجزيرة وسجلوا أسمائهم على جدران المعابد.. 

متحف الفنتين في أسوان

هو أول متاحف أسوان وتم افتتاحه سنة 1917م في الجزيرة وعشان كده بيعرف بإسم متحف الفنتين، بعد ما كان مقر لكبير مهندسي خزان أسوان "السير وليم ولكوكس" سنة 1898م، المتحف بيحتوي على آثار لكل الحضارة المصرية من عصر ما قبل الأسرات ولحد العصر الإسلامي وعشان كده يعتبر من أهم المتاحف الموجودة في أسوان وده أدى لإهتمام وزارة الآثار بيه في الفترة الأخيرة وأعادت ترميمه وتطويره بتكلفة وصلت 20 مليون جنيه.. ولمعلومات أكتر عن المتحف ومواعيد زيارته من هنـــــــــــا