جزيرة-النباتات-مزار-ساحر-يقع-في-احضان-النيل-بأسوان

كل ما تريد معرفته عن حديقة النباتات (تاريخها، محتوياتها، موقعها، مواعيد الزيارة، الاسعار)

تعتبر جزيرة النباتات من أقدم الحدائق في العالم ده غير احتوائها على أشجار ونباتات نادرة، ولأهميتها السياحية والتاريخية هنتكلم النهاردة عن تاريخها وإزاي بدأت ومحتوياتها ومواعيد الزيارة وأسعار التذاكر.

17-يونيو-2020 Shaimaa Salah مشاهدات: 8087

كل ما تحتاج معرفته لزيارة جزيرة النباتات في أسوان 2020، الأسعار والمواعيد وسبب التسمية

تعتبر جزيرة النباتات واحدة من أهم المزارات السياحية في مدينة أسوان، فهي من أقدم الحدائق في العالم ده بالإضافة لاحتوائها على أشجار ونباتات نادرة، الجزيرة اللي استقبلت كتير من الشخصيات المهمة زي جوزيف تيتو رئيس يوغوسلافيا ونهرو رئيس وزارء الهند والملكة إليزابيث ملكة بريطانيا اتبنت سنة 1898م أثناء الإحتلال الإنجليزي لمصر، ولأهميتها السياحية والتاريخية الكبيرة هنتكلم النهاردة عن تاريخها وإزاي بدأت ومحتوياتها ومواعيد الزيارة وأسعار التذاكر..

تاريخ حديقة النباتات في أسوان

كانت بيستوطنها النوبيين وسموها "حديقة النطرون" وفي أواخر القرن ال19 إستخدمها الإنجليز كقاعدة عسكرية وسموها جزيرة السرادار، لكن الملك فؤاد الأول قام بتغيير إسمها لجزيرة الملك وبعد ثورة 52 أمر الرئيس جمال عبدالناصر بتسميتها بإسمها الحالي "جزيرة النباتات"

إزاي بدأت حديقة النباتات

لما وصل اللورد كيتشنر لموقع الحديقة كان فيه عدد من أهالي الجزيرة اللي بيزرعوا محاصيل عادية زي الدرة والبرسم والقمح، فطردهم وبدأ إنشاء مبني لقيادة حملته العسكرية – المبني لسه موجود وهو حاليًا مبني إدارة الحديقة – ومع الحرارة الشديدة على الجزيرة جت فكرة زيادة الزراعة عليها، فأمر الجنود اللي بينتموا لبلاد مختلفة زي الهند ووسط إفريقيا وغيرها إنهم يجيبوا معاهم نباتات مختلفة من بلادهم، وده فعلًا اللي حصل ومن هنا كان التنوع النباتي الكبير في الجزيرة...

حديقة النباتات عبارة عن ايه؟

الحديقة موجودة على مساحة 17 فدان، وبتضم حوالي 700 نوع مختلف من أنحاء العالم وزادت الأنواع مؤخرًا من 400 نوع سنة 2011م لحد ما وصلوا 695 نوع حاليًا، الحديقة متقسمة 7 قطاعات رئيسية، وهي الأشجار الخشبية زي الأبنوس، وأشجار الفواكه الإستوائية زي الباباظ، والنباتات الطبية والعطرية زي التمر الهندي، ونباتات التوابل زي الشطة، ونباتات الزينة زي الفل والياسمين، والنباتات الزيتيتة زي جوز الهند والزيتون، وأخيرًا مجموعة النخيل زي نخيل الدوم ونخيل البلح..

موقع حديقة النباتات

الحديقة موجودة في جزيرة وسط النيل في مدينة أسوان وعشان كده بتتسمى "جزيرة النباتات" ويعتبر موقعها فريد جدًا وده لإنها بتطل على الجبل الغربي الغني بالكنوز الفرعونية واللي بيبدأ بمقابر النبلاء وينتهي بمقبرة أغاجان، الجزيرة بتبعد حوالي 6 كم عن السوق القديم في وسط أسوان ولو هتروح بالعربية أو بتاكسي فهتاخد حوالي 15 دقيقة للوصول لها..