كل ما تحتاج معرفته لزيارة معبد كلابشه في أسوان 2020، الأسعار والمواعيد وسبب التسمية
يعتبر من أهم المزارات الأثرية للعصر الروماني، واتبني لعبادة إله الشمس في النوبة وعشان كده تم تصميمه بحيث إن الشمس تتعامد على حجرة قدس الأقداس مرتين في السنة.. واتنقل المعبد لموقعه الحالي بالقرب من أسوان بسبب الخوف من غرقه بسبب السد العالي بعد ما كان بيتغطي بالمياه 9 شهور في السنة بسبب خزّان أسوان، وللأهمية الكبيرة لمعبد كلابشة فهنتكلم أكترعن تاريخ إنشاء المعبد ومحتوياته ومواعيد الزيارة وأسعار التذاكر..
تاريخ معبد كلابشه في النوبة
اتعرف المعبد بإسم معبد "ماندوليس" واتبنى سنة 30 قبل الميلاد خلال الحكم الروماني لمصر لعبادة الإله "ماندوليس" وهو إله الشمس عند النوبيين، المعبد تم بناءه على أطلال معبد تاني للملك امنحوتب التالت ويعتبر تاني أكبر معابد النوبة بعد معبد أبو سمبل، وخلال العصر القبطي تم تحويله لكنيسة وده ظهر من النقوش القبطية الموجودة على جدرانه، وتم نقله من موقعه القديم – حوالي 50 كم جنوب أسوان – بسبب السد العالي والخوف من غرقه وبالفعل اتنقل للموقع الجديد بقرب السد العالي بدعم من الحكومة الألمانية
معبد كلابشه عبارة عن ايه؟
أهم ما يميز معبد كلابشه هو النقوش اللي بتحكي كتير عن تاريخ الفترة دي زي نقوش الإله ماندوليس ونقوش مرتبطة بإيزيس وأوزوريس وحورس وبتاح ده غير النقوش المسيحية اللي اتعملت بعد تحوله لكنيسه، وفي سنة 250م اتعمل نقوش جديدة في المعبد لمنع تربية الخنازير أو دخولها، وأخيرًا فالمعبد بيوثق انتصارات الملك النوبي سيلكو واللي كان بيمثل فيها نفسه كجندي روماني على ظهر فرس..
موقع معبد كلابشه
المعبد موجود 20 كم جنوب مدينة أسوان، وقريب جدًا من السد العالي وجزيرة فيلة وعشان كده بنرشح انك تزورهم الاتنين سوا في يوم واحد، وفيه جولات يومية لزيارتهم سوا فتقدر تروح في أي واحدة فيهم عشان متدفعش الانتقالات لوحدك، اسأل بس في الفندق اللي نازل فيه وهما هيقدروا يوصلوك لأفضل اختيار بالنسبة لك..
مواعيد معبد كلابشه في أسوان
تقدر تزور المعبد طول أيام الأسبوع حتى في أيام الجمعة والسبت والعطلات الرسمية من 9 الصبح ولحد 5 مساءً..
أسعار تذاكر معبد كلابشه في أسوان
السعر بيختلف حسب جنسية الزائر فمثلا هنلاقي إن سعر التذكرة للأجانب 60 جنيه وللطلبة الأجانب 30 جنيهأ، أما المصريين فسعر التذكرة ب 10 جنيه وللطالب ب 5 جنيه..
