كل ما تحتاج معرفته لزيارة معبد كوم امبو في أسوان 2020، الأسعار والمواعيد وسبب التسمية
هو واحد من أهم وأجمل المعابد في مصر، وتميّز تصميمه وخاصة جدرانه بالزخرفة الرهيبة وجمال الألوان خلوه تحفة أثرية باقية لأكتر من 2000 سنة، بعد بناه في العصر الروماني في عهد بطليموس السادس سنة 180 قبل الميلاد، معبد كوم امبو يعتبر من المزارات الرئيسية في أسوان وعشان كده هنتكلم النهاردة عن تاريخه وسبب تسميته ده غير مواعيد الزيارة وسعر التذاكر..
.jpg)
معبد كوم امبو عبارة عن ايه؟
معبد كوم امبو هو الوحيد في الحضارة المصرية اللي تم بناؤه لعبادة إلهين بالتساوي، بعكس باقي المعابد اللي اتبنت لعبادة إله واحد، المعبد تم تكريسه لعبادة الإله "سوبك" في الجزء الجنوبي والإله "حورس" في الجزء الشمالي، المميز جدًا في معبد كوم امبو هو جدرانه بنقوشها المختلفة والملونة بشكل رائع، ده غير الأسقف المزينة بمناظر الآلهه ومناظر فلكية غير مكتملة ومؤرخة لعصر الملك بطليموس الثاني عشر..
سبب تسمية معبد كوم امبو بالإسم ده
كوم امبو مكونة من جزأين، الأول هو كلمة "كوم" ومعناها تل، أما الجزء التاني وهو "امبو" فهو متحرف من كلمة "انبو" ومعناه الدهب، وده عشان كانت المنطقة دي بتتحكم في الطرق المؤدية لمناجم الدهب واتعرفت في النصوص المصرية القديمة بإسم "با-سوبك" أي مقر سوبك وده إله من عصر ما قبل الأسرات..
موقع معبد كوم امبو
المعبد موجود في مدينة كوم امبو موجود في محافظة أسوان، على بعد 46 كم شمال مدينة أسوان و135 كم جنوب الأقصر، وتقدر توصل كوم امبو عن طريق القطر أو ميني باص من أسوان وبتاخد وقت حوالي ساعة..
مواعيد معبد كوم امبو في أسوان
تقدر تزور المعبد طول أيام الأسبوع حتى في أيام الجمعة والسبت والعطلات الرسمية من 6 الصبح ولحد 8 مساءً..
أسعار تذاكر معبد كوم امبو في أسوان
السعر بيختلف حسب جنسية الزائر فمثلا هنلاقي إن سعر التذكرة للأجانب 140 جنيه وللطلبة الأجانب 70 جنيهأ، أما المصريين فسعر التذكرة ب 20 جنيه وللطالب ب 5 جنيه، والتذكرة بتشمل معبد كوم أمبو ومتحف التمساح..
