بالصور والاسعار : ما لا تعرفه عن متحف النيل بأسوان اهم متاحف مصر الحديثة لتوثيق كلما يخص نهر النيل

هو واحد من أحدث المتاحف اللي تم إفتتاحها في مصر وبيوثق كل ما يتعلق بنهر النيل من بدايته في أفريقيا وحتى المصب في فرعي دمياط ورشيد، وبتعود أهمية المتحف لتوثيقه لمشروعات كبيرة زي السد العالي والقناطر الخيرية ده غير الصور واللوح الفنية والقطع الأثرية اللي بتحكي رحلة نهر النيل في مصر وعشان كده هنتكلم النهاردة عن متحف النيل وتاريخ إنشاءه وأهم محتوياته ومواعيد الزيارة وسعر التذاكر الخاصة به..

 

 

بدأ العمل في متحف النيل سنة 2004م ولكن تم إفتتاحه رسميًا في 10 يناير 2016 بحضور رئيس الوزراء المصري وممثلي 11 دولة إفريقية وهم دول حوض النيل، المتحف موجود على مساحة 146 ألف متر وبتكلفة وصلت 82 مليون جنيه.. 

 

 

بيتكون المتحف من 3 طوابق، وبيضم مئات من الصور والمقتنيات اللي بتحكي تاريخ النيل والمشروعات المصرية اللي اتعملت على النيل زي القناطر الخيرية ومشروع توشكى، المتحف فيه حوالي 250 قطعة أثرية بتسجل رحله جريان النيل من منبعه وحتى المصب في البحر المتوسط، ده غير 61 لوحة فنية هامة أهدتهم وزارة الثقافة للمتحف بيتناولوا رحلة نهر النيل في مصر، ويوجد جزء كبير مخصص لعرض تاريخ السد العالي وتخليد الشهداء اللي سقطوا أثناء إنشاؤه.. وأخيرًا فالمتحف بيضم قاعات عرض ومؤتمرات ومكتبة وقاعة كبار زوار ده بالإضافة لمساحات خضراء كبيرة ومنطقة مجرى العيون.. 

 

 

متحف النيل موجود جنوب أسوان بحوالي 7 كم، وفي ترتيب المزارات في أسوان بننصحك إنك تزور المتحف مع معبد فيلة في يوم واحد وده لإنه بيبعد عن مرسى جزيرة فيلة حوالي 2 كم.. 

 

 

تقدر تزور متحف أسوان طول أيام الأسبوع  حتى في أيام الجمعة والسبت والعطلات الرسمية من 9 الصبح ولحد 5 مساءً..

 

 

السعر بيختلف حسب جنسية الزائر فمثلا هنلاقي إن سعر التذكرة للأجانب 75 جنيه وللطلبة الأجانب 50 جنيهأ، أما المصريين فسعر التذكرة ب 15 جنيه وللطالب ب 10 جنيه.. وتقدر تزور متحف النيل ورمز الصداقة والسد العالي بتذكرة واحدة سعرها 90 جنيه وللطلبة 30 جنيه، وللأجانب 240 جنيه وللطالب الأجنبي 130 جنيه..