كل ما تحتاج معرفته لزيارة متحف أسوان 2020، أهم المحتويات والأسعار والمواعيد
هو أول متاحف أسوان وتم افتتاحه سنة 1917م في جزيرة ألفنتين وعشان كده بيعرف بإسم متحف الفنتين، المتحف بيحتوي على آثار لكل الحضارة المصرية من عصر ما قبل الأسرات ولحد العصر الإسلامي وعشان كده يعتبر من أهم المتاحف الموجودة في أسوان وده أدى لإهتمام وزارة الآثار بيه في الفترة الأخيرة وأعادت ترميمه وتطويره بتكلفة 20 مليون جنيه وعشان كده هنتكلم النهاردة عن المتحف ده وتاريخ إنشاءه وأهم محتوياته ومواعيد الزيارة وسعر التذاكر الخاصة به
تاريخ إنشاء متحف أسوان
اتبني المتحف في البداية كمقر لكبير مهندسي خزان أسوان "السير وليم ولكوكس" سنة 1898م ولكن بعد بناء سد أسوان بدأ تحويل المقر ده لمتحف سنة 1912م واللي تم إفتتاحه رسميًا بعد 5 سنين وبالتحديد سنة 1917م عشان يحتوي على آثار منطقة النوبة اللي تم العثور عليها قبل إنشاء الخزان، وبيرجع تاريخ الأثار دي إلى عصر ما قبل الأسرات..
متحف أسوان عباره عن إيه؟
بيحتوي المتحف على مقتنيات وقطع أثرية من عصور ما قبل الأسرات مرورًا بالعصر الفرعوني والبطلمي والروماني وحتى العصر القبطي والإسلامي! المتحف فيه بعض المومياوات للكبش رمز الإله "خنوم" وأنواع مختلفة من الفخار وعدد من التوابيت ده غير تماثيل الملوك وأدوات الحياة اليومية عند المصريين القدماء وبعض اللوحات الجنائزية..
موقع متحف أسوان
متحف أسوان موجود في جنوب جزيرة الفنتين في مدينة أسوان، وعشان توصل للجزيرة هتتمشي من السوق القديم – حوالي 10 دقايق – لحد ما توصل لمحكمة أسوان الإبتدائية ومن هناك هتاخد عبّارة أو فلوكة تنقلك على الجزيرة وأقل من 5 دقايق وتكون في المتحف..
مواعيد متحف أسوان
تقدر تزور متحف أسوان طول أيام الأسبوع حتى في أيام الجمعة والسبت والعطلات الرسمية من 9 الصبح ولحد 5 مساءً..
أسعار تذاكر متحف أسوان
السعر بيختلف حسب جنسية الزائر فمثلا هنلاقي إن سعر التذكرة للأجانب 140 جنيه وللطلبة الأجانب 70 جنيهأ، أما المصريين فسعر التذكرة ب 20 جنيه وللطالب ب 5 جنيه..
