كل ما تحتاج معرفته عن متحف النوبة في أسوان 2020، الأسعار والمواعيد
هو واحد من أهم المتاحف المصرية الموجودة في أسوان ومهم جدًا لحفظ الحضارة النوبية وده بسبب المعلومات اللي بيوفرها عن تاريخ النوبة من عصور ما قبل التاريخ ولحد النهاردة، خاصة مع إندثار أجزاء كبيرة من أرض الحضارة دي مع غرق كتير من القرى النوبية بسبب بناء السد العالي وظهور بحيرة ناصر.. ده غير إن المتحف بيستعرض أهم العادات والتقاليد النوبية واللغة النوبية العريقة وعشان كده هنتكلم النهاردة عن المتحف وتاريخ إنشاءه ومحتوياته وإزاي توصله ومواعيده وأسعار التذاكر..
تاريخ إنشاء متحف النوبة في أسوان
المتحف تم افتتاحه رسميًا للجمهور سنة 1997م كجزء من حملة اليونسكو الدولية لإنقاذ معابد وآثار النوبة القديمة واللي بدأت سنة 1960م.. والمتحف هو نتاج لأعمال التنقيب في المناطق النوبية اللي هتغرق بعد كده بسبب بناء السد العالي، المساحة الكلية للمتحف حوالي 50 ألف متر منهم 7 آلاف متر للمبني، وهو من تصميم المهندس المصري محمود الحكيم واستوحى التصميم من المعمار التقليدي للقرية النوبية وده اللي خلاه أحد الفائزين بجائزة أغاخان للعمارة في سنة 2001م..
متحف النوبة عباره عن إيه؟
بيحتوي المحتف على مقتنيات وقطع أثرية من عصور ما قبل التاريخ ولحد الوقت الحالي، فهنلاقي أحجار كريمة متنوعة وطرق الدفن والفخار ده غير التماثيل البشرية والحيوانية الصغيرة المصنوعة من الطمي المحروق.. من أبرز المعروضات هيكل عظمي من عصر ما قبل التاريخ ومقابر قسطل وبلانة والاسلحة الحديدية والتيجان المصنوعة من الفضة والمرصعة بالعقيق وسروج الخيل.. ده غير معرض اثنوجرافي خاص بالمجتمع النوبي التقليدي قبل التهجير..
موقع متحف النوبة في أسوان
متحف النوبة موجود في قلب مدينة أسوان على بعد 2 كم من السوق القديم و3 كم من محطة قطار أسوان، لو حبيت تتمشى هتكون فكرة جميلة وهتعدي على حديقة فريال، والمسلة الناقصة ومقابر الفاطميين، أما لو هتروح مواصلات فالأفضل تاخد تاكسي وسعره 15 – 20 جنيه بالكتير من وسط المدينة..
مواعيد متحف النوبة في أسوان
تقدر تزور متحف النوبة طول أيام الأسبوع حتى في أيام الجمعة والسبت والعطلات الرسمية من 9 الصبح ولحد 5 مساءً..
أسعار تذاكر متحف النوبة في أسوان
السعر بيختلف حسب جنسية الزائر فمثلا هنلاقي إن سعر التذكرة للأجانب 140 جنيه وللطلبة الأجانب 70 جنيهأ، أما المصريين فسعر التذكرة ب 20 جنيه وللطالب ب 5 جنيه..
