يعنى إيه شنغن ؟ إيه هى تأشيرة الشنغن و ممكن أروح بيها فين و أخدها إزاى ؟
سؤال بيتكرر كتير خصوصا من الناس الجديدة فى عالم السفر و بتشوف المصطلح لأول مرة
الشنغن ببساطة هى إتفاقية وقعت عليها مجموعة من الدول الأوروبية و بموجب الإتفاقية دى أصبح فى حرية حركة و تنقل داخل حدود الدول الأعضاء الموقعين على الإتفاقية
يعنى الدول دى أصبحت بمثابة كيان واحد أو دولة كبيرة بتضم مجموعة من الأعضاء مافيش حدود داخلية بينهم مع إحتفاظ كل دولة بسيادتها على أراضيها و ممكن تتنقل بينهم بأى وسيلة سواء طيران أو باص أو قطار و لما بتسافر طيران بيكون سفر داخلى بدون أختام كأنك مسافر بين إسكندرية و القاهرة طيران مثلا
اولا : إتفاقية الشنغن وقع عليها 26 دولة هم:
1- النمسا - 2- بلجيكا - 3- التشيك - 4- الدنمارك - 5 - إستونيا - 6- فنلندا - 7- فرنسا - 8- ألمانيا - 9- اليونان - 10- المجر - 11- أيسلندا - 12- إيطاليا - 13- لاتيفيا - 14 - ليتوانيا - 15 - لوكسمبورج - 16- مالطا - 17- هولندا - 18 - النرويج - 19- بولندا - 20 - البرتغال - 21 - سلوفاكيا - 22 - سلوفينيا - 23 - أسبانيا - 24 - السويد - 25 - سويسرا - 26 - ليخنشتاين
و بالتالى أى حد بيقدم على تأشيرة لدولة من الدول دى يقدر يسافر لأى دولة من الدول الأعضاء
- فى تلات دول مش أعضاء فى الشنغن بس بيسرى عليهم الشنغن بحكم أن حدودهم تقع داخل حدود دول و هم سان مارينو و الفاتيكان فى إيطاليا و إمارة موناكو فى فرنسا
- و فى تلات مناطق خارج حدود أوروبا بس لهم عضوية خاصة فى الشنغن و هم الأزور - ماديرا - جزر الكنارى
- طيب هل كل الدول الأعضاء فى الإتحاد الأوروبى أعضاء فى الشنغن ؟
غالبية الدول الأعضاء فى الإتحاد الأوروبى أعضاء فى الشنغن
بس فى بعض الدول أعضاء فى الإتحاد الأوروبى و مش أعضاء فى الشنغن
و فى بعض الدول الموقعين على إتفاقية الشنغن بس مش أعضاء فى الإتحاد الأوروبى
(الخريطة المرفقة موضحة الفرق)
- دول الإتحاد الأوروبى الغير موقعين على إتفاقية الشنغن هم 6 دول
إنجلترا (قبل الـ Brexit ) و جمهورية أيرلندا و دول رافضين لفكرة الحدود المفتوحة و متبنيين سياسة الـ opt out و لهم تأشيرات خاصة بيهم (بس المواطنين الأوروبيين بيسافروا عادى)
و فى أربع دول هم بلغاريا - رومانيا - قبرص - كرواتيا هينضموا للشنغن لما يستوفوا الشروط .
الأربع دول لهم تأشيرات مستقلة يعنى لو أخدت تأشيرة دولة منهم ماتقدرش تسافر بيها لدولة من دول الشنغن (فى إتفاقية بين الأربع دول لو معاك تأشيرة متعددة الدخول لدولة منهم تقدر تدخل التلاتة التانيين بس الموضوع بيخضع لإجراءات الدخول فى كل دولة فيهم)
و على العكس إذا كان معاك تأشيرة شنغن متعددة الدخول ممكن تدخل بيها دولة من الدول الأربعة
- التلات دول الأعضاء فى الشنجن و مش أعضاء فى الإتحاد الأوروبى هم النرويج - أيسلندا - و سويسرا
الشنغن فئة C هى تأشيرة قصيرة للإقامة لفترة لا تزيد عن 90 يوم كل 180 يوم و أغراضها:
- السياحة
- الزيارة
- حضور مؤتمر أو معرض
- حضور كورس أو التدريب
- العلاج لفترة قصيرة
و الشنغن بتختلف عن التأشيرة المحلية من الفئة D اللى بتكون خاصة بالدولة المصدرة و بتكون للإقامة لفترة طويلة أكتر من 90 يوم و أغراضها:
- لم الشمل
-الدراسة
- العمل
-العلاج لفترة طويلة
و بتختلف التأشيرات الشنغن حسب قوانين كل دولة بمعنى إن إن مش كل الدول بتدى نفس الفترة و لا عدد مرات الدخول
فى دول بتمنحها دخول متعدد و صلاحية لمدة تلات شهور و إقامة لمدة 30 يوم زى فرنسا و هولندا مثلا
و فى دول بتمنحها دخول لمرة واحدة و بيكون محدد فيها فترة الإقامة حسب المطلوب فى الأبليكيشن زى اليونان و إيطاليا .... يعنى لو طلبت 10 أيام تاخد 10 أيام فى صلاحية شهر أو 20 يوم
كمان بتختلف المدة الممنوحة حسب كل حالة حسب تاريخ السفر للمتقدم و عدد مرات الحصول على شنغن قبل كده
بعض السفارات ممكن تمنحها لفترات أطول للناس اللى بتسافر كتير و سبق لها الحصول على الشنغن قبل كده
فى سفارات بتديها سنجل و فى سفارات بديها مالتى
*** تأشيرة دخول متعدد مالتى يعنى تقدر تسافر و ترجع أكتر من مرة خلال صلاحية التأشيرة و بشرط عدم تخطى عدد أيام الإقامة المحددة فى التأشيرة
***تأشيرة دخول واحد سنجل يعنى تسافر مرة واحدة فقط إلى منطقة الشنغن و تقدر تتحرك داخل دول الشنغن براحتك .... و تنتهى صلاحية التأشيرة بمجرد الخروج من منطقة الشنغن حتى لو كان متبقى أيام فى الصلاحية
يعنى مفيش قاعدة محددة .... كل سفارة بتدى التأشيرة حسب نظامها
نظام الشنغن كله أصبح مربوط ببعضه من خلال البصمة الألكترونية يعنى بيانات أى حد اتقدم للحصول على فيزا قبل كده بتظهر فى أى سفارة بتقدم فيها بعد كده و البيانات دى بتفضل محفوظة على السيستم لمدة 5 سنوات ....
المتطلبات أو المستندات المطلوبة و الإجراءات الخاصة للتقديم للحصول على التأشيرة الشنغن فى غالبية السفارات واحدة مع إختلافات فردية من سفارة لسفارة و على حسب نوع التأشيرة المطلوبة
ثانيا المستندات العامة المطلوبة لتأشيرة السياحة لدول الشنغن هى:
- جواز سفر سارى لمدة ٦ شهور (أو 3 شهور من تاريخ إنتهاء التأشيرة المطلوبة لبعض السفارات) وصور من الصفحات اللى عليها تاشيرات و اختام + جواز السفر السابق ان وجد
- عدد ٢ صورة شخصية خلفية بيضا مع مراعاة المعايير البيومترية المطلوبة لكل سفارة
- شهادة تحركات من مجمع التحرير لمن لم يسبق له السفر الى منطقة الشنجن (بعض السفارات بتكتفى بجواز السفر السابق ان وجد بشرط عدم مرور اكتر من شهر تاريخ انتهاء الجواز السابق و تاريخ اصدار الحالى و بعض السفارات زى فرنسا مش بتطلبها)
- تامين طبى دولى بقيمة ٣٠ الف يورو يغطى فترة الاقامة و بيطلع من اى شركة تأمين او سياحة و سعره بيتحدد حسب الفترة و السن
- حجز فندق مبدئى ممكن تعمله من بوكينج او من شركة سياحة
- حجز طيران مبدئى من اى موقع شركة طيران فيها اوبشن الدفع اللاحق او من شركة سياحة
- شهادة قيد للطلبة
او سجل تجارى و بطاقة ضريبية لاصحاب الاعمال الخاصة
او خطاب من جهة العمل HR للموظفين
أو برنت تأمينات من التأمينات الإجتماعية للمحالين على المعاش
نموذج خطاب HR
/webroot/uploads/imagesfiles/نموذج خطاب HR.docx
- كشف حساب توفير او جارى عن ٦ شهور ماضية (بعض السفارات بتطلب 3 شهور)
و ممكن الزوجة تقدم كشف حساب زوجها او الطلبة كشف حساب الاب او الام مع خطاب بالتكفل بالمصاريف و شهادة ميلاد فى حالة تقديم كشف حساب الام و عقد زواج عند تقديم الزوجة كشف حساب زوجها
(فى سفارات بتطلب نموذج عادى زى المرفق و سفارات بتطلب ورقة رسمية إما اقرار موثق بالشهر العقارى أو صحة توقيع من البنك الصادر منه كشف الحساب)
نموذج خطاب تكفل بالمصاريف
/webroot/uploads/imagesfiles/تعهد بالتكفل بالمصاريف(1).docx
فى حالة سفر القصر (تحت 18 سنة) بمفردهم لازم إقرار من الأبوين بموافقتهم على السفر - و فى حالة سفر القاصر مع أحد الوالدين دون الآخر لازم إقرار من الوالد الغير مسافر بموافقته على سفر الإبن مع الوالد الآخر
غالبية السفارات بتطلب الإقرار أنه يكون موثق فى الشهر العقارى
و البعض الآخر لازم حضور الوالد الغير مسافر و توقيعه بالموافقة أمام الموظف المختص
دى المستندات العامة .... فى مستندات زيادة بيتم طلبها على حسب نوع التأشيرة المطلوبة زى:
- دعوة فى حالة تأشيرة الزيارة أو فى حالة حضور مؤتمر أو معرض
- خطاب قبول فى حالة الدراسة
- تقرير طبى و قبول الحالة من الجهة المعالجة فى حالة تأشيرة العلاج
طبعا المستندات بتكون باللغة الانجليزية او لغة السفارة (المستندات باللغة العربية بيتم ترجمتها)
و زى ما قولنا يجب مراعاة الاختلافات الفردية فى طلبات السفارات و حسب نوع التأشيرة - و لمعرفة المستندات المطلوبة بالتفصيل يفضل الدخول على موقع السفارة أو موقع التقديم التابع لها
غالبية السفارات نقلت الخدمة إلى مكاتب وسيطة زى
TlS contact
VFS global
BLS
و من خلال مواقع المكاتب دى على الإنترنت بيتم ملأ الأبليكيشن و تحديد موعد للتقديم وأخذ البيانات البيومترية
المكاتب دى دورها أنها بتستلم المستندات و تسلمها للسفارة ثم تستلم الباسبور بعد البت فى الطلب و تسلمه لك سواء بتروح تستلمه بنفسك أو بيتبعت لك بالبريد على العنوان اللى بتحدده - يعنى المكاتب مالهاش أى علاقة بقرار منح التأشيرة
فى بعض الأحيان بيتم الإتصال ببعض المتقدمين من قبل السفارة و تحديد موعد للإنترفيو
ثالثا: أقدم فى أنهى سفارة من سفارات دول الشنغن
- فى حالة إنك مسافر بلد واحدة فقط يبقى بتقدم فى سفارة البلد اللى إنت مسافرها
- لو مسافر أكتر من بلد فى سفرية واحدة يبقى تقدم فى سفارة البلد اللى تعتبر الوجهة الرئيسية .... الوجهة الرئيسية يقصد بيها البلد اللى هتقضى فيها أطول فترة
* مثال لو مسافر إيطاليا و أسبانيا و فرنسا و هتقضى 4 أيام فى إيطاليا و 6 فى فرنسا و 4 فى أسبانيا يبقى تقدم فى سفارة فرنسا بإعتبارها الوجهة الرئيسية
طيب لو هتقعد عدد متساوى من الأيام فى كل بلد يعنى 4 فى إيطاليا و 4 فى فرنسا و 4 فى أسبانيا يبقى تقدم فى سفارة البلد اللى هتدخل منها
و فى حالة إنك هتذكر إنك مسافر أكتر من دولة يبقى لازم تقدم حجوزات بكل الدول اللى هتسافرها للسفارة
ايه أسهل سفارة أقدم فيها على تأشيرة الشنغن
السؤال ده من الأسئلة الشائعة و اللى مالهوش إجابة محددة لأن اللى أخد التأشيرة من سفارة معينة هيقول لك دى أسهل سفارة و اللى إترفض من نفس السفارة هيقول لك دى أصعب سفارة .... فى النهاية قانون الشنغن واحد لكن فى إختلافات فردية بين الدول يعنى ممكن سفارة تطلب ورق زيادة عن باقى السفارات زى إيطاليا بتطلب عقد عمل و برنت تأمينات و فى سفارات بتطلب ورق أقل زى فرنسا مش بتطلب شهادة تحركات بس فى النهاية معايير التقييم واحدة ... لكن دايما بننصح بالتقديم فى سفارات الدول السياحية زى فرنسا - هولندا - إيطاليا - أسبانيا و نبتعد عن الدول الغير مشهورة سياحيا بالنسبة لنا زى الدول الإسكندنافية لأنها تعتبر غالية نسبياً و خصوصا لو مافيش تاريخ سفريات قوى و مقنع للسفارة .... كذلك دول أوروبا الشرقية بيكون فى تشديد فى معايير القبول على إعتبار إن فى ناس بتاخدهم كوبرى للوصول للدول الكبرى
فى حالة قبول الطلب بيوصل لك الباسبور و عليه التأشيرة أما فى حالة الرفض - لا قدر الله - بيوصل مع الباسبور ورقة مطبوعة موضح بها أسباب الرفض و بيكون فى فرصة للتظلم أو الإعتراض خلال فترة معينة و بتختلف إجراءات التظلم من بلد لاخرى فى بلاد بتشترط إن الإجراء يكون من خلال محامى و بلاد أخرى ممكن تعمل التظلم و بتبعته على عنوان معين فى البلد نفسها غالبا بيكون مكتوب فى الورقة اللى فيها الرفض
و ده هنتكلم عنه فى مقال منفصل عن خطاب الرفض و كيفية التظلم على قرار الرفض..
المصدر : صفحة Traveller Experience
