اكتشف ابرز المعالم السياحية في اسوان وتعرف علي تفاصيل كل ما يخص زيارتك للسد العالي بالاسعار والمواعيد

كل ما تحتاج معرفته لزيارة السد العالي في أسوان 2020، الأسعار ومواعيد الزيارة 

هو واحد من أهم وأعظم المشروعات الهندسية في القرن العشرين وأول مشروع لتخزين المياه في دول حوض النيل، واجه كتير من التحديات برفض البنك الدولي لتمويل المشروع وكان السبب الرئيسي في قرار مصر لتأميم قناة السويس عشان تقدر تموّل بناء السد، وعشان كده عبدالحليم حافظ  قال "قلنا هنبنى و آدى احنا بنينا السد العالى، يا استعمار بنيناه بايدينا السد العالى" وبمناسبة مرور 60 سنة على بداية بناء السد العالي هنتكلم النهاردة عن تاريخ السد وإزاي تروحه ومواعيد الزيارة وأسعار التذاكر

تاريخ إنشاء السد العالي في أسوان

بدأ المشروع سنة 1952م بفكرة من المهندس المصري اليوناني أدريان دانينوس لمجلس قيادة الثورة لبناء سد ضخم عند أسوان لمنع فيضان النيل وتخزين مياهه وتوليد طاقة كهربائية منه، وبعد صعوبات كتيرة في تمويل السد بعد إنسحاب البنك الدولي بضغط من فرنسا وإنجلترا، وافقت روسيا على إقراض مصر 900 مليون روبل روسي وفي سنة 1964م كان القرار المهم بتحويل مجرى النيل وبداية تخزين المياه في بحيرة ناصر وبدأ تركيب المحطات والتوربينات لحد الإفتتاح الرسمي للسد واللي كان في يناير 1971م.. 

موقع السد العالي

السد العالي موجود على بعد 15 كم من أسوان وقريب جدًا من جزيرة فيلة وعشان كده بنرشح انك تزورهم الاتنين سوا في يوم واحد، وفيه جولات يومية لزيارة السد فتقدر تروح في أي واحدة فيهم عشان متدفعش الانتقالات لوحدك، اسأل بس في الفندق اللي نازل فيه وهما هيقدروا يوصلوك لأفضل اختيار بالنسبة لك.. 

مواعيد زيارة السد العالي في أسوان

تقدر تزور السد العالي طول أيام الأسبوع  حتى في أيام الجمعة والسبت والعطلات الرسمية من 9 الصبح ولحد 5 مساءًا 

أسعار تذكرة السد العالي في أسوان

السعر بيختلف حسب جنسية الزائر، فهنلاقي مثلًا إن سعر التذكرة للأجانب 100 جنيه ، وسعر التذكرة للمصريين 40 جنيه..