كل ما تحتاج معرفته لزيارة معابد فيلة في أسوان 2020، الأسعار والمواعيد
تعتبر معابد جزيرة فيلة من أشهر مزارات أسوان، وبدأ بناء المعابد في القرن التالت قبل الميلاد خاصة للإله إيزيس لتخليد قصته الإسطورية.. وبدأت المياه تحاصر الجزيرة بعد بناء سد أسوان سنة 1902م ومع فكرة وجود السد العالي كان لازم يتم انقاد معابد فيلة من الغرق وده استغرق سنتين بالفعل لحد ما قدروا ينقلوا القطع الهامة لجزيرة اجيليكا على بعد 500م من جزيرة فيلة، والنهاردة هنتكلم بتفاصيل اكتر عن الجزيرة ومحتوياتها وأهم المزارات فيها ومواعيد الزيارة وأسعار التذاكر.
جزيرة فيلة عبارة عن ايه؟
يعتبر "معبد إيزيس" هو المعبد الرئيسي في الجزيرة وبيحتل تقريبًا ربع مساحتها، واللي بناه كان الملك بطليموس الثاني مكان معبد آخر أصغر حجماً كان مكرس برده لعباده إيزيس ومخصص للجنود المكلفين بحماية حدود مصر الجنوبية.. الجزيرة فيها معبد لعبادة الإله حتحور ومقصورة "نختنبو الأول"، ومقصورة "طهرقا" اللي اتبنت برده لإيزيس.. أما عن أشهر أثار المعبد فهو كشك تراجان وبيرجع تاريخه للعصر الروماني وهو عبارة عن مبني مكون من 14 عمود أثري بيوضح الإمبراطور تراجان وهو بيقدم القرابين للملك إيزيس..
ليه جزيرة فيلة اتسمت بالإسم ده؟
كلمة فيلة مشتقة من الكلمة الإغريقية "فيلاي" ومعناها الحبيبة، واتعرفت في الأدب العربي بإسم "انس الوجود" نبسة لإسطورة أنس الموجودة في قصص ألف ليلة وليلة، أم الإسم المصري القديم والقبطي فهو بيلاك أو بيلاخ ومعناه الحد أو النهاية وده لإنها كانت آخر حدود مصر في الجنوب..
مواعيد معبد فيلة في أسوان
المعبد تقدر تزوره طول أيام الإسبوع من 7 الصبح ولحد 5م في الصيف ومن 7 الصبح لحد 4م في الشتاء.
أسعار تذاكر معبد فيلة في أسوان
السعر بيختلف حسب جنسية الزائر فمثلا هنلاقي إن سعر التذكرة للأجانب 180 جنيه وللطلبة الأجانب 90 جنيهأ، أما المصريين فسعر التذكرة ب 20 جنيه وللطالب ب 5 جنيه..
