كل ما يخص اسرار معبد ابو سمبل ( تاريخه ، محتوياته ، قصة نقله ، وموعد ظاهرة تعامد الشمس عليه )

كل ما تحتاج معرفته لزيارة معابد أبو سمبل في اسوان 2020، الأسعار والمواعيد 

هو واحد من أهم المعابد المصرية القديمة، اتنحت في الجبل في القرن ال13 قبل الميلاد في عهد الملك رمسيس التاني واستمر بناه 21 سنة كنصب دائم له وللملكة نفرتاري للإحتفال بذكري انتصاره في معركة قادش.. الرمل غطاه خلال القرن ال6 قبل الميلاد واتنسى المعبد تمامًا لحد ما اعيد اكتشافه سنة 1813م واتسمى المعبد بالإسم ده نسبة للطفل – ابو سمبل -  اللي دلّ المستكشفين لمكان المعبد..

معابد أبو سمبل عبارة عن ايه؟

معبد ابو سمبل الكبير اتحفر في الصخر بعمق 48م واتزين بأربع تماثيل ضخمة للملك رمسيس الثاني، طول الواحد منه حوالي 20 متر! وموجود على جدرانه رسومات بتسجل انتصارات رمسيس التاني وخاصة معركة قادش واللي انتصر فيها على الحيثيين، ده غير المناظر الدينية اللي بتبين علاقة الملك مع المعبودات المصرية.. وعلى بعد 100م موجود معبد ابو سمبل الصغير والمحفور في الصخر بعمق ب 24م واللي اهداه الملك للملكة نفرتاري حبيبته وزوجته الرئيسية وفيه 6 تماثيل ضحمة بتمثل الملك والملكة واللي بتبين المكانة العالية للملكة واهتمام الملك بيها..

تعامد الشمس على معبد أبو سمبل

في ظاهرة هندسية فريدة فأشعة الشمس بتتعامد مرتين في السنة على تمثال رمسيس التاني داخل معبد أبو سمبل في ظاهرة بيحتفل بيها ويشاهدها الآلاف كل سنة من داخل المعبد.. التعامد بيحصل يومي 22 فبراير و22 أكتوبر وفيه نظريتين بيتكلموا عن ليه اليومين دول بالتحديد، الأولى إن 22 أكتوبر هو يوم ميلاد رمسيس التاني و22 فبراير هو يوم تتويجه.. أما النظرية التانية فبتقول إن يوم 22 أكتوبر هو بداية موسم الفيضان والزراعة أما يوم 22 فبراير هو بداية موسم الحصاد.. 

نقل معابد أبو سمبل المهددة بالغرق في بحيرة ناصر 

في سنة 1959م بدأت حملة تبرعات دولية لإنقاد معابد أبو سمبل من الغرق وده بسبب بناء السد العالي في أسوان واللي هينتج عنه تكون بحيرة ناصر واللي هتسبب غرق أجزاء كبيرة في النوبة ومنها المعبد.. بدأت عملية الإنقاد سنة 1964م واستمرت لسنة 1968م بتكلفة 40 مليون دولار بعد ما اتقطع المعبد كله واتفكك واعيد تركيبه في موقع جديد على بعد 4 كم من الموقع القديم في عملية بتعتبر من أعظم الأعمال في الهندسة الأثرية لحد الآن.. 

مواعيد معبد أبو سمبل في اسوان

المعبد تقدر تزوره طول أيام الإسبوع من 7 الصبح ولحد 5م في الصيف ومن 7 الصبح لحد 4م في الشتاء.. 

أسعار تذاكر معبد أبو سمبل في اسوان 

السعر بيختلف حسب جنسية الزائر فمثلا هنلاقي إن سعر التذكرة للأجانب 240 جنيه وللطلبة الأجانب 120 جنيهأ، أما المصريين فسعر التذكرة ب 10 جنيه وللطالب ب 5 جنيه، وأخيرًا خلال يومي 22 اكتوبر و22 فبراير أيام تعامد الشمس على تمثال رمسيس التاني فالتذكرة للأجانب 500 جنيه وللطلبة الأجانب 250 جنيه..