كل ما تريد معرفته عن الازهر بارك: تاريخها ، موقعها ، مواعيد الزيارة واسعار تذاكر الدخول 2020

حديقة الأزهر تم افتتاحها سنة 2005 عشان تبقى أكبر وأضخم حديقة في القاهرة كلها على مساحة 80 فدان، وتعتبر من أهم المزارات السياحية غير الأثرية في القاهرة والشريان الرئيسي للمساحات الخضرا في القاهرة القديمة وعشان كده هنتكلم النهاردة عن تاريخ الحديقة وإزاي تروحها ومواعيدها وسعر التذاكر..

 

لأكتر من ألف سنة كان موقع حديقة الأزهر الحالي هو المكان الرئيسي للقمامة والمخلفات في القاهرة لغاية سنة 1984م واللي تم فيها الإعلان عن مشروع الحديقة كأكبر مساحة خضراء في القاهرة الكبرى على مساحة 80 فدان بتكلفة أكتر من 100 مليون جنيه تحملتها مؤسسة أغاجان للعمارة الإسلامية.. وبعد 7 سنوات من العمل المتواصل تم إفتتاح الحديقة رسميًا سنة 2005م بعد نقل الحجارة والقمامة منها بحمولة حوالي 80.000 عربية عشان تشيل مخلفات قرون.. المدهش إنهم اكتشفوا سور المدينة الأيوبية واللي بيرجع للقرن ال12 في عهد صلاح الدين أثناء عملية الحفر ده غير أحجار ثمينة عليها كتابات هيروغليفية وبعضها وصل طوله لمتر، وعشان يوصلوا للسور بالكامل كان عليهم بالحفر لعمق 15 متر عشان يظهر بكل روعته! وكل الإكتشافات دي تقدر تشوفها حاليًا في الحديقة.. 

 

 

حديقة الأزهر موجودة في منطقة الدراسة وهي منطقة أثرية فيها كتير من المزارات المهمة زي مسجد الحسين والجامع الأزهر وغيرهم، الحديقة ليها مدخلين.. الأول وهو الباب الرئيسي موجود في شارع صلاح سالم بعد مشيخة الأزهر مباشرة والتاني موجود عند مستشفي الحسين الجامعي ناحية منطقة الحسين والغورية.. لو جاي بعربيتك متقلقش خالص لإن فيه منطقة انتظار مخصصة للعربيات في الحديقة أما لو جاي مواصلات فاركب اي حاجة رايحة الحسين أو الدراسة وهتتمشي أقل من 10 دقايق، أما بقى لو انت من هواه المترو فأقرب محطة هي العتبة وهتخرج ناحية ميدان الأوبرا وتركب سوزوكي تنزلك عند مستشفي الحسين الجامعي وهتتمشي أقل من 5 دقايق من هناك.. 

 

 

الحديقة  تقدر تزورها طول أيام الإسبوع، بتفتح من الساعة 9 الصبح ولحد 10م أيام الإتنين والتلات والأربع ومن 9 الصبح ولحد 11م أيام الخميس والجمعة والسبت والحد.. 

 

 

السعر بيختلف حسب السن وأيام الزيارة فمثلا هنلاقي إن سعر التذكرة للكبار 15 جنيه أيام الجمعة والسبت و10 جنيه باقي أيام الاسبوع، أما الأطفال – من 4 سنوات ل 12 سنة – 10 جنيه أيام الجمعة والسبت و7 جنيه باقي أيام الأسبوع.