بالصور والاسعار تعرف علي كل ما يخص زيارتك لمنطقة دهشور وهرم سنفرو ( الهرم المائل) بها بالتفصيل

أثار القاهرة: كل ما تحتاج معرفته لزيارة دهشور 2020، الأسعار وأفضل مواعيد الزيارة 

منطقة دهشور من أغني وأهم المناطق الأثرية في مصر الفرعونية كلها وده لأسباب كتيرة منهم إن فيها أهرامات كتير زي الهرم الشمالي وهرم سنوسرت التالت وهرم امنمحات التاني وهرم سنفرو أو الهرم "المائل" وده اللي كان الخطوة الأهم للمهندسين عشان يقدروا يبنوا أهرامات خوفو وخفرع ومنكاورع وعشان كده هنتكلم النهاردة بالتفصيل عن الهرم ده وإزاي كان خطوة مهمة في بناء الاهرام في مصر القديمة ومواعيد الزيارة وإزاي تروح وأسعار التذاكر..

سبب تسميته بالهرم " المائل "

في البداية كان من المفترض ان زاوية الصعود للهرم 58 درجة ولما وصلوا لنص إرتفاعه اكتشفوا ان الزاوية الكبيرة هتتسبب في ارتفاع حاد للهرم وده هيصعب تكملته وعشان يحلوا المشكلة قام المهندسين ببناء جدار للتدعيم جعلت زاوية الميل 55 درجة ومكتملش البناء برده فعدلوا الزاوية ل 43 درجة فأخد شكله المنحني ده بسبب اختلاف درجات البناء للجزء العلوي عن الجزء السفلي واستغلوا التقنية الجديدة دي في بناء هرم جديد على بعد 2 كم من هرم سنفرو وهو الهرم الشمالي أو الهرم الأحمر.. 

اهمية هرم سنفرو 

الهرم اللي إرتفاعه 98م واستغرق بناه حوالي 14 سنة شكله معجبش الملك سنفرو وقرر يبني هرم تاني يندفن فيه وهو الهرم الشمالي أو الهرم "الاحمر" وهو بمثابة البروفة الأخيرة لبناء الأهرام واللي اكتشفوا فيها التقنية المثالية قبل بناء المعجزة هرم "خوفو" على إيد ابن الملك سنفرو وهو الملك خوفو ومن بعده الأهرام اللي بناها ابنه الملك خفرع ومن بعده ابنه الملك منكاورع

مواعيد زيارة منطقة دهشور

تقدر تزور منطقة دهشور طول أيام الأسبوع من 8 الصبح ولحد 5 مساءً مع العلم إن شباك التذاكر بيقفل 4 العصر.. أما أفضل أوقات الزيارة من الخريف للربيع وده لإن درجة الحرارة بتكون عالية جدًا في المنطقة وده عشان طبيعتها الصحراوية.. أما لو هتروح في الصيف فالأفضل يكون بدري جدًا..

إزاي أروح هرم سنفرو "الهرم المائل" في دهشور

هتركب من أي مكان في القاهرة أتوبيس أو ميكروباص مريوطية هرم ومن هناك هتلاقي عربيات دهشور، ممكن تتمشي شوية والأفضل تاخد توك توك لحد البوابة، أما لو جاي مترو فهتنزل محطة الجيزة وتركب منها مريوطية هرم ومنها دهشور.. لو جاي بعربيتك فهتقدر تدخل بيها جوه المنطقة الأثرية وده ممتاز لإن المساحات بين المزارات كبيرة شوية وهتوفر عليك وقت ومجهود كبير..