بالاسعار والصور : اكتشف تاريخ بلدك وتعرف علي كل ما تريد معرفته عن هرم زوسر (الهرم المدرج) بسقارة

أثار القاهرة: كل ما تحتاج معرفته لزيارة هرم سقارة 2020، الأسعار وأفضل مواعيد الزيارة 

هو أقدم هرم في العالم واتسمى بهرم زوسر نسبة للملك زوسر اللي تدفن فيه وبالهرم "المدرج" عشان مبني على شكل مصاطب متدرجة، منطقة سقارة الأثرية اصبحت منطقة تراث عالمي بقرار من اليونسكو سنة 1979م بعد الإكتشافات المدهشة في المنطقة، وفي مارس 2020 م تم الإنتهاء من ترميم الهرم بعد 14 سنة من قفله وبالمناسبة دي فهنتكلم النهاردة اكتر عن الهرم عبارة عن ايه من الداخل، وأفضل مواعيد الزيارة وأسعار التذاكر للمصريين والأجانب..

هرم سقّاره عباره عن إيه؟

الهرم طوله 62 متر وقاعدته 109م * 125م وكان متغلف بطبقة خارجية من الحجر الجيري ولكن بسبب العوامل الجوية على مدار العصور اختفت معظم القشرة دي.. والهرم اللي اتبني سنة 2816 قبل الميلاد بيتكون من 6 مصاطب وفيه كتير من الغرف والممرات الودهاليز والأبواب واتزينت جدرانه بالخزف الأزرق والأخضر وفيه  تمثال للملك زوسر وهو جالس على عرشة ده غير مصطبتين دفن فيهم ابنتي الملك زوسر

مواعيد زيارة منطقة سقّارة 

تقدر تزور منطقة سقّارة طول أيام الأسبوع من 8 الصبح ولحد 5 مساءً مع العلم إن شباك التذاكر بيقفل 4 العصر.. أما أفضل أوقات الزيارة من الخريف للربيع وده لإن درجة الحرارة بتكون عالية جدًا في المنطقة وده عشان طبيعتها الصحراوية.. أما لو هتروح في الصيف فالأفضل يكون بدري جدًا..

إزاي أروح منطقة سقّارة

هتركب من أي مكان في القاهرة أتوبيس أو ميكروباص مريوطية هرم ومن هناك هتلاقي عربيات سقّارة، ممكن تتمشي شوية والأفضل تاخد توك توك لحد البوابة، أما لو جاي مترو فهتنزل محطة الجيزة وتركب منها مريوطية هرم ومنها سقّارة.. لو جاي بعربيتك فهتقدر تدخل بيها جوه المنطقة الأثرية وده ممتاز لإن المساحات بين المزارات كبيرة شوية وهتوفر عليك وقت ومجهود كبير.. 

أسعار تذاكر منطقة سقّارة 

السعر بيختلف حسب جنسية الزائر ده والتذكرة تقدر تدخل بيها إيه بالظبط، هنلاقي مثلًا إن سعر التذكرة للأجانب 150 جنيه وللطلبة الأجانب 75 جنيه، وللمصريين والعرب 20 جنيه وللطلبة 5 جنيه وده بيمشل دخول منطقة سقّارة نفسها والمجموعة الجنائزية لهرم زوسر ومقابر إيدوت، إيزيس نفرت، وعنخ تي وهرم تي تي وهرم أوناس ومقبرة تي للأسرة الخامسة ومقبرة بتاح حتب وغيرهم كتير بنفس التذكرة العامة دي.. لكن فيه تذكرة مجمعة بتقدر تدخل ال23 مزار الموجودين في المنطقة من خلالها وسعرها 420 جنيه..