كل ما تحتاج معرفته عن متحف الفن الإسلامي 2020، الأسعار والمواعيد وإزاي تروحه! 

المتحف موجود في واحد من أشهر ميادين القاهرة التاريخية وهو ميدان باب الخلق، وقريب جدًا من أهم المعالم المعمارية الإسلامية في الفترة دي زي جامع ابن طولون ومسجد محمد علي وقلعة صلاح الدين وغيرهم، ولإن فيه أكتر من 100 ألف قطعة بيحكوا عن الحضارة الإسلامية في عز مجدها ولحد بداية تاريخ محمد علي باشا.. وعشان كده فهنتكلم النهاردة أكتر عن المتحف وتاريخه ومحتوياته ومواعيد الزيارة وأسعار التذاكر..
 
متحف الفن الاسلامي بالقاهرة

 

• تاريخ إنشاء المتحف الإسلامي في القاهرة 

المتحف تم إفتتاحه رسميًا بشكله ومكانه الحالي سنة 1903م في عهد الخديوي عباس حلمي التاني بعد ما كان مجرد فكرة من المهندس "سيلزمان" اللي عرضها على الخديو إسماعيل سنة 1866م واتعمل المتحف في صحن الجامع الحاكم في شارع المعز ووصلت القطع المعروضة فيه ل 111 قطعة سنة 1880م وبعد ما اتنقل لمكانه الجديد في باب الخلق اتسمى ب "دار الآثار العربية" لحد ما اتغير إلى "متحف الفن الإسلامي" سنة 1952.. 
 
متحف الفن الاسلامي

 

• المتحف الإسلامي عباره عن إيه؟

المتحف فيه 103 ألف قطعة وتحفة أثرية وده اللي خلاه أكبر متحف إسلامي في العالم كله! المتحف بيضم مجموعات مختلفة من شمال أفريقيا ومصر والشام والأندلس والجزيرة العربية وإيران والصين والهند.. والمتحف بيتكون من دورين، الأول فيه قاعات العرض أما التاني ففيه المخازن.. متحف الفن الإسلامي بيضم قطع فنية وأدوات كان الأمراء والسلاطين بيستخدموها في العصور الأموية والفاطمية والأيوبية والمملوكية والعباسية وعشان كده يعتبر متحف الفن الإسلامي أكتر مكان بيوثق الحضارة الإسلامية في عز مجدها.. 
 
متحف الفن الاسلامي

 

• مواعيد المتحف الإسلامي في القاهرة

المتحف تقدر تزوره طول أيام الإسبوع من 9 الصبح ولحد 5م ولكنه يوم السبت تقدر تزوره بليل في تجربة مختلفة تمامًا عن الزيارة التفليدية بالنهار.. وبيكون شغًال فيها من الساعة 6م لحد 9 مساءً..  
 
متحف الفن الاسلامي

 

• مكان المتحف الإسلامي في القاهرة

متحف الفن الإسلامي موجود في ميدان أحمد ماهر في حي عابدين في قلب القاهرة، لو جاي بعربيتك فتقدر تركن في جراج العتبة وتتمشي حوالي 10 دقايق للمتحف، أما لو جاي مواصلات فإما تركب أي اتوبيس لميدان احمد ماهر وساعتها هتكون قدام المتحف، أو تركب مترو وتنزل محطة محمد نجيب في الخط التاني وبيبعد عن المترو 800م وهتاخدها مشي في 10 دقايق تقريبًا..
 
متحف الفن الاسلامي بالقاهرة

 

• أسعار تذاكرة المتحف الإسلامي في القاهرة 

السعر بيختلف حسب جنسية الزائر ده غير معاد الزيارة سواء بالنهار أو بليل فمثلا هنلاقي إن سعر التذكرة للأجانب بالنهار 100 جنيه وللطلبة الأجانب 50 جنيه.. أما بليل فالتذكرة ب 120 جنيه وللطلبة الأجانب ب 60 جنيه... أما المصريين فهنلاقي بالنهار 10 جنيه أو بليل ب 15 جنيه وللطالب ب 5 جنيه بالنهار و10 جنيه بالليل..
 
 
 
متحف الفن الإسلامي هو مكان جميل ومختلف ويستحق الزيارة أكتر من مجرد القراءة عنه، ومتنساش تبعتلنا معلومة جديدة عن المتحف من زيارتك الجاية له!