شوف القاهرة: كل ما تحتاج معرفته عن قلعة صلاح الدين 2020، الأسعار والمواعيد والمزارات

تعتبر القلعة أهم المزارات السياحية – غير الفرعونية – الموجودة في القاهرة، اتبنت في العصور الوسطى على إيد القائد صلاح الدين الأيوبي وعشان كده معروفة بإسم قلعة "صلاح الدين" أو قلعة "الجبل" والبعض بيسميها بشكل خاطيء قلعة "محمد علي" نسبة لمسجد محمد علي الموجود فيها.. وفضلت القلعة هي مقر لحكم مصر من العصر الأيوبي ولحد الخديو إسماعيل اللي نقل الحكم لقصر عابدين.. القلعة فيها مساجد ومتاحف عظيمة والأعظم إنهم متجمعين كلهم في مكان واحد، وده اللي هيخلينا نتكلم النهاردة عن قلعة "صلاح الدين" وإزاي تروحها وممكن تزور ايه هناك وأسعار التذاكر..
 
مسجد محمد علي بالقلعه
 

اعمل ايه في القلعة؟

القلعة فيها تاريخ طويل جدًا بداية من صلاح الدين الأيوبي وحتى محمد علي باشا، وعشان كده هتلاقي تنوع معماري هايل بيبدأ من العصور الوسطي لحد العصر الحديث.. فهتلاقي هناك التحفة المعمارية "مسجد محمد علي" وهو أهم مزارات القلعة ده غير باقي المساجد زي مسجد سليمان باشا الخادم ومسجد العزب ومسجد بن قلاوون والمتاحف المختلفة زي المتحف العسكري ومتحف العربات الحربية ومتحف الحديقة وقصر المجوهرات اللي كان مقر حكم محمد علي في القلعة.. وأخيرًا برج المراقبة اللي بيطل على مصر القديمة كلها وبتشوف منه صورة بانورامية هايلة للقاهرة! 
 
مسجد محمد علي بالقلعه
 

مواعيد قلعة صلاح الدين في القاهرة

القلعة تقدر تزورها طول أيام الإسبوع، بتفتح من الساعة 9 ص ولحد 5م.. وفي بعض الأحيان بتكون مفتوحة بليل وده غالبًا بيحصل لو فيها حفلات زي محكى القلعة اللي بيكون في شهر أغسطس من كل سنة..  
 
مسجد محمد علي بالقلعه
 

موقع قلعة صلاح الدين القلعة في القاهرة

موجودة في حي اتسمى مخصوص على اسمها وهو حي "القلعة"، أقرب مكان ليها هو ميدان السيدة عائشة، من هناك هتتمشي 10 دقايق بالظبط، وده ممكن توصله من ميدان رمسيس أو من مناطق كتير في القاهرة فيها مواصلات مباشرة للسيدة عائشة، ده غير المترو في الخط الأول محطة "الملك الصالح" وتطلع تركب السيدة عائشة برده وبياخد حوالي 15 دقيقة.. 
 
قلعة صلاح الدين الايوبي بالقاهرة
 

أسعار تذاكرة القلعة في القاهرة 

السعر بيختلف حسب جنسية الزائر فمثلا هنلاقي إن سعر التذكرة للأجانب 180 جنيه وللطلبة الأجانب 90 جنيه.. أما المصريين فسعر التذكرة ب 30 جنيه وللطلبة 10 جنيه.. والتذكر بتشمل جميع المزارات الموجودة في القلعة..