شوف القاهره: كل ما تحتاج معرفته لزيارة الأهرامات 2020، الأسعار وأفضل مواعيد الزيارة 

الوحيد من عجائب الدنيا السبع القديمة اللي مازال موجود حتى الآن، والصورة الأولى اللي بتيجي في خيال أي إنسان أول ما يسمع  "مصر" في العالم كله.. هرم خوفو فضل أطول بناء في العالم لحوالي 3800 سنة لحد ما اتبنت كاتدرائية لينكولن سنة 1311م في إنجلترا.. كل دي أسباب تخلي زيارة أهرامات الجيزة اللي اتبنت من أكتر من 5 آلاف سنة، تحديدًا بين 2480 و 2550 قبل الميلاد تجربة مدهشة وفريدة ولازم تكون على قايمة مزاراتك وعشان كده هنتكلم النهاردة عن إيه الحاجات اللي ممكن تعملها في المنطقة الأثرية هناك وأسعار الدخول وأفضل مواعيد الزيارة وأخيرًا تفاصيل دخول الهرم الأكبر "خوفو"

اهرامات الجيزة

ايه الحاجات اللي ممكن أعملها في منطقة أهرامات الجيزة 

بالتأكيد أول حاجة هي مشاهدة الأهرامات التلاتة ده بالإضافة إنك تقدر تشوف أي واحد فيهم من الداخل.. ومتنساش الصورة الشهيرة مع أبو الهول وممكن تزور المركب الشمسي وهو واحد من أقدم السفن في العالم وكان مخصص للملك خوفو وموجود في متحف القوارب الشمسية جنب هرم خوفو.. تقدر كمان تاخد جولة بالجمال أو الأحصنة في المنطقة بس اتأكد من السعر قبل ما تركب وفاصل قدر المستطاع من الناس هناك، وأخيرًا تقدر تشوف عرض الصوت والضوء ولتفاصيل أكتر عنه من هنــــــــــا    

اهرامات الجيزة


مواعيد زيارة أهرامات الجيزة وأفضل وقت للزيارة

تقدر تزور منطقة الأهرامات طول أيام الأسبوع من 7 الصبح ولحد 5 مساءً مع العلم إن شباك التذاكر بيقفل 4 العصر، أما دخول الأهرامات نفسها من الداخل فمفيش إختلاف بخصوص المواعيد بالنسبة لهرم "خفرع" وهرم "منكاورع" .. أما "خوفو" الهرم الكبير بيتقفل من 12 ل 1 الظهر.. أما أفضل أوقات الزيارة فهتكون بعد الظهر خلال الشتاء وده لإن بيكون فيه ضباب وشبورة ممكن تمنعك إنك تشوف الأهرامات بوضوح الصبح، أما باقي السنة فالأفضل تروح بدري شوية عشان الشمس بتكون قوية خاصة في الصيف.. 

مواعيد زيارة الاهرامات


إزاي أروح أهرامات الجيزة

معروف طبعًا إن الأهرامات موجودة في الجيزة، لو هتيجي بعربيتك فهتوصل ميدان الرماية ومن هناك بتدخل من عند مينا هاوس وتقدر تدخل بالعربية المنطقة الأثرية نفسها وده يفضل لإن المشي بين المزارات كتير شوية وبتقطع تذكرة للعربية الملاكي سعرها 5 جنيه، أما لو جاي مواصلات فأفضل حاجة تركب المترو وتنزل محطة الجيزة في الخط التاني وتنزل تركب أي عربية رايحة ميدان الرماية وانزل مشعل ومن هناك هتتمشي 10 دقايق بالظبط تكون عند بوابة الهرم.. 

اهرامات الجيزة العظيمه


أسعار تذاكرة أهرامات الجيزة في القاهرة 2020

السعر بيختلف حسب جنسية الزائر ده والتذكرة تقدر تدخل بيها إيه بالظبط، هنلاقي مثلًا إن سعر التذكرة للأجانب 200 جنيه وللطلبة الأجانب 100 جنيه، وللمصريين والعرب 30 جنيه وللطلبة 10 جنيه والأطفال من سن 6 – 10 سنوات 10 جنيه وده بيمشل دخول منطقة الأهرامات نفسها ومعبد الوادي للملك خفرع ومقبرتي نفر باو بتاح وايدو وكار وأهرامات الملكات بالجبانة الشرقية..

اسعار دخول الاهرامات


دخول الأهرامات "خوفو" و"خفرع" و"منكاورع"

تقدر تدخل الهرم الكبير بداية من الساعة 7ص ولحد 5م بس خد بالك إنه بيتقفل من 12 ل 1 الظهر، أما بخصوص تذاكر للمصريين والعرب 80 جنيه وللطلبة 40 جنيه، أما للأجانب 400 جنيه والطلبة الأجانب 200 جنيه... والهرم التاني "خفرع" 20 جنيه والطلبة 5 جنيه والأجانب 100 جنيه والطلبة 50 جنيه.. أما الهرم التالت "منكاورع" فهو للأسف مغلق حاليًا من الداخل للصيانة.. 

اهرامات الجيزة من الداخل