المتحف المصري بالقاهرة (تاريخه - اسعار تذاكر الدحول - مواعيد الزيارة - ازاي تروح المتحف)

كل ما تحتاج معرفته عن المتحف المصري 2020، الأسعار والمواعيد 

" المتحف المصري هو أحد أكبر وأشهر المتاحف العالمية، يقع في قلب العاصمة المصرية " ده وصف ويكيبيديا للمتحف المصري ودي حقيقة بنشوفها في عين كل الأجانب اللي بييجوا مصر مخصوص عشان يزورا المتحف اللي بيحكي قصة آلاف السنين من العظمة والتقدم للمصريين.. المتحف فيه أكتر من 180 ألف قطعة، وده عدد رهيب من القطع الأثرية اللي تخلينا متحمسين إننا هنتكلم النهاردة نتكلم المتحف وتاريخ إنشاءه وإزاي توصله ومواعيده وأسعار التذاكر.. 

تاريخ إنشاء المتحف المصري في القاهرة 

تم إفتتاحه رسميًا في 15 نوفمبر 1902م في عهد الخديوي عباس حلمي الثاني بعد ما كان مجرد فكرة عند عالم المصريات الفرنسي أوجوست مارييت سنة 1858م وافتتح المتحف في بولاق وبسبب الزيادة الكبيرة في عدد القطع المستكشفة تم نقل المتحف سنة 1889م لأحد قصور الخديوي إسماعيل في الجيزة – حاليًا بيقع في حديقة الحيوانات - ومن بعده أصبح المتحف المصري ف مكانه الحالي هو الواجهة الرئيسية للأثار المصرية في العالم كله..

المتحف المصري عباره عن إيه؟

المتحف بيتكون من دورين، الأول فيه الآثار التقيلة زي التوابيت والتماثيل اللي بتتعرض طبقًا للتسلسل التاريخي، أما الدور التاني ففيه مجموعات أثرية متنوعة زي مجموعة الملك توت عنخ آمون وكنوز تانيس وقاعتين للمومياوات الملكية.. المتحف بيحتوي على أكتر من 180 ألف قطعة أثرية وأهمهم هو تمثال الملك خوفو وقناع الملك توت عنخ آمون وصلاية الملك نعرمر وغيرهم من الكنور الملكية على مر التاريخ

مواعيد المتحف المصري في القاهرة

المتحف تقدر تزوره طول أيام الإسبوع من 9 الصبح ولحد 5م ولكنه يوم الحد والخميس تقدر تزوره بليل في تجربة مختلفة تمامًا عن الزيارة التفليدية بالنهار.. وبيكون شغًال فيهم لحد 9 مساءً..  

مكان المتحف المصري في القاهرة

المتحف المصري موجود في ميدان التحرير في قلب القاهرة، لو جاي بعربيتك فاتطمن عشان هتقدر تركن في جراج التحرير، أما لو تفضل تيجي مواصلات فإما تركب اوتوبيس لميدان عبدالمنعم رياض أو مترو الأنفاق الخط الأول أو التاني وانزل محطة السادات.. هتلاقي المتحف على بعد خطوات منك.. 

أسعار تذاكر دخول المتحف المصري في القاهرة 

السعر بيختلف حسب جنسية الزائر ده غير معاد الزيارة سوا بالنهار أو بليل فمثلا هنلاقي إن سعر التذكرة للأجانب بالنهار 200 جنيه وللطلبة الأجانب 100 جنيه.. أما بليل فالتذكرة ب 120 جنيه وللطلبة الأجانب ب 60 جنيه... المصريين والعرب ليهم نفس المعاملة في السعر فهنلاقي بالنهار أو بليل التذكرة ب 30 جنيه وللطالب ب 10 جنيه بالنهار و15 جنيه بالليل