كل ما تحتاج معرفته عن عروض الصوت والضوء في الأهرامات، الأسعار والمواعيد

عروض الصوت والضوء دلوقتي منتشرة في معظم الأماكن السياحية والأثرية حوالين العالم ولكننا هنا في مصر كنا من أول الدول اللي عملت ده وبنفخر إنه بدأ من أهرامات الجيزة بكل عراقتها وتاريخها، وعشان كده هنتكلم النهاردة عن العرض ده بالتحديد وتاريخه ومواعيده وأسعار التذاكر على مدار الإسبوع.. 
 
عروض الصوت والضوء بالاهرامات
 

تاريخ عروض الصوت والضوء في مصر 

شركة "الصوت والضوء" هي الجهة المسئولة عن جميع العروض في مصر واللي تأسست سنة 1960 وتعتبر من أقدم الشركات في العالم كله اللي تقدم النوع ده من الخدمات! ومن بعدها كان أول عرض واللي اتقدم في أهرامات الجيزة وتوسعت العروض شوية بشوية لحد ما بقى فيه عروض للشركة في الأهرامات في الجيزة وفي أسوان وإدفو وأبو سمبل والأقصر..
 
عروض الصوت والضوء بالاهرامات بالجيزة
 

عرض الصوت والضوء عباره عن ايه؟ 

بيحكي العرض عن قصة أبو الهول والحضارة المصرية القديمة مع الموسيقى اللي بتعبر عن ده بشدة.. ده غير قصة بناة الأهرام في رحلة تاريخية من أكتر من 5000 سنة، العرض موجود ب 10 لغات زي الانجليزي والفرنساوي والألماني والإيطالي وغيرهم ومن ضمنهم أكيد اللغة العربية وبيمتد لحوالي ساعة كاملة..
 
اسعار عروض الصوت والضوء بالاهرامات 2020
 

مواعيد الصوت والضوء في الاهرامات 

فيه يوميًا عرضين، الأول بيبدأ 7م والتاني 8م.. لكن بيكونوا بلغات أجنبية فمثلًا العرض الأول – 7م – دايمًا بيكون انجليزي .. أما العرض التاني – 8م – فبيتغير حسب اليوم فمثلا السبت والاتنين والأربع اسباني والحد صيني والتلات والخميس والجمعة فرنسي وإن كان الترتيب ده بيتغير كله فترة وممكن يدخل معاه لغات تانية زي الياباني والألماني.. العرض الأهم بقى في الإسبوع كله بيكون يوم الخميس كعرض تالت الساعة 9م وهو العرض الوحيد طول الإسبوع اللي باللغة العربية.. مع العلم إن دايمًا فيه سماعات للترجمة لأي لغة من اللغات التانية..
 
مواعيد عروض الصوت والضوء بالاهرامات 2020
 

أسعار الصوت والضوء في الاهرامات 2020

السعر بيختلف بين التذكرة العادية وال VIP  واللي بتكون للصفوف التلاتة الأولى بس، فهنلاقي مثلًا سعر التذكرة للعروض الأجنبية 300 جنيه ولل VIP  350 جنيه.. أما عرض يوم الخميس اللي بالعربي فتذكرته 80 جنيه وال VIP  بيكون ب100 جنيه.. وأخيرًا فانت تقدر تاخد التذكرة مجانًا بشكل كامل لو هيصادف يوم عيد ميلادك! مجرد بطاقتك يتأكد منها وبتاخد التذكرة من شباك التذاكر في منطقة الأهرامات..
 
اسعار عروض الصوت والضوء بالاهرامات
 
 
وأخيرًا فالعرض حقيقي مختلف ومعظم آراء الناس اللي شافته إنهم انبسطوا وشافوا حدوتة ممتعة ومسلية جدًا.. هيكون لطيف إنك تجرب خروجة لطيفة في قلب القاهرة يوم خميس بسعر مناسب!