كل ما تريد معرفته عن محمية وادي دجلة في القاهرة، الأسعار وإزاي تروح واهم الأنشطة

مكان واحد تقدر تتسلق فيه جبال وتخيّم في الصحراء تحت النجوم غير لو معاك أطفال فالمكان واسع وآمن وفيه تاريخ لملايين السنين.. محمية وادي دجلة ميزتها الرئيسية مع كل ده إنها في قلب القاهرة وخلال ساعة بالكتير تقدر تفصل وتدخل مود مختلف تمامًا عن القاهرة وزحمتها وأصواتها العالية.. وعشان كده هنتكلم اكتر عن المحمية وايه الحاجات اللي ممكن تعملها هناك وإزاي توصلها ده غير أسعار دخولها وأفضل وقت في السنة للزيارة.. 

محمية وادي دجلة

المحمية عباره عن ايه؟

هي أهم محمية طبيعية موجودة داخل محافظة القاهرة وده بسبب ملايين السنين اللي اتكونت فيهم المحمية من ترسبات الصخور الحجرية وعشان كده هتلاقيها غنية جدًا بالحفريات.. تم اعتبارها كمحمية سنة 1999 من هيئة شئون البيئة المصرية بإمتداد 30 كم من الشرق للغرب وبإجمالي مساحة حوالي 60 كم مربع .. 

وادي دجلة محمية في قلب القاهرة

ايه الحاجات اللي ممكن تعملها في محمية وادي دجلة

المحمية مكان مثالي لو انت رياضي فتقدر تمشي وتجري لمسافات طويلة او قصيرة حسب لياقتك ده غير ركوب العجل الجبلي اللي هيكون وسيلة تحرك رائعة داخل الوادي اللي بيمتد ل 30 كم.. بالإضافة إنك ممكن تعتبرها خروجة عائلية فتقدر تشوي وتلعب وتقضي يوم وسط الطبيعة والهدوء وأخيرًا فالتخييم هتكون فكرة مدهشة ننصحك جدًا إن تجرّبها ولو لمرة واحدة!

محمية وادب دجلة

إزاي تروح محمية وادي دجلة

المحمية موجودة في زهراء المعادي، على بعد حوالي 5 كم من الأوتوستراد، أو لو جاي مواصلات فأحسن طريقة انك توصل موقف عرب المعادي ومن هناك اركب للزهراء وانزل اخر الخط عند المسجد الكويتي واتمشى لحد بوابة المحمية حوالي 2 كم بس.. ولو جاي بعربيتك ففيه مكان آمن ومناسب جدًا تركن فيه ده غير إنك تقدر تدخل بيها لو تحب..

محمية وادي دجلة

أفضل وقت تروح فيه وادي جلة

المحمية مفتوحة يوميًا من الساعة 7 صباحًا حتى 6 مساءً.. ولكن يُفضل تروح بدري أوي خاصة في الصيف عشان الجو بيكون حر جدًا بداية من 10 الصبح مثلا، أما طول باقي السنة فالجو رائع ويستحق تقضي هناك طول اليوم.. أما لو ناوي على تخييم فالأفضل من الربيع وحتى الخريف مع العلم إن الشتاء الجو بليل بيكون برد جدًا وبيوصل لصفر أحيانًا..

محمية وادي دجلة

أسعار دخول محمية وادي دجلة  

المحمية بيختلف تذكرتها لو هتقضي اليوم بس أو لو هتخيم.. التذكرة ب10 جنيه وبتسيب بطاقتك عند البوابة وبتبدأ من 7 الصبح ولازم تخرج قبل 6 المغرب.. أما تذكرة التخييم فسعرها 50 جنيه وتقدر تقعد لتاني يوم براحتك.. أما لو هتدخل بعربيتك فسعر التذكرة 10 جنيه برده ومفيش أي تكلفة للباركنج لو هتسيبها بره..

 

محمية وادي دجلة بالمعادي

 

الصور من محمية وادي دجلة بعد تجميع مياه الأمطار
تصوير: Ahmed Rasull