بالصور 9 اماكن سياحية في واحة سيوة هتسحرك بجمالها

دليلك السياحي الكامل لكل ما يخص السياحة في سيوة بالتفصيل عشان نسهل عليك تحديد اجمد برنامج سياحي ممكن تقضيه بسيوة ومن افضل الاماكن دى جزيرة طغاغين والبحيرات المالحة وجبل الموتي وقلعه شالي وغيرهم

9 أماكن لازم تزروهم في سيوة! الأسعار وأفضل مواعيد الزيارة

سيوة هي أجمل الواحات المصرية وأكترهم في التنوع والثراء وده بسبب تاريخها الطويل الممتد لآلاف السنين والشاهد على أهلها وتراثهم وثقافتهم، وده اللي هنحاول نتكلم عنه من خلال أهم المعالم والمزارات الموجودة في الواحة واللي بتحكي تاريخ سيوة.. وعشان كده جمعنا 9 أماكن لازم يكونوا في قايمة المزارات اللي هتروحها في سفريتك الجاية لسيوة..

1- جزيرة طغاغين

واحدة من أهم الأماكن اللي لازم تزورها وانت في سيوة، الجزيرة في قلب بحيرة سيوة وهي المكان المثالي لو من محبي الهدوء والراحة والأنتخة ، ده غير إن فيها عين مياه رهيبة تقدر تنزلها.. على بعد 12 كم من وسط سيوة هتلاقي طغاغين اللي تعتبر ريزورت ومزار في نفس الوقت.. الإقامة فيه بتبدأ ب300 جنيه للسنجل و600 للدبل ولو هتقضي اليوم بس فالسعر حوالي 50 جنيه.. ولتفاصيل اكتر عن زيارة الجزيرة من هنـــــــــا

2- جبل الموتى

تم اكتشافه بعد ما أهل سيوة احتموا فيه من الغارات أثناء الحرب العالمية التانية، وهو عبارة عن المقبرة الرئيسية لسيوة في العصور القديمة من أول الفراعنة وحتى العصر البيزنطي والمميز في المقابر اللي عددها بالآلاف إنها على شكل خلايا نحل وفي نفس الوقت ليها الشكل الهندسي للواحة القديمة! جبل الموتى موجود على بعد 2 كم بس من وسط الواحة وتذكرته سعرها 20 جنيه للشخص و5 جنيه لو طالب مصري.. ولتفاصيل اكتر عن زيارة حبل الموتى من هنـــــــــا

3- البحيرات المالحة

موجود 4 بحيرات رئيسية في سيوة وهم الزيتون، أغورمي، سيوة، وأخيرًا المراقي.. وموجود فيهم أكتر من 60 مليون طن من الملح واللي له استخدامات كتير علاجية وصناعية.. وهي مناسبة جدًا للسباحة فيها حتى لو مبتعرفش تعوم نهائي وده لإنك هتطفوا بسبب شدة ملوحة المياه في البحيرات دي.. البحيرات دي ملهاش أي تكلفة أو تذاكر للنزول فيها ولتفاصيل اكتر عنها وعن زيارتها من هنـــــــــا

4- معبد آمون

اتحققت كتير من نبوءات كهنته وده سبب شهرته خاصة بعد زيارة الأسكندر الأكبر له سنة 331 ق.م وسؤاله للكاهن "هل هيحكم مصر؟" ورد عليه " نعم، لكن ليس لفترة طويلة" وبعدها تم تنصيبه حاكم لمصر وابن للإله آمون .. المعبد بتتعامد فيه أشعة الشمس على قدس الأقداس مرتين في السنة بيتسموا بالإعتدال الربيعي والخريفي وهو موجود على بعد 3 كم من وسط الواحة وسعر تذكرته 20 جنيه.. ولتفاصيل اكتر عن زيارته من هنـــــــــا

5- عين كليوباترا

هي أهم عين في واحة سيوة كلها وده بسبب الحكايات والأساطير المعروفة عنها زي إن الملكة كليوباترا سبحت فيها عند زيارتها للواحة ده غير إن المياه في العين بتكون دافية في الشتا وباردة في الصيف فهي مناسبة طول السنة! عين كليوباترا موجودة على بعد 3 كم من وسط سيوة ومفيش أي تكلفة لنزولها وحواليها كافيتريات لو تحب تستريح أو تشرب حاجة والأسعار بتبدأ من 10 جنيه وانت طالع.. ولو حابب تعرف اكتر عن عين كليوباترا وتاريخها من هنـــــــــا

6- قلعة شالي

هي المزار الرئيسي في سيوة وده لإنها المكان اللي أهل الواحة عاشوا فيه لأكتر من 700 سنة لحد ما اضطروا يسيبوها سنة 1926م بعد ما ضرب القلعة سيل قوي استمر 3 أيام.. البيوت كلها مبنية من مادة الكرشيف والقلعة بدأت بباب واحد اسمه " الباب ان شال" لحد ما وصلوا ل 3 أبواب في النهاية.. شالي موجودة في قلب سيوة وملهاش أي تكلفة أو تذاكر لزيارتها ولمعلومات أكتر عنها من هنـــــــــا

7- جزيرة فطناس

من أجمل الأماكن اللي ممكن تشوف فيها الغروب، وده سبب شهرتها وسبب شهرة سيوة بإسم "واحة الغروب" الجزيرة كمان عليها عين مياه تحفة بيحاوطها الشجر والنخل من كل الإتجاهات ودرجة حرارتها متوسطة وبالتالي تقدر تنزلها في أي وقت في السنة.. جزيرة فطناس موجودة على بعد 5 كم من وسط سيوة ومفيش تكلفة لزيارتها لكن لو هتقعد في الكافيتريا الموجودة فهناك فالمشروبات بتبدأ من 10 جنيه وانت طالع ولتفاصيل اكتر عن زيارة الجزيرة من هنـــــــــا

8- جبل الدكرور

هو أشهر جبل في سيوة وده لإن بيقام عليه إحتفالات عيد الصلح أو عيد "السياحة" واللي بيحتفلوا بيه من أكتر من 120 سنة في الليالي القمرية لشهر أكتوبر، ونفس الوقت هو المصدر الرئيسي للسياحة العلاجية في سيوة واللي بتكون في شهور الصيف بسبب رماله الناعمة والسخنة جدًا.. الجبل موجود على بعد 4 كم من وسط سيوة ومن فوقه هتشوف الواحة كلها في منظر لطيف جدًا خاصة وقت الشروق.. الجبل ملوش أي تذاكر.. ولتفاصيل اكتر عن زيارته من هنـــــــــا

9- متحف البيت السيوي

تم افتتاحه سنة 1990م بمنحة من الحكومة الكندية بعد تحمس السفير الكندي في مصر لفكرة المحافظة على تراث أهل سيوة وتاريخ عاداتهم وتقاليدهم في مكان.. المتحف مبني على الطراز القديم لبيوت سيوة وبيحتوي على المشغولات اليدوية زي المجوهرات والسجاجيد والفجار ده غير الآلات الموسيقية وعدة الشاي والطبخ وأزياء الفرح والملابس السيوية القديمة.. البيت السيوي موجود في حديقة مجلس المدينة في قلب الواحة وتذكرة دخوله 5 جنيه بس.. ولتفاصيل اكتر عن المتحف من هنـــــــــا

احسن وقت لزيارة واحة سيوة

الصيف في سيوة بيبدأ في من أول مايو، درجة الحرارة بتكون عالية جدًا وده بيكون مناسب لو كان الغرض من السفرية علاجي لإن الموسم بيكون من نص يونيو لنص سبتمبر ودرجة الحرارة بتكون بين 27 - 38 °C. أما لو رايح سياحة فأفضل وقت هو بداية اكتوبر وحتى أبريل.. الجو هتلاقيه دافي بالنهار وبرد بالليل ودرجة الحرارة بين 10 و25 °C.