بالصور كل ما تحتاج معرفته عن متحف سيوة: تاريخه ومكوناته وافضل مواعيد الزيارة والاسعار

متحف البيت السيوي: تاريخ التراث واحة سيوة في مكان واحد، مكونات المتحف والأسعار وأفضل مواعيد الزيارة

من ألطف الحاجات اللي اتعملت في سيوة خلال ال30 سنة اللي فاتت هي البيت السيوي وده لإن كان له دور كبير في حفظ التراث السيوي من الضياع خاصة المشغولات اليدوية واللبس وشكل البيوت زمان، وده هنلاقيه في إهتمام المصريين والأجانب لزيارة متحف البيت السيوي وعشان كده هنتكلم النهاردة عن ايه هي مكونات المتحف ومحتوياته وسعر التذاكر غير أفضل مواعيد الزيارة.. 

تاريخ البيت السيوي

فكرة إنشاء المتحف كانت موجودة عند أهالي سيوة وخلال زيارة سفير كندا في مصر للواحة سنة 1988م تحمّس جدًا لمساعدتهم على حفظ التراث السيوي من الضياع، فمنح الأهالى دعم مادي من خلال منحة من الحكومة الكندية، واشتغل الفنان عبدالغني أبو العينين وزوجته الفنانة رعاية النمر على مشروع إعداد المتحف مع السكان المحليين واللي قاموا بتجميع المواد والأزياء والمشغولات اليدوية في مجهود كبير استمر سنتين لحد إفتتاح المتحف في ديسمبر 1990م 

مكونات البيت السيوي 

المتحف بيتكون من دورين، الدور الأول بيحتوي على "المطلولة" و"المربوعة" وهم الصالة وغرفة إستقبال الضيوف.. أما الدور التاني ففيه "اسطاح نماس" واتغرفت نشتي" وهما الصالة الموجودة في وسط البيت والغرفة الشتوية ودي من أهل مكونات البيت لإن بيتم تناول الطعام وشرب الشاي فيها وبيكون فيها الكانون وادوات الشاي المصنوعة من الفخار وبتتفرش بالكليم والمخدات السيوية

محتويات البيت السيوي 

المتحف ثري جدًا بمحتوياته، فهتلاقي هناك المشغولات اليدوية زي السجاجيد والمجوهرات والفخار والفضيات ده غير الآلات الموسيقية والملابس السيوية المطرزة للرجالة والستات ده بالإضافة لأزياء الأفراح وأدوات المطبخ فهنلاقي أدوات الخبيز والطبخ وعدة الشاي.. أما المواد اللي اتبني منها المتحف فهي مادة الكرشيف اللي كانت بيتبني منها البيوت زمان في سيوة واللي بتحافظ على درجة الحرارة في البيت ده السقف المصنوع من جريد النخل..

موقعه فين بالظبط

البيت السيوي موجود في قلب الواحة في حديقة مجلس المدينة ولو نازل في أي فندق في وسط سيوة فأفضل طريقة تروح بيها لإنك تتمشي لإنها على بعد حوالي 500م بس.. أما المسافة من القاهرة فحوالي 750 كم وبتاخد 10 ساعات تقريبًا بأتوبيس غرب الدلتا.

احسن وقت لزيارة البيت السيوي

الصيف في سيوة بيبدأ في من أول مايو، درجة الحرارة بتكون عالية جدًا وده بيكون مناسب لو كان الغرض من السفرية علاجي لإن الموسم بيكون من نص يونيو لنص سبتمبر ودرجة الحرارة بتكون بين 27 - 38 °C. أما لو رايح سياحة فأفضل وقت هو بداية اكتوبر وحتى أبريل.. الجو هتلاقيه دافي بالنهار وبرد بالليل ودرجة الحرارة بين 10 و25 °C!

أسعار زيارة البيت السيوي

الأسعار مناسبة جدًا فهنلاقي إن سعر التذكرة 5 جنيه للفرد وللطالب 2 جنيه، أما للأجانب فسعر التذكرة 10 جنيه بس..

البيت السيوي مكان بسيط.. وده أفضل ما فيه لإن بساطته جاي من بساطة سيوة نفسها، سعر تذكرته اللطيف جدًا وقربه من وسط البلد بالإضافة لوقت زيارته اللي هتستغرق حوالي ساعة بس.. وعشان كل ده فزيارة المتحف هي فكرة كويسة سواء ليك في المتاحف أو لأ..