بالصور والاسعار،، ما لا تعرفه عن جزيرة وعين فطناس بواحة سيوة

جزيرة فطناس: أفضل مكان لمشاهدة الغروب في سيوة.. عين فطناس والأسعار وأفضل مواعيد الزيارة

أجمل غروب هتشوفه في حياتك هيكون غالبًا على جزيرة فطناس، وده من أهم الأسباب اللي شهرت سيوة بإسم "واحة الغروب" عشان المنظر البديع للشمس وهي بتنزل في المياه وكإنها بتغرق! وعشان كده هنتكلم عن أكتر عن الجزيرة وعن عين المياه الموجودة فيها وتكلفة زيارتها غير أفضل المواعيد اللي تزور فيها سيوة..

ايه هي جزيرة فطناس؟

من أشهر الأماكن السياحية في سيوة واللي معروفه برده بإسم جزيرة "الخيال" وده عشان المنظر الرهيب لللغروب هناك واللي بيطل على بحيرة سيوة المالحة من ناحية الغرب، ومن الشمال بيحدّها بحيرة كبيرة في طريق قرية المراقي، أما الجنوب فموجود عدد كبير جدًا من النخل والشجر حتى طريق بير واحد وبحر الرمال الأعظم.. وسبب المنظر الرائع للغروب هو نقاء المياه بشكل كبير في المنطقة دي واللي بيظهر احمرار للمياه وقت الغروب من ورا جبل جعفر..

عين فطناس

من أجمل عيون المياة في واحة سيوة كلها، وده لإنها متحاوطة بالشجر والنخل من كل الإتجاهات، عين فطناس عمقها حوالي 7م وفيها حوالي 10 منابع بتخرج منها المياه، ومتاح إنك تنزلها في أي وقت.. واللي بيميزها هي درجة حرارتها المتوسطة فتقدر تنزلها في أي وقت في السنة..

موقعها فين بالظبط

جزيرة فطناس قريبة نسبيًا من وسط واحة سيوة على بعد حوالي 5 كم، وأفضل طريقة تروح بيها هي التروسيكل أو "التوكتوك" زي ما أهل سيوة بيقولوا، وبياخدها في نص ساعة.. أما المسافة من القاهرة فحوالي 750 كم وبتاخد 10 ساعات تقريبًا بأتوبيس غرب الدلتا.

احسن وقت لزيارة عين فطناس في سيوة

الصيف في سيوة بيبدأ في من أول مايو، درجة الحرارة بتكون عالية جدًا وده بيكون مناسب لو كان الغرض من السفرية علاجي لإن الموسم بيكون من نص يونيو لنص سبتمبر ودرجة الحرارة بتكون بين  27 - 38 °C.   أما لو رايح سياحة فأفضل وقت هو بداية اكتوبر وحتى أبريل.. الجو هتلاقيه دافي بالنهار وبرد بالليل ودرجة الحرارة بين  10 و25 °C

أسعار زيارة جزيرة فطناس في سيوة

الجزيرة تقدر تزورها في أي وقت، وعشان تروحها من وسط الواحة هتاخد تروسيكل – توك توك – وتكلفته هتكون حوالي 20 – 25 جنيه، أما العين نفسها فهي بدون أي تذاكر او تكلفة لنزولها.. ولو حابب تستريح وتستمتع بالمنظر الغروب في الكافيتريا الموجودة على الجزيرة فالمشروبات بتبدأ من 10 جنيه وانت طالع..

لو كنت من محبي مشاهدة الغروب فجزيرة فطناس من أجمل الأماكن اللي هتشوف فيها الغروب في سيوة كلها، أما لو عادي مش فارقة معاك بننصحك برده تشوف الغروب من هناك لإنه حقيقي مختلف عن أي غروب شوفته في أي مكان تاني في حياتك!