كل ما تحتاج معرفته عن البحيرات المالحة في سيوة

لوحة فنية رهيبة من السما والسحب في سماء سيوة بيكملها لون الملح الأبيض مع الإنعكاس الخطير للجبال على مياه البحيرات، والمكان مش مجرد مكان حلو هتاخد فيه صورة وهتمشي، البحيرات المالحة في سيوة هي مكان عالمي للسياحة والعلاج وليها أهمية كبيرة في الصناعة  في مصر وعشان كده هنتكلم عن البحيرات الموجودة في سيوة وإستخداماتها وأفضل وقت لزيارتها.. 

بحيرات الملح بسيوة

 

ايه هي البحيرات المالحة الموجودة؟

في سيوة موجود 4 بحيرات رئيسية بيستخرج منها الملح وهم بحيرة الزيتون وموجودة في شرق سيوة، وبحيرة أغورمي في شمال شرق الواحة، وبحيرة سيوة غرب شالي وأخيرًا بحيرة المراقي في غرب الواحة.. ومن المعروف إن البحيرات دي لا ينمو عليها أي طحالب ومفيش أي كائنات حية عايشة فيها.. وعن حجم الملح الموجود في البحيرات دي فبيوصل لأكتر من 60 مليون طن! 

بحيرات سيوة المالحة

 

البحيرات المالحة: المكان المثالي للسباحة والعلاج

البحيرات المالحة هي المكان المثالي للسباحة لأي حد مبيعرفش يعوم أو بيخاف من المياه، وده لإن درجة ملوحتها عالية جدًا واللي بتوصل ل 98%.. فالمياه حرفيًا بترفعك برغم من عمق البحيرات واللي بيوصل ل15م أحيانًا.. ده غير إستخدامها في العلاج لكتير من الأمراض الجلدية زي الصدفية وغيرها حسب كلام أهل الواحة واللي بينصحوا بإرتداء ملابس قطنية أثناء النزول للبحيرات وعدم الإستحمام مباشرة بعد الخروج وترك الملح على الجسم لفترة..

بحيرات الملح بسيوة

 

إستخدام البحيرات المالحة في الصناعة

بشكل رئيسي بيدخل الملح المستخرج من البحيرات المالحة في صناعات كتيرة وأهمهم هو ملح الطعام وده لإنه الأفضل عالميًا ده غير إن بعض البلاد شديدة البرودة بتستخدمه في إذابة التلج من الطرق، وفي سيوة بيستخدم السكان المحليين الأملاح في البناء وفي صنع المصابيح وده للإعتقاد السائد إنها بتقضي على الطاقة السلبية

salt lake siwa

 

موقعها فين بالظبط

البحيرات المالحة قريبة نسبيًا من وسط واحة سيوة على بعد حوالي 8 كم، وأفضل طريقة تروح بيها هي التروسيكل أو "التوكتوك" زي ما أهل سيوة بيقولوا، وبياخدها في نص ساعة.. أما المسافة من القاهرة فحوالي 750 كم وبتاخد 10 ساعات تقريبًا بأتوبيس غرب الدلتا.

salt lake in siwa


احسن وقت لزيارة البحيرات المالحة في سيوة

الصيف في سيوة بيبدأ في من أول مايو، درجة الحرارة بتكون عالية جدًا وده بيكون مناسب لو كان الغرض من السفرية علاجي لإن الموسم بيكون من نص يونيو لنص سبتمبر ودرجة الحرارة بتكون بين  27 - 38 °C.   أما لو رايح سياحة فأفضل وقت هو بداية اكتوبر وحتى أبريل.. الجو هتلاقيه دافي بالنهار وبرد بالليل ودرجة الحرارة بين  10 و25 °C... لكن بننصح بزيارة سيوة خلال الشتاء والخريف لو عاوز تشوف أفضل شكل للبحيرات المالحة لإنها بتكون أقرب للوحة فنية منها لأي شيء تاني!

siwa salt lake

 

فيه ناس كتير بتروح سيوة مخصوص عشان البحيرات المالحة.. فسواء بتعرف تعوم أو لأ، بتخاف من المياه أو مبتخافش.. فجهّز مايوهك لإن البحيرات دي نادرة جدًا حوالين العالم ومينفعش نفوّت حاجة بالجمال والعظمة دي، ومتنساش تبعتلنا صورك الجميلة هناك