بالصور والاسعار ،، كل ما تريد معرفته عن معبد امون احد اهم المعالم الاثرية في سيوة

معبد آمون: أهم مزارات سيوة!  تاريخ المعبد وسبب زيارة الأسكندر الأكبر له وأفضل مواعيد الزيارة

بعد تحقيق الكتير من النبؤات للكهنة أصبحت للمعبد شهرة كبيرة واللي شجّعت واحد زي الأسكندر الأكبر إنه يروح مخصوص من الإسكندرية لسيوة عشان يعرف إذا كان هيحكم العالم ولا لأ! قصص كتير وتاريخ طويل مرّ بيه معبد آمون في سيوة وعشان كده هنتكلم النهاردة عن التاريخ ده  والأسماء اللي اتعرف بيها المعبد غير أسعار التذاكر وأفضل مواعيد الزيارة..

تاريخ معبد آمون في سيوة

 بيرجع تاريخ المعبد للأسرة ال26 والنقوش اللي في قدس الأقداس بتقول إن اللي بناه هو الملك أحمس التاني في القرن السادس قبل الميلاد، وأهمية المعبد جاية من كونه معبد خاصة بالنبوءة والوحي الإلهي بإعتباره مهبط وحي الإله آمون، وبعد فتح الأسكندر الأكبر لمصر سنة 331 ق.م راح لسيوة بعد ما عرف عن المعبد وسأل العرّاف اليوناني  "هل هيحكم العالم؟" وأجابه الكاهن "نعم، لكن ليس لفترة طويلة" وتم تتويخ الأسكندر من بعدها كابن للإله آمون..

سبب شهرة معبد آمون في سيوة  

ارتبط المعبد بكتير من القصص وأشهرها هي قصة جيش قمبيز، اللي أرسله الملك الفارسي قمبيز التاني سنة 525 قبل الميلاد لهدم المعبد عشان يثبت للمصرين خطأ عقيدتهم المرتبطة بالنبوءة والوحي، والغريب في الأمر إن الجيش بالكامل هلك في الصحرا بسبب رياح عنيفة جدًا وده اللي زوّد من شهرة المعبد بشكل كبير باللإضافة لتحقيق نبوءة الإسكندر الأكبر بحكمه للعالم..

المعبد عبارة عن ايه؟ 

معبد آمون موجود فوق هضبة أغورمي اللي بترتفع ل30م، وبيتكون المعبد من 3 أجزاء، المعبد الرئيسي وقصر الحاكم وجناح الحرّاس وبيه ملحقات كتير زي البئر المقدسة.. وشهد المعبد تغيرات كتيرة في العصر الفرعوني واليوناني والروماني والإسلامي وأصبح ينقسم لجزأين، الأول فرعوني والتاني بطلمي وإسلامي.. وفي الدور التاني من المعبد تقدر تشوف معالم الواحة وشجر الزيتون والنخل والبحيرات المالحة.. وبيشهد ظاهرة فلكية بحيث بيتعامد قرص الشمس على حجرة قدس الأقداس في المعبد مرتين سنويًا في نهاية مارس وتسمي الإعتدال الربيعي ونهاية سبتمبر واسمها الإعتدال الخريفي..

سبب تمسية معبد آمون في سيوة

 اتسمي طبقًا لغرضه وهو نشر ديانة آمون بين القبائل والشعوب المجاورة وده بسبب موقع سيوة المتميز كملتقي للطرق التجارية بين جنوب الصحراء وشمالها وغربها وشرقها.. وللمعبد أسماء تانية زي معبد الوحي ومعبد الإسكندر ومعبد التنبؤات وده بسبب تحقيق نبوءة الأسكندر المقدوني بحكم للعالم بعد تتويجه حاكم لمصر على إيد كاهن المعبد..

موقعه فين بالظبط

معبد آمون قريب جدًا من وسط سيوة، فلو انت نازل في أي فندق في وسط الواحة هتاخدها مشي نص ساعة تقريبًا، أو لو هتاخد تروسيكل هيكون أقل من 10 دقايق! أما المسافة من القاهرة فحوالي 750 كم وبتاخد 10 ساعات تقريبًا بأتوبيس غرب الدلتا..

احسن وقت لزيارة معبد آمون في سيوة

الصيف في سيوة بيبدأ في من أول مايو، درجة الحرارة بتكون عالية جدًا وده بيكون مناسب لو كان الغرض من السفرية علاجي لإن الموسم بيكون من نص يونيو لنص سبتمبر ودرجة الحرارة بتكون بين  27 - 38 °C.   أما لو رايح سياحة فأفضل وقت هو بداية اكتوبر وحتى أبريل.. الجو هتلاقيه دافي بالنهار وبرد بالليل ودرجة الحرارة بين  10 و25 °C. 

أسعار زيارة معبد آمون في سيوة

تقدر تزور المعبد في أي وقت من 8 الصبح وحتى 5 المغرب وسعر التذكرة 20 جنيه أما لو طالب فالسعر 5 جنيه بس.. ده بالإضافة لمواصلاتك لو قررت تروح بتوكتوك "تروسيكل" واللي هياخد 15 جنيه تقريبًا.. 

لو كنت من محبي التاريخ، فمعبد آمون هو أول مكان هتزوره في سيوة غالبًا، أما لو مش من محبي التاريخ فبنصحك تروحه برده عشان قريب جدًا من وسط المدينة وتذكرته مش غالية بالإضافة للصورة البانورامية الهايلة اللي هتشوفها للواحة كلها من عليه!