في قلب واحة سيوة اكتشف قلعة شالي وتعرف علي تاريخ القلعة وسبب البناء وافضل مواعيد الزيارة

قلعة شالي: تاريخ سيوة في ألف سنة!  حكاية القلعة وسبب بنائها وأفضل مواعيد الزيارة

كلمة "شالي" معناها المدينة باللغة السيوة القديمة، وتعتبر قلعة شالي من أشهر معالم سيوة التاريخية، وبسبب شهرتها وتفرد طريقة بناها عن أي مكان تاني في العالم بدأ الإتحاد الأوروبي في تمويل ترميمها كمرحلة أولى قبل إعلانها منطقة تراث عالمي! أكتر من 700 سنة عاش فيهم أهل سيوة في القلعة فيهم حكايات ومعلومات كتيرة هنحكيهم النهاردة بالإضافة لإزاي توصل لها ده غير أفضل مواعيد زيارتها..

تاريخ قلعة شالي  

اتبنت القلعة سنة 1209م بعد ما أهل سيوة اتعرضوا للكتير من الغزو وقطاع الطرق خاصة في موسم الحصاد، فقرروا يبنوا قرية متحصنة فوق الجبل مع سور قوي ومرتفع وفضلت شالي على الوضع ده لحد سنة 1820م مع وصول محمد علي باشا للحكم وبدأوا يحسوا بالأمان فنزل بعضهم من القلعة لباقي أرجاء الواحة، لكن الجميع هجرها بشكل نهائي سنة 1926م بعد سيل قوي ضرب شالي لمدة 3 أيام وأجبر الجميع على النزول للواحة.. 

القلعة عبارة عن ايه؟ 

بيوت شالي اتبنت من مادة "الكرشيف" وهي عبارة عن الطين اللي بيتاخد من الأرض المشبعة بالملح ولما ينشف بيكون في نفس صلابة الأسمنت.. البيوت كان معظمها دورين، الأول فيه أوض للتخزين والمواشي والفرن أما التاني فكان أوض مخصصة للسكن، وللقلعة باب واحد سموه "الباب إن شال" ومعناه باب المدينة وبعد قرن كامل فتحوا باب تاني سموه "الباب أثراب" ومعناه الباب الجديد ثم باب تالت بإسم "باب قدوحة" وده كان مخصص للنساء فقط..

موقعها فين بالظبط

قلعة شالي موجودة في قلب سيوة، فلو انت نازل في أي فندق في وسط الواحة هتاخدها مشي في أقل من 10 دقايق! أما المسافة من القاهرة فحوالي 750 كم وبتاخد 10 ساعات تقريبًا بأتوبيس غرب الدلتا..

احسن وقت لزيارة قلعة شالي في سيوة

الصيف في سيوة بيبدأ في من أول مايو، درجة الحرارة بتكون عالية جدًا وده بيكون مناسب لو كان الغرض من السفرية علاجي لإن الموسم بيكون من نص يونيو لنص سبتمبر ودرجة الحرارة بتكون بين  27 - 38 °C.   أما لو رايح سياحة فأفضل وقت هو بداية اكتوبر وحتى أبريل.. الجو هتلاقيه دافي بالنهار وبرد بالليل ودرجة الحرارة بين  10 و25 °C. 

قلعة شالي هي روح وتاريخ سيوة، فتأكد إن زيارتك الجاية للواحة تضمن القلعة خاصة إنها غير مكلفة وفي وسط البلد بالإضافة لإنها هتاخد ساعتين تلاتة بالكتير ده غير إنها هتكون خلال السنين الجاية تابعة لليونسكو كمنطقة تراث عالمي نفخر بيها كلنا قدام العالم كله..